Read De Bibel JHF Jeremia 25 Bible Online

Jeremia 25 - De Bibel JHF bible

Jeremia 25

¹Daut Wuat, daut to Jeremia wia äwa daut gaunze Volkj von Juda, aum vieeden Joa Jojakim, däm Sän von Josia, daut es daut ieeschte Joa Nebukadnezar, dän Kjennich von Babel,

²daut Jeremia, de Profeet, to däm gaunze Volkj von Juda un to aule Bewona von Jerusalem räd, endäm hee säd:

³Vom 13-den Joa Josia, däm Sän Amon, däm Kjennich von Juda, bat opp disem Dach, dise 23 Joa, es daut Wuat Gottes to mie jewast; un ekj ha to junt jerät, muak mie tiedich opp un räd, oba jie hieeden nich.

⁴Un de Har haft aule siene Kjnajchts, de Profeeten, emma wada no junt jeschekjt; oba jie hieeden nich un neijen june Uaren nich, om to hieren.

⁵Un hee säd: Dreit doch om, een jiedra von sienem beesen Wajch un von de Boosheit en june Haundlungen, soo sell jie en däm Launt, daut de Har junt un june Vodasch jejäft haft, wonen von Eewichkjeit too Eewichkjeit.

⁶Un waundelt nich aundre Jetta no, om an to deenen un junt ver an doltobekjen; un reizt mie nich derch daut Woakj june Henj, daut ekj junt nich Iebel doo.

⁷Oba jie ha nich opp mie jehieet, sajcht de Har, om mie derch daut Woakj von june Henj too reizen, junt toom Onjlekj.

⁸Doarom, soo sajcht Gott de Häaschoa: Wiels jie opp miene Wieed nich jehieet ha,

⁹kjikj, soo schekj ekj han un hol aule Jeschlajchta vom Nuaden, sajcht de Har, un schekj no Nebukadnezar, däm Kjennich von Babel, mienem Kjnajcht, un brinj an äwa daut Launt un äwa siene Bewona un äwa aul dise Nazionen runtom; un ekj well an vetiljen un an toom Entsaten moaken un toom Spott un to eewje Wieste.

¹⁰Un ekj well unja an opphieren loten de Jubelstemm un Freidensstemm, de Stemm vom Briegaum un de Stemm de Brut, daut jeruzh vonne Mäl un daut Laumpenlicht.

¹¹Un dit gaunze Launt woat too eene Wieste, too Wieste woaren; un dise Nazionen woaren däm Kjennich von Babel deenen 70 Joa.

¹²Un daut woat passieren, wan 70 Joa voll sent, woa ekj aun däm Kjennich von Babel un aun janem Volkj, sajcht de Har, äare Schult bestrofen, un aun däm Launt de Chaldäa; un ekj woa daut to eewje Wieste moaken.

¹³Un ekj woa äwa jan Launt aule miene Wieed brinjen, dee ekj äwa an jerät ha: Aules, waut en disem Buak jeschräwen steit, waut Jeremia profezeit haft äwa aule Nazionen.

¹⁴Dan väle Nazionen un groote Kjennichs woaren uk see deenstboa moaken; un ekj woa an no äarem Doonen un nodäm Woakj von äare Henj vejelten.

¹⁵Dan soo haft de Har, dee Gott Israels, to mie jerät: Nemm dis Kuffel Zornwien ut miene Haunt, un jeff däm to drinkjen aul de Nazionen, no dee ekj die schekj;

¹⁶doamet see drinkjen, un tomlen un rose wäajen daut Schwieet, daut ekj äwa an schekj.

