Read De Bibel JHF 3. Mose 24 Bible Online

3. Mose 24 - De Bibel JHF bible

3. Mose 24

¹Un de Har räd too Moses un säd:

²Befäl de Kjinja Israel, daut see die reinet, jestaumtet Eeljboom Eelj brinjen fa de Laump, om emma de Laump auntostekjen.

³Butrem Väahank vom Zeichnis, em Zelt de Bejäajnunk, saul Aaron dee reedmoaken, von Oppenowent bat Zemorjes, emma ver däm Harn; eene eewje Sazunk fa june Jeschlajchta.

⁴Oppem reinen Laumpenhoola saul hee emma de Laumpen ver däm Harn reedmoaken.

⁵Un du saust fienet Mäl nämen un doarut 12 Kuaken baken; von twee tieendel saul eene Kuak sennen.

⁶Un du saust dee en twee Schichte lajen, 6 en eene Schicht, oppem reinen Desch ver däm Harn.

⁷Un du saust opp jiedre Schicht reinet Weiruak lajen, un hee saul däm Broot toom Jedajchnis sennen, een Fiaopfa däm Harn.

⁸Sabatdach fa Sabatdach - emma saul daut ver däm Harn jemoakt woaren; een eewja Bunt von de Kjinja Israel.

⁹Un daut saul Aaron un siene Säns jehieren, un see sellen daut äten aum heiljen Uat; dan aus een Huachheiljet von de Fiaopfa Gottes saul daut am jehieren; eene eewje Sazunk.

¹⁰Un de Sän von eene Israelische Fru - oba hee wia de Sän von eenem ägiptischen Maun - jinkj ut unja de Kjinja Israel; un de Sän von de Israelische Fru un een Israelischa Maun streeden sikj em Loaga.

¹¹Un de Sän von de Israelische Fru lastad däm Nomen Gottes un flucht am; un see brochten am no Moses. Oba de Nomen von siene Mutta wia Schelomit, de Dochta Dibris, vom Staum Dan.

¹²Un see läden am em Jefenkjnis, doamet an nom Mul Gottes jesajcht wort.

¹³Un de Har räd too Moses un säd:

¹⁴Fieet däm Flucha butrem Loaga; un aula, dee daut jehieet ha, sellen äare Henj opp sienem Kopp lajen, un de gaunze Jemeent saul am steenjen.

¹⁵Un to de Kjinja Israel saust du räden un sajen: Wan wäa sienen Gott flucht, soo saul hee siene Sinden droagen.

¹⁶Un wäa däm Nomen Gottes lastat, saul jewess stoawen, steenjen saul am de gaunze Jemeent; aus de Framda, soo de Einheimischa; wan hee däm Nomen lastat, soo saul hee stoawen.

¹⁷Un wan wäa eenen Mensch ombrinjt, soo saul hee jewess stoawen.

¹⁸Un wäa een Vee dootschleit, saul daut betolen; Läwen fa Läwen.

¹⁹Un wan wäa sienem Näakjsten velazt; soo aus hee jedonen haft, soo saul am jedonen woaren:

²⁰Bruch om Bruch, Uag om Uag, Tän om Tän; aus hee eenen Mensch velazt, soo saul am jedonen woaren.

²¹Un wäa een Vee dootschleit, saul daut betolen; oba wäa eenen Mensch dootschleit, saul stoawen.

²²Een jlikjet Rajcht sell jie ha; aus de Framda, soo saul de Einheimischa sennen; dan ekj sie de Har, jun Gott.

²³Un Moses räd to de Kjinja Israel, un see fieeden däm Flucha rut ver däm Loaga un steenijden am; un de Kjinja Israel deeden, aus de Har däm Moses befoolen haud.