Read De Bibel JHF 3. Mose 23 Bible Online

3. Mose 23 - De Bibel JHF bible

3. Mose 23

¹Un de Har räd too Moses un säd:

²Räd to de Kjinja Israel un saj to an: De Faste Gottes, dee jie aus heilje Vesaumlunk utroopen sellen, dit sent miene Faste:

³Sas Doag saul maun oabeiden; oba aum säwenden Dach es Sabatru, eene heilje Vesaumlunk; doa sell jie kjeene Oabeit doonen; daut es een Sabat däm Harn en aul june Wonstäden.

⁴Daut sent de Faste Gottes, de heilje Vesaumlunk, dee jie utroopen sellen too äare bestemde Tiet:

⁵Aum 14-den Dach vom ieeschten Moonat, jäajen Owent, es daut Passa däm Harn.

⁶Un aum 15-den Dach däm seljen Moonat es daut Fast de Onjesuade Brood däm Harn; säwen Doag sell jie onjesuadet äten.

⁷Aum ieeschten Dach sell jie eene heilje Vesaumlunk haben, kjeene Deenstoabeit sell jie doonen.

⁸Un jie sellen däm Harn säwen Doag een Fiaopfa brinjen; aum säwenden Dach es eene heilje Vesaumlunk, kjeene Deenstoabeit sell jie doonen.

⁹Un de Har räd too Moses un säd:

¹⁰Räd to de Kjinja Israel un saj to an: Wan jie en daut Launt komen, daut ekj junt jäw, un jie siene Arnt ensaumlen, soo sell jie eene Goaw de Ieeschte von june Arnt nom Priesta brinjen;

¹¹un hee saul de Goaw ver däm Harn schwinjen* (opphäwen) toom Gooden jefaulen fa junt; aum aundren Dach nom Sabat saul ar de Priesta schwinjen*.

¹²Un jie sellen aun däm Dach, doa jie de Goaw schwinjen*, een Laum opfren, onen Fäla, eenjoasch, toom Brauntopfa däm Harn;

¹³un sien Speisopfa; twee tieendel fienet Mäl, vemischt met Eelj, een Fiaopfa däm Harn, een leeftolja Jeroch; un sien Drinkjopfa; 1/4-det Deel Hin Wien.

¹⁴Un Broot un jereeschte un junge Kjeena sell jie bat disem Dach nich äten, bat jie de Opfagow junem Gott jebrocht ha; eene eewje Sazunk fa june Jeschlajchta en aul june wonstäde.

¹⁵Un jie sellen talen vom aundren Dach nom Sabat, von däm Dach, doa jie de Webgoaw jebrocht ha; daut sellen 7 vollen Wäakj sennen.

¹⁶Bat toom aundren Dach nom säwenden Sabat sell jie 50 Doag talen; un jie sellen däm Harn een nieet Speisopfa brinjen.

¹⁷Ut june Woninj sell jie Webbrood brinjen, twee von twee tieendel fienem Mäl sellen de sennen, jesuat sellen see jebackt woaren, aus Ieeschte däm Harn.

¹⁸Un jie sellen toom Broot säwen eenjoasche Lama onen Fäla brinjen, un eenen jungen Boll un twee Bakj; (see sellen een Brauntopfa däm Harn sennen); un äa Speisopfa un äa Drinkjopfa; een Fiaopfa leeftolja Jeroch däm Harn.

¹⁹Un jie sellen eenen Kosenbock toom Sindopfa opfren un twee eenjoasche Lama toom Dankopfa.

²⁰Un de Priesta saul dee schwinjen* met däm Ieeschten Broot aus Wäwopfa ver däm Harn, met dee twee Lama; see sellen däm Harn heilich sennen un däm Priesta jehieren.

²¹Un jie sellen aun disem seljen Dach utroopen, eene heilje Vesaumlunk saul junt daut sennen; kjeene Deenstoabeit sell jie doonen; eene eewje Sazunk en aul june Wonstäden fa aul june Jeschlajchta.

