Read De Bibel JHF 3. Mose 5 Bible Online

3. Mose 5 - De Bibel JHF bible

3. Mose 5

¹Un wan wäa sindicht, daut hee daut Fluchen hieed, un hee wia Zeij, auf hee daut jeseenen ooda erfoaren haft, - wan hee daut nich aunkloacht, soo saul hee siene Ojjerajchtichkjeit droagen;

²ooda wan wäa waut Orreine aunschieet, auf daut Os es von eenem onreinem willen Tia, ooda Os von eenem onreinem Vee, ooda daut Os von eenem onreinem krupendem Tia, - es am daut uk onbewusst, soo es hee onrein un schuldich;

³ooda wan hee de Orreinichkjeit von eenem Mensch aunschieet, waut et uk fa eene Orreinichkjeit von am es, derch dee hee onrein woat, un daut es am onbewusst, - erkjant hee daut, soo es hee schuldich;

⁴ooda wan wäa schwieet, endäm hee leichtsennich met de Leppen räd, Beeset ooda Goodet to doonen, no aulem waut een Mensch met eenem Schwua leichtfoadich räden mucht, un daut es am onbewusst, - erkjant hee daut, soo es hee schuldich en eenem von disem.

⁵Un daut saul passieren, wan hee sikj en eenem von disem veschuldicht, soo bekjan hee, met waut hee jesindicht haft;

⁶un brinj sien Schultopfa däm Harn fa siene Sinden, dee hee begonen haft; eene Fruliche vom Kjlienvee, een Schop ooda eene Kos toom Sindopfa; un de Priesta saul Veseenunk fa am doonen wäajen siene Sind.

⁷Un wan siene Haunt daut to eenem Stekj Kjlienvee nich jenuach oppbrinjen kaun, soo saul hee fa siene Schult, dee hee opp sikj jeloden haft, twee Turtelduwen ooda twee junge Duwen däm Harn brinjen; eene too Sindopfa un eene toom Brauntopfa.

⁸Un hee saul dee nom Priesta brinjen; un disa saul toieescht dee toom Sindopfa bestemden brinjen un kjniep ar däm Kopp en dicht biem Jenekj; oba auftranen saul hee am nich.

⁹Un hee sprets von däm Sindopfa Bloot aune Wenj vom Aultoa, un daut Äwaje von däm Bloot saul aum Foot vom Aultoa utjedrekjt woaren; daut es een Sindopfa.

¹⁰Un de aundre saul hee aus Brauntopfa no de Väaschreft opfren. Un soo doo de Priesta Veseenunk fa am wäajen siene Sind, dee hee begonen haft, un daut woat am vezeit woaren.

¹¹Un wan siene Haunt twee junge Turtelduwen ooda twee Duwen nich oppbrinjen kaun, soo brinj hee, dee doa jesindicht haft, aus siene Opfagow een tieendel Efa fienet Mäl aus Sindopfa; hee saul kjeen Eelj doanopp doonen un kjeen Weiruak doanopp lajen, dan daut es een Sindopfa.

¹²Un hee saul daut nom Priesta brinjen; un de Priesta saul doavon eene Haunt voll nämen, aus daut Jedajchnis Deel, un rieekjat daut oppem Aultoa, bie däm Fiaopfa Gottes; daut es een Sindopfa.

¹³Un soo doo de Priesta Veseenunk fa am wäajen siene Sind, dee hee begonen haft en eenem von dise, un daut woat am vezeit woaren; un daut saul däm Priesta jehieren aus daut Speisopfa.

¹⁴Un de Har räd too Moses un säd:

¹⁵Wan wäa Ontru bejeit un ut Veseenen aun de Heilje Dinj Gottes sindicht, soo saul hee sien Schultopfa däm Harn brinjen, eenen Bock onen Fäla vom Kjlienvee, no dienem schaze aun Selwa Schekel, nom Schekel vom Heilichtum, toom Schultopfa.

¹⁶Un waut hee aum Heilichtum jesindicht haft, saul hee betolen un 1/5 doatoo lajen un daut däm Priesta jäwen; un de Priesta saul Veseenunk fa am doonen met däm Schultopfa Bock, un daut woat am vezeit woaren.

¹⁷Un wan wäa sindicht un eenem von aule Jebooten [Vebeeden] Gottes deit, dee nich jedonen woaren sellen, - haft hee daut uk nich jewist, soo es hee schuldich un saul siene Ojjerajchtichkjeit droagen.

¹⁸Un hee saul eenen Bock onen Fäla vom Kjlienvee no dienem schaze nom Priesta brinjen, toom Schultopfa; un de Priesta saul Veseenunk fa am doonen wäajen sien Veseenen, daut hee begonen haft, onen to weeten; un daut woat am vezeit woaren.

¹⁹Daut es een Schultopfa; hee haft sikj jewess aun däm Harn veschuldicht.

²⁰Un de Har räd too Moses un säd:

²¹Wan wäa sindicht un däm Harn jäajenäwa Ontru bejeit, daut hee sienem Näakjsten een aunvetrudet Goot aufauffaulen deit ooda Jeliedet ooda waut Jeroowdet; ooda hee haft von sienem Näakjsten waut met Jewault jenomen,

²²ooda hee haft Veloarnet jefungen, un licht sikj doavon auf; un hee schwieet faulsch äwa irjent waut von aul däm, waut een Mensch doonen mucht, sikj doaraun too vesindje;

²³soo saul daut passieren, wan hee jesindicht un sikj veschuldicht haft, daut hee daut Jeroowde trigjjeft, daut hee jeroowt ooda met Jewault jenomen haft, ooda daut Aunvetrude, daut am aunvetrut jeworden es, ooda daut Veloarne, daut hee jefungen haft,

²⁴ooda aules, wuaräwa hee faulsch jeschwuaren haft; un hee saul daut betolen no siene vollen Somm un daut fefte doaräwa doatoo doonen; wäm daut jehieet, däm saul hee daut jäwen aun sienem Schultopfadach.

²⁵Un sien Schultopfa saul hee däm Harn brinjen, eenen Bock onen Fäla vom Kjlienvee, no dienem schaze toom Schultopfa, nom Priesta;

²⁶un de Priesta saul Veseenunk fa am ver däm Harn doonen, un daut woat am vezeit woaren wäajen irjent waut von aulem, waut hee jedonen haft, sikj doarenn too veschuldje.