Read De Bibel JHF 3. Mose 9 Bible Online

3. Mose 9 - De Bibel JHF bible

3. Mose 9

¹Un daut passieed aum achten Dach, doa roopt Moses Aaron un siene Säns un de Eltestasch Israels;

²un hee säd to Aaron: Nemm die een junget Kaulf toom Sindopfa un eenen Bock toom Brauntopfa, onen Fäla, un brinj dee ver däm Harn,

³un to de Kjinja Israel saust du räden un sajen: Nämt eenen Kosenbock toom Sindopfa un een Kaulf un een Laum, eenjoasche, onen Fäla, toom Brauntopfa;

⁴un eenen Boll un eenen Bock toom Dankopfa, om dee ver däm Harn too opfren; un een Speisopfa, vemischt met Eelj; dan vondoag woat junt Gott erschienen.

⁵Un see brochten waut Moses befoolen haud, ver däm Zelt de Bejäajnunk, un de gaunze Jemeent kaum noda un stunt ver däm Harn.

⁶Un Moses säd: Dit es et, waut de Har befoolen haud, daut jie doonen sellen; un de Harlichkjeit Gottes woat junt erschienen.

⁷Un Moses säd to Aaron: Go han nom Aultoa, un opfa dien Sindopfa un een Brauntopfa, un doo Veseenunk fa die un fa daut Volkj; un opfa de Opfagow vom Volkj un doo Veseenunk fa an, soo aus de Har befoolen haft.

⁸Un Aaron kaum nom Aultoa un schlacht daut Sindopfa Kaulf, daut fa am wia.

⁹Un Aaron siene Säns brochten am daut Bloot; un hee duckt sienen Finja en daut Bloot un deed doavon aun de Aultoa Hieena, un hee goot daut Bloot aun däm Foot von Aultoa.

¹⁰Un daut Fat un de Nieren un daut Nat un de Läwa vom Sindopfa rieekjad hee oppem Aultoa, soo aus de Har Moses befoolen haud.

¹¹Un daut Fleesch un de Hut vebrend hee met Fia butrem Loaga.

¹²Un hee schlacht daut Brauntopfa; un Aaron siene Säns brochten am daut Bloot, un hee spretst daut runtom aun däm Aultoa.

¹³Un daut Brauntopfa brochten see am, en siene Stekja veschnäden un däm Kopp, un hee rieekjad daut opp däm Aultoa.

¹⁴Un hee wosch daut Ennaliche un de Schinkjes un rieekjad dee opp däm Brauntopfa, opp däm Aultoa.

¹⁵Un hee brocht de Opfagow vom Volkj un naum däm Enweibock, dee fa daut Volkj wia, un schlacht am un opfad am aus Sindopfa, aus daut von verhäa.

¹⁶Un hee brocht doatoo daut Brauntopfa un opfad daut no de Väaschreft.

¹⁷Un hee brocht doatoo daut Speisopfa un feld siene Henj doavon un rieekjad daut opp däm Aultoa, butrem Zemorjes-Brauntopfa.

¹⁸Un hee schlacht däm Boll un däm Bock, daut Dankopfa, daut fa daut Volkj wia. Un Aaron siene Säns brochten am daut Bloot, un hee spretst daut runtom däm Aultoa;

¹⁹Un de Stekja Fat vom Boll; un vom Bock däm Fatschwauns, un daut et Ennaliche bedakjt un de Nieren un daut Läwa Nat;

²⁰un see läden de Fatstekja opp de Broststekja, un hee rieekjad de Fatstekja opp däm Aultoa.

²¹Un de Broststekja un däm rajchten Schinkje schwinjd Aaron aus een Wäwopfa ver däm Harn, soo aus Moses befoolen haud.

²²Un Aaron hoof siene Henj jäajen daut Volkj un säajend an; un hee jinkj rauf no de Opfagow däm Sindopfa un däm Brauntopfa un däm Dankopfa.

²³Un Moses un Aaron jinjen en daut Zelt de Bejäajnunk nenn; un see kaumen rut un säajende daut Volkj. Un de Harlichkjeit Gottes erschien däm gaunzen Volkj;

²⁴un daut jinkj Fia ut von Gott un vebrend daut Brauntopfa opp däm Aultoa un de Fatstekja; un daut gaunze Volkj sach daut, un see jubelde un follen opp äa Aunjesecht.