²²Un wan jie de Arnt von junem Launt ennbrinjen, saust du däm Raunt von dienem Flekj nich gaunz aufarnte, un saust kjeene noläsen no diene Arnt hoolen; fa däm Oamen un fa däm Framden saust du dee loten. Ekj sie de Har, jun Gott.

²³Un de Har räd too Moses un säd:

²⁴Räd to de Kjinja Israel un saj: Aum säwenden Moonat, aum ieeschten em Moonat, sell jie Ruen, een Jedajchnis Dach vom Poosauneklang, eene heilje Vesaumlunk.

²⁵Kjeene Deenstoabeit sell jie doonen, un jie sellen däm Harn een Fiaopfa brinjen.

²⁶Un de Har räd too Moses un säd:

²⁷Doch aum 10-den en disem säwenden Moonat es de Veseenungsdach; eene heilje Vesaumlunk sell jie haben, un jie sellen june Seelen deemutje, un sellen däm Harn een Fiaopfa brinjen.

²⁸Un kjeene Oabeit sell jie aun disem Dach doonen; dan daut es de Veseenungsdach, om Veseenunk fa junt ver däm Harn to doonen, junem Gott.

²⁹Dan jiedre Seel, dee sikj aun disem Dach nich deemooticht, dee saul ut äarem Volkj utjerot woaren;

³⁰un jiedre Seel, dee aun disem Dach eene Oabeit deit, dee woa ekj ute Medd von äarem Volkj vetiljen.

³¹Kjeene Oabeit sell jie doonen. Eene eewje Sazunk fa june Jeschlajchta en aul june Wonstäden.

³²Eene Sabatru saul hee fa junt sennen, un jie sellen june Seelen deemutje; aum näajenden em Moonat, Oppenowent, vom Owent bat aum Owent sell jie junem Sabat hoolen.

³³Un de Har räd too Moses un säd:

³⁴Räd to de Kjinja Israel un saj: Aum 15-den Dach en disem säwenden Moonat es daut Loofzeltfast säwen Doag däm Harn.

³⁵Aum ieeschten Dach saul eene heilje Vesaumlunk sennen, kjeene Deenstoabeit sell jie doonen.

³⁶Säwen Doag sell jie däm Harn een Fiaopfa brinjen; aum achten Dach sell jie eene heilje Vesaumlunk haben, un jie sellen däm Harn een Fiaopfa brinjen; daut es eene Fast-Vesaumlunk, kjeene Deenstoabeit sell jie doonen.

³⁷Daut sent de Faste Gottes, dee jie aus heilje Vesaumlunk utroopen sellen, om däm Harn Fiaopfa to brinjen, Brauntopfa un Speisopfa, Schlachtopfa un Drinkjopfa, een jiedret aun sienem Dach;

³⁸butre Sabaten Gottes un buta june Gowen un buta aul jun Vespräakjen un buta aul june friewelje Gowen, dee jie däm Harn jäwen.

³⁹Doch aum 15-den Dach em säwenden Moonat, wan jie de Laundesarnte enjesaumelt ha, sell jie daut Fast Gottes hoolen, säwen Doag lank; aum ieeschten Dach saul Ru sennen, un aum 8 Dach saul Ru sennen.

⁴⁰Un jie sellen aum ieeschten Dach Frichte von scheene Beem nämen, Palmasta un Asta von dicht blädaje Beem un von Bachwiede, un sellen junt säwen Doag lank freien ver däm Harn, junem Gott.

⁴¹Un jie sellen daut säwen Doag em Joa aus Fast däm Harn hoolen; eene eewje Sazunk fa aul june Jeschlajchta; aum säwenden Moonat sell jie daut fieren.

⁴²En Loofzelte sell jie säwen Doag wonen; aule Einheimische en Israel sellen en Loofzelte wonen;

⁴³om daut june Jeschlajchta weeten, daut ekj de Kjinja Israel en Loofzelte ha wonen loten, aus ekj an ut däm Ägiptenlaunt rutfieed. Ekj sie de Har, jun Gott. -

⁴⁴Un Moses vekjindijd de Kjinja Israel de Faste Gottes.