Read De Bibel JHF 3. Mose 6 Bible Online

3. Mose 6 - De Bibel JHF bible

3. Mose 6

¹Un de Har räd too Moses un säd:

²Befäl Aaron un siene Säns un saj: Dit es daut Jesaz vom Brauntopfa. Dit, daut Brauntopfa, saul opp siene Fiastäd sennen, opp däm Aultoa, de gaunze Nacht bat Zemorjes; un daut Fia oppem Aultoa saul doabowen erhoolen woaren.

³Un de Priesta saul sien Lienkjleet auntrakjen, un saul siene Lienbeenkjleeda äwa daut Fleesch auntrakjen; un hee saul de Fatausch raufnämen, daut et Brauntopfafia opp däm Aultoa vebrent haft, un saul dee biem Aultoa schedden.

⁴Un hee saul siene Kjleeda uttrakjen un aundre Kjleeda auntrakjen un de Fatausch butrem Loaga aun eenem reinem Uat droagen.

⁵Un daut Fia oppem Aultoa saul opp däm seljen aum brennen erhoolen woaren, daut saul nich utgonen; un de Priesta saul Holt opp am aunstekjen, Morjen fa Morjen, un daut Brauntopfa opp am reed moaken, un de Fatstekja de Dankopfa opp am rieekjren.

⁶Een bestendjet Fia saul opp däm Aultoa aum brennen erhoolen woaren, daut saul nich utgonen.

⁷Un dit es daut Speisopfa Jesaz: Eena von Aaron siene Säns saul daut ver däm Harn brinjen, ver däm Aultoa.

⁸Un hee saul doavon eene Hauntvoll nämen, vom fienen Mäl, vom Speisopfa un von däm Eelj, un aulem Weiruak, dee opp däm Speisopfa es, un daut oppem Aultoa rieekjren; daut es een leeftolja Jeroch, sien Jedajchnis fa däm Harn.

⁹Un daut Äwaje doavon saul Aaron un siene Säns äten; onjesuat saul daut jejäten woaren aum heiljen Uat; em Väahoff vom Zelt de Bejäajnunk sellen see daut äten.

¹⁰Daut saul nich jesuat jebackt woaren; aus äa Aundeel ha ekj an daut jejäft von mienem Fiaopfa; huachheilich es daut, aus daut Sindopfa un aus daut Schultopfa.

¹¹Aulet Menliche unja Aaron siene Kjinja sellen daut äten; een fa eewich Bestemmdet fa aul june Jeschlajchta, von de Fiaopfa Gottes. Aules, waut daut aun rieet, woat heilich sennen.

¹²Un de Har räd too Moses un säd:

¹³Dit es de Opfagow von Aaron un siene Säns, daut see däm Harn brinjen sellen aun däm Dach, doa hee jesaulft woat. 1/10 Efa fienet Mäl aus bestendjet Speisopfa, de Halft doavon Zemorjes un de Halft doavon Oppenowent.

¹⁴Daut saul enne Paun met Eelj reedjemoakt woaren, ennjereat met Eelj saust du daut brinjen; jebackte Speisopfa Stekja saust du brinjen aus eenen leeftoljen Jeroch däm Harn.

¹⁵Un de Priesta, dee unja siene Säns aun siene Städ jesaulft woat, saul daut opfren; eene eewje Sazunk; daut saul däm Harn gaunz jerieekjat woaren.

¹⁶Un jiedret Speisopfa von eenem Priesta saul gaunz vebrent woaren; daut saul nich jejäten woaren.

¹⁷Un de Har räd too Moses un säd:

¹⁸Räd too Aaron un siene Säns un saj: Dit es daut Jesaz vom Sindopfa. Aun däm Uat, woa daut Brauntopfa jeschlacht woat, saul daut Sindopfa ver däm Harn jeschlacht woaren; huachheilich es daut.

¹⁹De Priesta, dee daut aus Sindopfa opfat, saul daut äten; aum heiljen Uat saul daut jejäten woaren, em Väahoff vom Zelt de Bejäajnunk.

²⁰Aules, waut sien Fleesch aunschieet, woat heilich sennen; un wan von sienem Bloot opp een Kjleet spretst - daut, woa nopp daut spretst, saust du aum heiljen Uat wauschen.

²¹Un daut ieedne Jefäss, en däm daut jekoakt woat, saul vebroaken woaren, un wan daut en eenem koppanem Jefäss jekoakt woat, soo saul dit jeschieat un met Wota jespeelt woaren.

²²Aulet Menliche unja de Priesta sellen daut äten; huachheilich es daut.

²³Oba aule Sindopfa, von däm sien Bloot en daut Zelt de Bejäajnunk jebrocht woat, om em Heilichtum Veseenunk to doonen, saul nich jejäten woaren; daut saul met Fia vebrent woaren.