Read De Bibel JHF 3. Mose 3 Bible Online

3. Mose 3 - De Bibel JHF bible

3. Mose 3

¹Un wan siene Opfagow een Dankopfa es; wan hee dee von de Rinda brinjt, daut es een Oss ooda eene Koo, soo saul hee an onen Fäla ver däm Harn brinjen.

²Un hee saul siene Haunt oppem Kopp von sienem Opfa lajen un daut schlachten aun däm Engank von Zelt de Bejäajnunk; un Aaron siene Säns, de Priesta, sellen daut Bloot runtom aun däm Aultoa spretzen.

³Un hee saul vom Dankopfa een Fiaopfa däm Harn brinjen; daut Fat, daut det Ennaliche bedakjt, un aulet Fat, daut aum Ennalichen es,

⁴un de beid Nieren un daut Fat, daut aun an es, daut aune Lenden es, un daut Nat äwa de Läwa; met de Nieren saul hee daut auftranen.

⁵Un Aaron siene Säns sellen daut oppem Aultoa rieekjren, opp däm Brauntopfa, daut oppem Holt äwa däm Fia es; daut es een Fiaopfa leeftolja Jeroch däm Harn.

⁶Un wan siene Opfagow vom Kjlienvee es toom Dankopfa däm Harn, een Menlichet (hee) ooda Frulichet (see) es, soo saul hee dee onen Fäla brinjen.

⁷Wan hee een Schop aus siene Opfagow brinjt, soo saul hee daut ver däm Harn brinjen;

⁸un hee saul siene Haunt oppem Opfa sienem Kopp lajen un daut schlachten ver däm Zelt de Bejäajnunk; un Aaron siene Säns sellen sien Bloot runtom aun däm Aultoa spretzen.

⁹Un hee saul von däm Dankopfa aus Fiaopfa däm Harn brinjen; sien Fat, däm gaunzen Fatschwauns; dicht aum Rigjen saul hee daut auftranen; un daut Fat, daut et Ennaliche bedakjt, un aulet Fat, daut aum Ennalichen es,

¹⁰un de beid Nieren un daut Fat, daut aun an es, daut aune Lenden es, un daut Nat äwa de Läwa; met de Nieren saul hee doa auftranen.

¹¹Un de Priesta saul daut oppem Aultoa rieekjren; daut es eene Speise von Fiaopfa däm Harn.

¹²Un wan siene Opfagow eene Kos es, soo saul hee ar ver däm Harn brinjen.

¹³un hee saul siene Haunt opp äarem Kopp lajen un ar schlachten ver däm Zelt de Bejäajnunk; un Aaron siene Säns sellen äa Bloot runtom aun däm Aultoa spretzen.

¹⁴Un hee saul doavon siene Opfagow aus Fiaopfa däm Harn brinjen; daut Fat, daut et Ennaliche bedakjt, un aulet Fat, daut aum Ennalichen es,

¹⁵un de beid Nieren un daut Fat, daut aun an es, daut aune Lenden es, un daut Nat äwa de Läwa; met de Nieren saul hee doa auftranen.

¹⁶Un de Priesta saul aul daut oppem Aultoa rieekjren; daut es eene Speise vom Fiaopfa toom leeftoljen Jeroch; aulet Fat jehieet däm Harn.

¹⁷Eene eewje Sazunk fa june Jeschlajchta en aul äare Wonstäden; aulet Fat un aulet Bloot sell jie nich äten.