¹⁷Un ekj naum daut Kuffel ut de Haunt Gottes un leet drinkjen aule Nazionen, no dee de Har mie jeschekjt haud:

¹⁸Jerusalem un de Städa von Juda, un äare Kjennichs, äare Ferschten, om an too vewuste, toom Entsaten, toom Spott un toom Fluch too moaken, aus daut aun dise Doag es;

¹⁹däm Farao, däm Kjennich von Ägipten, un siene Kjnajchts un siene Ferschten un sien gaunzet Volkj,

²⁰un aule jemischte Velkja, un aule Kjennichs vom Launt Uz; un aule Kjennichs vom Launt de Filista, un Askalon un Gasa un Ekron un de Äwajebläwne von Aschdod;

²¹Edom un Moab un de Kjinja Amon;

²²un aule Kjennichs von Tierus un aule Kjennichs von Sidon; un de Kjennichs de Inslen, dee jantsied vom Mäa sent;

²³Dedan un Tema un Bus, un aule met jeschoarne Hoa;

²⁴un aule Kjennichs von Arabien un aule Kjennichs de jemischte Velkja, dee en de Wieste wonen;

²⁵un aule Kjennichs von Simri un aule Kjennichs von Elam un aule Kjennichs von Medien;

²⁶un aule Kjennichs vom Nuaden, dee von dicht un dee von wiet, dan eenem nodäm aundren; un aule Kjennichrikjs de Ieed, dee opp de gaunze Ieed sent. Un de Kjennich von Sesach saul no an drinkjen.

²⁷Un saj to an: Soo sajcht Gott de Häaschoa, de Gott Israels: Drinkjt, un woat bedrunken un spiet ut, un faul un sto nich wada opp wäajen daut Schwieet, daut ekj unja junt schekj.

²⁸Un daut saul passieren, wan see sikj wäaren, daut Kuffel ut diene Haunt too nämen, om to drinkjen, soo saust du to an sajen: Aulsoo sajcht Gott de Häaschoa: Jie sellen drinkjen.

²⁹Dan kjikj, aun de Staut, dee no mienem Nomen jenant es, fang ekj aun Ieblet to doonen, un jie sellen nich onbestroft bliewen? Jie woaren nich onbestroft bliewen; dan ekj roop daut Schwieet äwa de Bewona de Ieed, sajcht Gott de Häaschoa.

³⁰Un du, profezei an aul dise Wieed un saj to an: De Har woat von Bowen brelle un siene Stemm schaule loten ut siene heilje Wonunk; hee woat brelle jäajen siene Wonstäd, eenen luden Roop schaule loten, aus de Wienprasa, jäajen aule Bewona de Ieed.

³¹Een Jetees drinjt bat aun daut Enj de Ieed, dan de Har recht met de Nazionen, hee helt Jerecht met aulem Fleesch; de Gottloose jeft hee daut Schwieet han, sajcht de Har.

³²Soo sajcht Gott de Häaschoa: Kjikj, Onjlekj jeit ut von Nazion too Nazion, un een jewaultja Storm moakt sikj opp vom Enj de Ieed.

³³Un de Jeschloagne Gottes woaren aun janem Dach ligjen von eenem Enj de Ieed bat toom aundren Enj de Ieed; see woaren nich bekloacht un nich jesaumelt noch begroft woaren; too Dinj opp de Ieed sellen see woaren.

³⁴Hielt, jie Hoads, un schriet! Un sält junt enne Ausch, jie Harliche de Häad! Dan june Doag sent erfelt, om jeschlacht to woaren; un ekj vestrei junt, daut jie hanfaule woaren aus een Kostboaret Jefäss.

³⁵Un de Tooflucht es fa de Hoads veloaren, un daut Wajchranen de Väastona de Häad.

³⁶Horch! De Hoads schrieen, un hielende Väastona (de Harliche) de Häad; dan de Har vewust äare Weid.

³⁷Un de frädliche Weidstapen woaren vewust ver de Zorngloot Gottes.

³⁸Aus een junga Leiw haft hee sien Vestäakj veloten; dan äa Launt es to eene Wieste jeworden ver däm grausomen Schwieet un ver siene Zorngloot.