Read De Bibel JHF Jeremia 24 Bible Online

Jeremia 24 - De Bibel JHF bible

Jeremia 24

¹De Har leet mie seenen, - un kjikj, twee Kjarw Fiejen wieren ver däm Tempel Gottes oppjestalt - nodäm Nebukadnezar, de Kjennich von Babel, Jechonja, däm Sän Jojakim, dän Kjennich von Juda un de Ferschten von Juda un de Kjensla un de Schlässa (Schmetts) ut Jerusalem wajchjefieet un an no Babel jebrocht haud.

²En däm eenen Korf wieren sea goode Fiejen, aus de tiedje Fiejen; un en däm aundren Korf wieren sea schlajchte Fiejen, dee maun fa Schlajchtichkjeit nich äten kunn.

³Un de Har säd to mie: Waut sitst du, Jeremia? Un ekj säd: Fiejen; de goode Fiejen sent sea goot, un de schlajchte sea schlajcht, soo daut see fa Schlajchtichkjeit nich kjennen jejäten woaren.

⁴Un daut Wuat Gottes wia to mie aulsoo:

⁵Soo sajcht de Har, de Gott Israels: Aus dise goode Fiejen, aulsoo woa ekj de Wajchjefieede von Juda, dee ekj von disem Uat en daut Launt de Chaldäa wajchjeschekjt ha, aunseenen toom Gooden.

⁶Un ekj woa mien Uag opp an rechten toom Gooden un an en dit Launt trigjbrinjen; un ekj woa an buen un nich aufbräakjen, un an plaunten un nich utrieten.

⁷Un ekj well an een Hoat jäwen, mie too erkjanen, daut ekj de Har sie; un see woaren mien Volkj, un ekj woa äa Gott sennen; dan see woaren met äarem gaunzen Hoaten no mie omdreien.

⁸Un aus de schlajchte Fiejen, dee fa Schlajchtichkjeit nich to äten jinjen: Jo, soo sajcht de Har, aulsoo woa ekj Zedekia, däm Kjennich von Juda, moaken, un siene Ferschten un de Äwajebläwne von Jerusalem, dee en disem Launt Äwajebläwne un dee em Launt Ägipten Wonende.

⁹Un ekj woa an toom Meshaundlen, toom Onjlekj hanjäwen aun aule Kjennichrikjs de Ieed, toom Misachten un toom Sprechwuat, too Spott un toom Fluch aun aule Uaten, wuahan ekj an vejoagen woa.

¹⁰Un ekj woa daut Schwieet, dän Hunga un de Past unja an schekjen, bat see oppjeräwen sent ut däm Launt, daut ekj an un äare Vodasch jejäft ha.