Read De Bibel JHF Jeremia 20 Bible Online

Jeremia 20 - De Bibel JHF bible

Jeremia 20

¹Un aus Paschhur, de Sän Immer, de Priesta (hee wia Bowaschta Oppsechta em Hus Gottes), Jeremia dise Wieed profezeien hieed,

²doa schluach Paschhur däm Profeet Jeremia, un läd am en Faslen em bowaschten Dooa Benjamin, daut em Hus Gottes es.

³Un daut passieed aum näakjsten Dach, aus Paschhur Jeremia ut de Faslen rutbrinjen leet, doa säd Jeremia to am: Nich Paschhur (Erleesunk) nant de Har dien Nomen, sonda Magor-Missabib (Schrakj).

⁴Dan soo sajcht de Har: Kjikj, ekj moak die toom Schrakj, die selfst un aule diene Frind; un see sellen derch de Fiend äa Schwieet faulen, endäm diene Uagen daut seenen; un ekj woa gaunz Juda en de Haunt däm Kjennich von Babel jäwen, doamet hee an no Babel wajchfieet un an metem Schwieet schleit.

⁵Un ekj woa däm gaunzen Rikjtum von dise Staut doahan jäwen un aul äa Jewenst un aul äa Kostboaret: Un aulem Schauz de Kjennichs von Juda woa ekj en de Haunt äare Fiend jäwen; un see woaren an plindre un wajchnämen un no Babel brinjen.

⁶Un du, Paschhur, un aule Bewona en dienem Hus, jie woaren en de Jefangenschoft gonen; un du woascht no Babel komen un doa stoawen un doa begroft woaren, du un aule diene Frind, dän du faulsch profezeit hast.

⁷Har, du hast mie beräd, un ha mie beräden loten; du hast mie stoakj jemoakt un äwawaultijt. Ekj sie däm gaunzen Dach toom Spott jeworden, jiedra spott äwa mie.

⁸Dan soo foaken ekj räd, mott ekj schrieen, Jewault un Unjadrekjunk roopen; dan daut Wuat Gottes es mie too Veachtunk un toom Spott jeworden däm gaunzen Dach.

⁹Un ekj säd: Ekj well aun am nich mea denkjen, noch en sienem Nomen räden, soo es daut en mienem Hoaten aus brennendet Fia; en miene Knoakes enjeschloten; un ekj woa meed, daut uttohoolen, un kaun daut nich.

¹⁰Dan ekj ha de Vespottung von väle jehieet, runtom es Schrakj: «Kloagt aun, soo well wie am aunkloagen!» Aule miene Frind luaren opp mienem Faul: «Veleicht lat hee sikj beräden, soo daut wie am äwawaultjen un ons aun am rajche kjennen.»

¹¹Oba de Har es met mie aus een stoakja Held, doarom woaren miene Vefolja Angst haben un nich de Bowahaunt ha; see woaren sea beschämt woaren, wiels daut an nich jelunge es: Eene eewje Schaund, de nich woat vejäten woaren.

¹²Un du, Gott de Häaschoa, dee du däm Jerajchten proofst, Nieren un Hoat sitst, lot mie diene Rach aun an seenen; dan die ha ekj miene Rajchtsach aunvetrut.

¹³Sinjt däm Harn, veharlicht Gott! Dan hee haft de Seel de Oame jerat ut de Haunt de Iebel doonende.

¹⁴Veflucht es de Dach, aun däm ekj jebuaren wort; de Dach, doa miene Mutta mie too Welt brocht, saul nich jesäajent sennen!

¹⁵Veflucht es de Maun, dee mienem Voda de frooe Bootschoft brocht un säd: «Een menlichet Kjint es die jebuaren», un dee am sea froo muak!

¹⁶Un jiedra Maun woat aus de Städa, dee de Har trigjjedreit haft, onen daut et am leet deed; un hee hieet Zemorjes een Jeschrecht un Kjrichsjeschrech aum Meddach:

¹⁷Wiels hee mie nich doot muak em Muttalief, soo daut miene Mutta mie toom Grauf jeworden un äa Lief eewich schwanga jebläwen wia!

¹⁸Wuarom sie ekj doch ut däm Muttalief väajekomen, om Mieej un Kumma to seenen, un daut miene Doag en Schaund vejinje?