Read De Bibel JHF Jeremia 16 Bible Online

Jeremia 16 - De Bibel JHF bible

Jeremia 16

¹Un daut Wuat Gottes wia to mie aulsoo:

²Du saust die kjeene Fru nämen, un noch Säns noch Dajchta aun disem Uat habe.

³Dan soo räd de Har äwa de Säns un äwa de Dajchta, dee aun disem Uat jebuaren woaren, un äwa äare Mutta, dee an too Welt brinjt, un äwa äare Vodasch, dee an en disem Uat zeijen:

⁴See sellen aun dootmoakende Krankheiten stoawen, see sellen nich bekloacht noch begroft woaren, to Dinj opp däm Flekj sellen see woaren; un derch Schwieet un derch Hunga sellen see venicht woaren, un äare Doodeskjarpa sellen de Väajel vom Himmel un de Tieren de Ieed too Speise deenen.

⁵Dan soo sajcht de Har: Go nich en een Truahus, un go nich han, om to truaren, un wies an kjeen Metleet; dan ekj ha mienen Fräd von disem Volkj wajchjenomen, sajcht de Har, de Jnod un Erboarmen.

⁶Un Groote un Kjliene woaren en disem Launt stoawen, onen begroft to woaren; un maun woat nich om an truaren, un äatshaulwen sikj nich schnieden un sikj nich kol schäaren.

⁷Un maun woat an nich Broot bräakjen bie de Trua, om irjent wäm too treesten äwa däm Dooden, noch an to drinkjen jäwen ut däm Troostbejcha äwa äaren Voda ooda äare Mutta.

⁸Uk en een Gausthus saust du nich gonen, bie an too setten, om to äten un to drinkjen.

⁹Dan soo sajcht Gott de Häaschoa, de Gott Israels: Kjikj, ekj woa aun disem Uat ver june Uagen un en june Doag opphieren loten de Jubelstemm de Stemm de Freid, de Stemm vom Briegaum un de Stemm de Brut.

¹⁰Un daut saul passieren, wan du disem Volkj aule dise Wieed vekjindjen woascht, un see to die sajen: Wuarom haft de Har aul dit groote Onjlekj äwa ons jerät? Un waut es onse Misdot, un waut onse Sind, dee wie jäajen däm Harn, onsem Gott, begonen ha?

¹¹Soo saust du to an sajen: Doarom, daut june Vodasch mie veloten ha, sajcht de Har, un aundre Jetta nojegonen sent, un an jedeent un sikj ver an doljeboagen, oba mie veloten un mien Jesaz nich jehoolen ha;

¹²un jie daut oaja jedräwen ha aus june Vodasch - un kjikj, jie gonen een jiedra däm Ieejensenn von sienem beesen Hoaten no, soo daut jie nich opp mie hieren: -

¹³Soo woa ekj junt ut disem Launt wajchschliesren en een Launt, daut jie nich kjanen, noch jie noch june Vodasch; un doa woa jie aundre Jetta deenen Dach un Nacht, wiels ekj junt kjeene Jnod schenkje woa.

¹⁴Doarom see, doa komen Doag, sajcht de Har, doa nich mea jesajcht woat: Soo woa Gott läft, dee de Kjinja Israel ut däm Launt Ägipten noppjefieet haft!

¹⁵Sonda: Soo woa Gott läft, dee de Kjinja Israel noppjefieet haft ut däm Launt vom Nuaden un ut aule Lenda, wuahan hee an vejoacht haud! Un ekj woa an en äa Launt trigjbrinjen, daut ekj äare Vodasch jejäft ha.

¹⁶Kjikj, ekj well väl Fescha schekjen, sajcht de Har, daut dee an fesche; un nodäm well ekj väl Jäajasch schekjen, daut dee an joagen von jiedrem Boajch un von jiedrem Aunboaj un ut de Steenretzen.

¹⁷Dan miene Uagen sent opp aul äare Wäaj jerecht; dee sent ver mie nich veborjen, un äare Ojjerajchtichkjeit es nich vestoaken ver miene Uagen.

¹⁸Un ekj well ieescht äare Schult un äare Sinden dobbelt vejelten, wiels see mien Launt met de Doodeskjarpa äare Aufschu veonreinicht un mien Oawgoot met äare Aufschu erfelt ha.

¹⁹Har, miene Krauft un mien Schutz, un miene Tooflucht aum Dach de Bedrenkjnis! No die woaren Nazionen komen von de Enj de Ieed un sajen: Blooss Läajes ha onse Vodasch jeorwen, nuschtje Jetta; un unja an es kjeena, dee waut nuzt.

²⁰Saul een Mensch sikj Jetta moaken, dee doch kjeene Jetta sent?

²¹Doarom kjikj, dit Mol woa ekj an toweeten loten, woa an miene Haunt un miene Macht toweeten loten; un see woaren weeten, daut mien Nomen Gott es.