Read De Bibel JHF Jeremia 18 Bible Online

Jeremia 18 - De Bibel JHF bible

Jeremia 18

¹Daut Wuat, daut von däm Harn aun Jeremia wia, aulsoo:

²Moak die opp un go rauf en daut Hus vom Toppmoaka, un doa woa ekj die miene Wieed hieren loten.

³Un ekj jinkj rauf en daut Hus vom Toppmoaka, un kjikj, hee muak eene Oabeit oppe Dreischiew.

⁴Un daut Jefäss, daut hee ut däm Leem muak, jelung nich en de Haunt vom Toppmoaka; un hee muak wada een aundret Jefäss doarut, aus daut däm Toppmoaka jefoll.

⁵Un daut Wuat Gottes wia to mie aulsoo:

⁶Kaun ekj junt nich soo doonen aus dis Toppmoaka, Hus Israel? Sajcht de Har; kjikj, aus de Leem enne Haunt vom Toppmoaka, soo sent jie en miene Haunt, Hus Israel.

⁷Plazlich räd ekj äwa een Volkj un äwa een Kjennichrikj, daut uttoroden un auftobräakjen un to vedoawen;

⁸kjemt oba jan Volkj, äwa daut ekj jerät ha, von siene Boosheit om, soo lot ekj mie daut Onjlekj leetdonen, daut ekj jedocht am todoonen.

⁹Un een aundret Mol räd ekj äwa een Volkj un äwa een Kjennichrikj, daut to buen un to plaunten;

¹⁰oba deit daut, waut bees es en miene Uagen, soo daut et opp miene Stemm nich hieet, soo lot ekj mie daut Goode leetdonen, daut ekj am jedocht to doonen.

¹¹Un nu räd to de Mana von Juda un to de Bewona von Jerusalem un saj: Soo sajcht de Har: Kjikj, ekj moak een Onjlekj jäajen junt reed un plon jäajen junt eenen Aunschlach; dreit doch om, een jiedra von sienem beesen Wajch, un moakt june Wäaj un june Haundlungen goot.

¹²Oba see sajen: Daut es emsonst; dan wie wellen onse Jedanken nogonen un een jiedra nodäm Ieejensenn en sienem beesen Hoaten doonen.

¹³Doarom, soo sajcht de Har: Froacht doch unjre Nazionen! Wäa haft soowaut jehieet? Schudahauftet haft de Junkfru Israel jedonen.

¹⁴Velat uk de Schnee vom Libanon däm Fels oppem Flekj? Ooda veschwinjen wiethäa komenden, kolde, framde Wota?

¹⁵Dan mien Volkj haft mie vejäten, see rieekjren dän nuschtjen Jetzen; un dise ha an enjstlich jemoakt opp äare Wäaj, däm Stich de oole Tieden, om Stiej too gonen, eenen Wajch, dee nich jebont es,

¹⁶doamet see äa Launt toom Entsatze moaken, too eewjen Spott: Jiedra, dee aun däm vebiejeit, woat sikj vewundren un däm Kopp schedren.

¹⁷Aus de Oostwint woa ekj an ver däm Fiend vestreien; met däm Rigjen un nich met däm Aunjesecht woa ekj an aunkjikjen aun äarem Vedoawnisdach.

¹⁸Doa säden see: Komt un lot ons Aunschläaj jäajen Jeremia plonen; dan däm Priesta jeit daut Jesaz nich veloaren noch de Rot däm Weisen un daut Wuat däm Profeet. Komt un lot ons am met de Tung schlonen un nich oppmoakjen opp aul siene Wieed!

¹⁹Moakj du, Har, opp mie, un hia de Stemm von miene Jäajna!

²⁰Saul Beeset fa Goodet vejelt woaren? Dan see ha miene Seel eene Kul jegroft. Jedenkj, daut ekj ver die jestonen ha, Goodet äwa an to räden, om dienen Jrim von an auftodreien.

²¹Doarom äwajeff äare Kjinja däm Hunga, un jeff an daut Schwieet han, doamet äare Frues kjinjaloos un Wätfrues woaren, un äare Mana vom Doot jewarjcht, äare Jinjlinje vom Schwieet em Kjrich jeschloagen woaren.

²²Daut schault een Jeschrecht ut äare Hiesa, wan du plazlich Kjrichshäa äwa an brinjst; dan see ha eene Kul jegroft, om mie too jriepen, un miene Feet ha see heimlich Schlenjen jelajcht.

²³Un du, Har, du kjanst aule äare Mordaunschläaj jäajen mie; vezei nich äare Misdot, un tilj äare Sinden nich ut ver dienem Aunjesecht, sonda lot an doljestrakjt ver die ligjen; too Tiet en dienem Oaja haundel met an!