Read De Bibel JHF 3. Mose 20 Bible Online

3. Mose 20 - De Bibel JHF bible

3. Mose 20

¹Un de Har räd too Moses un säd:

²Un to de Kjinja Israel saust du sajen: Jiedra Mensch vonne Kjinja Israel un vonne Framde, dee en Israel sent, dee von siene Kjinja däm Moloch jeft, saul omjebrocht woaren; daut Laundesvolkj saul am steenjen.

³Un ekj woa mien Aunjesecht jäajen däm Maun rechten un am ute Medd von sienem Volkj utroden, wiels hee von siene Kjinja däm Moloch jejäft haft, mien Heilichtum too veonreinjen un mienen heiljen Nomen too entheiljen.

⁴Un wan daut Laundesvolkj siene Uagen fa däm Maun veschluten, wan hee von siene Kjinja däm Moloch jeft, soo daut dee am nich ombrinjen,

⁵soo woa ekj mien Aunjesecht jäajen däm Maun rechten un jäajen sien Jeschlajcht, un woa am un aule, dee am nohuare, om däm Moloch notohuare, ut de Medd von äarem Volkj utroden.

⁶Un dee Seel, dee no de Doodes beschwäara un no de Woasaja jeit, om an notohuare, jäajen de Seel woa ekj mien Aunjesecht rechten un an ute Medd von äarem Volkj utroden.

⁷Soo heilicht junt un siet heilich, dan ekj sie de Har, jun Gott;

⁸un hoolt miene Sazungen un hoolt dee. Ekj sie de Har, dee junt heilicht.

⁹Jiedra Mensch, dee siene Mutta ooda Voda flucht, saul omjebrocht woaren; hee haft sienen Voda ooda siene Mutta jeflucht, sien Bloot es opp am.

¹⁰Un wan een Maun Ehebruch drift met eenem Maun siene Fru, wan hee Ehebruch drift met däm Näakjsten siene Fru, soo sellen de Ehebräakja un de Ehebräakjarin stoawen.

¹¹Un wan een Maun bie de Fru von sienem Voda licht; hee haft däm Voda siene Schomp opjedakjt; beid sellen jewess stoawen; äa Bloot es opp an.

¹²Un wan een Maun bie siene Schwiadochta licht, soo sellen beid jewess stoawen; see ha een Aufschu begonen, äa Bloot es opp an.

¹³Un wan een Maun bie eenem Maun licht, aus maun bie eene Fru licht, soo ha beid een Aufschu begonen; see sellen jewess stoawen, äa Bloot es opp an.

¹⁴Un wan een Maun eene Fru un äare Dochta nemt, daut es eene Schaunddot; maun saul am un an met Fia vebrennen, daut kjeene Schaunddot en äare Medd es.

¹⁵Un wan een Maun bie eenem Vee licht, soo saul hee jewess stoawen, un daut Vee sell jie ombrinjen.

¹⁶Un wan eene Fru irjent eenem Vee noda kjemt, om met am schaufen to haben, soo saust du de Fru un daut Vee ombrinjen; see sellen jewess stoawen, äa Bloot es opp an.

¹⁷Un wan een Maun siene Sesta nemt, de Dochta von sienem Voda ooda de Dochta von siene Mutta, un hee sitt äare Schomp; un see sitt siene Schomp; daut es eene Schaund, un see sellen utjerot woaren ver de Uagen de Kjinja — von äarem Volkj; hee haft de Schaund von siene Sesta opjedakjt, hee saul siene Ojjerajchtichkjeit droagen.

¹⁸Un wan een Maun bie eene Fru licht en äare Krankheit un äare Schomp opdakjt, soo haft hee äare Kjwal opjedakjt, un see haft äare Blootkjwal opjedakjt; see sellen beid ute Volkjsmedd utjerot woaren.

¹⁹Un de Schomp de Sesta von diene Mutta un de Sesta von dienem Voda saust du nich opdakjen; dan wäa daut deit, haft sien Blootfrindschauft opjedakjt; see sellen äare Ojjerajchtichkjeit droagen.

²⁰Un wan een Maun bie de Fru von sienem Onkel licht, soo haft hee däm Onkel siene Schomp opjedakjt; see sellen äare Sind droagen, kjinjaloos sellen see stoawen.

²¹Un wan een Maun de Fru von sienem Brooda nemt; daut es eene Orreinheit; hee haft de Schomp von sienem Brooda opjedakjt, see sellen kjinjaloos sennen.

²²Un jie sellen aul miene Sazungen un aul miene Rajchte hoolen un dee doonen, doamet daut Launt junt nich utspicht, wuahan ekj junt brinj, om doabennen too wonen.

²³Un jie sellen nich en de Sazungen de Nazionen waundlen, dee ekj ver junt vejoag; dan aul de Dinj ha see jedonen, un see sent mie toom Äakjel jeworden;

²⁴un ekj ha to junt jesajcht: Jie, äa Launt besetten, un ekj woa junt toom Ieejentum jäwen, een Launt, daut von Malkj un Honnich rant. Ekj sie de Har jun Gott, dee ekj junt ut de Velkja aufjesondat ha.

²⁵Un jie sellen unjascheeden tweschen däm reinen Vee un däm orreinen, un tweschen de orreine Väajel un de reine, un sellen junt selfst nich toom Aufschu moaken derch daut Vee un derch de Väajel un derch aules, waut sikj oppem Ieedboddem bewäacht, daut ekj junt aus onrein aufjesondat ha.

²⁶Un jie sellen mie heilich sennen, dan ekj sie heilich, ekj, Gott; un ekj ha junt von de Velkja aufjesondat, om miene to sennen.

²⁷Un wan en eenem Maun ooda en eene Fru een Doodesbeschwiera- ooda Woasajajeist es, soo sellen see jewess stoawen; maun saul an steenjen, äa Bloot es opp an.