Read De Bibel JHF Jeremia 19 Bible Online

Jeremia 19 - De Bibel JHF bible

Jeremia 19

¹Soo säd de Har: Go un kjeep eene ieedne Kruck, un nemm met die von de Eltestasch ut däm Volkj un von de Eltestasch de Priesta;

²un go rut en daut Tol vom Sän Hinnom, dee ver däm Engank vom Schoawel Dooa licht, un roop doa de Wieed ut, dee ekj to die räden woa,

³un saj: Hieet daut Wuat Gottes, jie Kjennichs von Juda un jie Bewona von Jerusalem! Soo sajcht Gott de Häaschoa, de Gott Israels: Kjikj, ekj brinj Onjlekj äwa disem Uat, daut eenem jiedren, dee daut hieet, siene Uaren kjliene woaren.

⁴Doarom, daut see mie veloten un disem Uat missacht un aun am aundre Jetta jerieekjat ha, dee see nich kjanen, noch see noch äare Vodasch noch de Kjennichs von Juda, un disem Uat met onschuldjen Bloot jefällt ha,

⁵un de Hechten vom Baal jebut, om äare Kjinja aus Brauntopfa fa däm Baal em Fia too vebrennen, waut ekj nich jeboot noch jerät ha un mie nich en däm Senn jekomen es:

⁶Doarom kjikj, doa komen Doag, sajcht de Har, doa dis Uat nich mea Tofet noch Tol vom Sän Hinnom, sonda Warjdol jenant woaren woat.

⁷Un ekj woa däm Rot von Juda un Jerusalem aun disem Uat ladich moaken, un woa an derch daut Schwieet ver äare Fiend faulen loten un derch dee äare Haunt, dee no äarem Läwen trachten; un ekj woa äare Doodeskjarpa de Väajel vom Himmel un de Tieren de Ieed too Speise jäwen.

⁸Un ekj woa dise Staut toom Entsaten un toom Spott moaken: Jiedra, dee aun ar vebie jeit, woat sikj wundren un spotten äwa aule äare Ploagen.

⁹Un ekj woa an daut Fleesch von äare Säns un daut Fleesch von äare Dajchta äten loten, un see sellen eena däm aundren sien Fleesch äten en de Beloagrunk un en de Bedrenkjnis, met waut äare Fiend un dee no äarem Läwen trachten, an bedrenjen woaren.

¹⁰Un du saust de Kruck vebräakjen ver de Uagen de Mana, dee met die jegonen sent,

¹¹un to an sajen: Soo sajcht Gott de Häaschoa: Aulsoo woa ekj dit Volkj un dise Staut veschmatre, aus maun een Leemjefäss veschmatat, daut nich wada häajestalt woaren kaun. Un maun woat em Tofet begrowen, ut Mangel aun Rum too begrowen.

¹²Aulsoo woa ekj disem Uat doonen, sajcht de Har, un siene Bewona, om dise Staut däm Tofet jlikj too moaken.

¹³Un de Hiesa von Jerusalem un de Hiesa de Kjennichs von Juda sellen onrein woaren aus de Uat Tofet: Aule Hiesa, opp dee äare Däakja see däm gaunzen Himmelshäa jerieekjat un aundre Jetta Drinkjopfa jespendet ha.

¹⁴Un Jeremia kaum vom Tofet, wuahan de Har am jeschekjt haud to profezeien, un hee jinkj en däm Väahoff vom Hus Gottes un säd to däm gaunzen Volkj:

¹⁵Soo sajcht Gott de Häaschoa, de Gott Israels: Kjikj, ekj well äwa dise Staut un äwa aule äare Städa aul dit Onjlekj brinjen, daut ekj äwa an jerät ha; dan see ha äa Jenekj hoat jemoakt, om miene Wieed nich to hieren.