Read De Bibel JHF Jeremia 12 Bible Online

Jeremia 12 - De Bibel JHF bible

Jeremia 12

¹Du best jerajcht, Har, wan ekj met die rechten well; doch äwa diene Uadeelen mucht ekj met die räden: Wuarom es de Wajch de Gottloose jlekjlich, sent aula secha, dee Truloosichkjeit eewen?

²Du hast an jeplaunt, see ha uk Wartlen jeschloagen; see komen veraun, droagen uk Frucht. Du best dichtbie aun äarem Mul, doch wiet auf von äare Nieren.

³Oba du, Har, du kjanst mie, du sitst mie un proofst mien Hoat die jäajenäwa. Riet an wajch aus Schop toom schlachten, un heilj (aufsondre) an fa däm Warjdach!

⁴Woo lang saul daut Launt truaren un daut Krut opp däm gaunzen Flekj walkjen? Wäajen de Boosheit siene Bewona sent Vee un Väajel doahan; dan see sajen: Hee woat ons Enj nich seenen.

⁵Wan du met Footjenja ranst, un see die meed muaken, woo wust du dan met Pieed enne Wad ranen? Un wan du opp een Frädenslaunt dien Vetruen satst, woo west du daut dan moaken en de Pracht vom Jordan?

⁶Dan uk diene Breeda un dien Voda Hus, uk see sent ontru jäajen die, uk see roopen die no ut däm vollen Hauls. Jleew an nich, wan see met die frintlich räden.

⁷Ekj ha mien Hus veloten, mien Oawgoot vestat, ekj ha däm Leeflinkj von miene Seel en de Henj siene Fiend jejäft.

⁸Mien Ieejentum es mie aus een Leiw em Woolt jeworden; daut haft siene Stemm jäajen mie erhowen doarom ha ekj daut jehaust.

⁹Es mie mien Ieejentum een bunta Raupvoagel, daut Raupväajel om daut selje omhäa sent? Opp! Vesaumelt aule Tieren vom Flekj, brinjt an toom fräten häa!

¹⁰Väl Hoads ha mienen Wienboajch vedorwen, mien Aka veklunjt; see ha mien kjestlichet Feldstekj to eene drieeje Wieste jemoakt.

¹¹Maun haft daut to eene Wieste jemoakt: Vewiest truat daut om mie häa. Daut gaunze Launt es vewust, wiels daut kjeena too Hoaten nemt.

¹²Äwa aule kole Hechten enne Wieste sent Vewiesta jekomen; dan een Schwieet von däm Harn frat von eenem Enj em Launt bat toom aundren Enj em Launt: Kjeen Fräd aulem Fleesch!

¹³See ha Weit jeseit un Hachels jearnt; see ha sikj meed jemoakt un nuscht utjerecht. Soo woaren too Schaund aun junem Ennkomen ver de Zorngloot Gottes!

¹⁴Soo sajcht de Har äwa aule miene beese Nobasch, dee daut Oawgoot auntauste, daut ekj mien Volkj Israel ha oawen loten: Kjikj, ekj woa an ut äarem Launt rutrieten, un daut Hus Juda woa ekj ut äare Medd rieten.

¹⁵Un daut saul passieren, nodäm ekj an rutjeräten ha, woa ekj mie an wada erboarmen un an trigjbrinjen, eenen jiedren en sien Oawgoot un eenen jiedren en sien Launt.

¹⁶Un daut saul passieren, wan see de Wäaj von mienem Volkj werkjlich lieren, soo daut see bie mienem Nomen schwieren: Soo woa Gott läft! Soo aus see mien Volkj jelieet ha, bie däm Baal too schwieren, soo sellen see enne Medd von mienem Volkj oppjebut woaren.

¹⁷Oba wan see nich hieren, soo woa ekj dee selje Nazion utrieten, utrieten un vetiljen, sajcht de Har.