Read De Bibel JHF Jeremia 26 Bible Online

Jeremia 26 - De Bibel JHF bible

Jeremia 26

¹Aum Aunfank de Rejierunk von Jojakim, däm Sän Josia, däm Kjennich von Juda, wia dit Wuat von däm Harn aulsoo:

²Soo sajcht de Har: Stal die opp däm Väahoff vom Hus Gottes un to aule Städa Juda, dee doa komen, om auntobäden em Hus Gottes, räd aul de Wieed, dee ekj die befoolen ha, to an to räden; doo kjeen Wuat doavon auf.

³Veleicht woaren see hieren un een jiedra von sienem beesen Wajch omdreien: Soo woa ekj mie daut Iebel leet doonen loten, daut ekj an to doonen jedenkj wäajen de Boosheit äare Haundlungen.

⁴Un saj to an: Soo sajcht de Har: Wan jie nich opp mie hieren, daut jie en mienem Jesaz waundlen, daut ekj junt väajelajcht ha,

⁵daut jie opp dee Wieed von miene Kjnajchts, de Profeeten, hieren, dee ekj no junt schekj, emma wada schekjt, (oba jie ha nich jehieet):

⁶Soo well ekj dit Hus aus Silo moaken, un dise Staut woa ekj toom Fluch aule Nazionen de Ieed moaken.

⁷Un de Priesta un de Profeeten un aulet Volkj hieeden Jeremia dise Wieed em Hus Gottes räden.

⁸Un daut passieed, aus Jeremia aules too Enj jerät, waut de Har jeboden haud, toom gaunzen Volkj to räden, doa pakten am de Priesta un de Profeeten un daut gaunze Volkj un säden: Du motst jewess stoawen.

⁹Wuarom hast du em Nomen Gottes profezeit un jesajcht: Dit Hus woat aus Silo woaren, un dise Staut vewuste, onen Bewona? Un aulet Volkj vesaumeld sikj jäajen Jeremia em Hus Gottes.

¹⁰Un aus de Ferschten von Juda dise Wieed hieeden, jinjen see ut däm Kjennichshus nopp nom Hus Gottes un saden sikj en de Däa vom nieen Dooa Gottes.

¹¹Un de Priesta un de Profeeten räden to de Ferschten un to aulem Volkj un säden: Dis Maun haft däm Doot vedeent, dan hee haft jäajen dise Staut profezeit, aus jie met june Uaren jehieet ha.

¹²Un Jeremia räd to de Ferschten un to aulem Volkj un säd: De Har haft mie jeschekjt, om jäajen dit Hus un jäajen dise Staut aul de Wieed too profezeien, dee jie jehieet ha.

¹³Un nu moakt june Wäaj un june Haundlungen goot, un hieet opp de Stemm Gottes, junem Gott: Soo woat de Har sikj daut Iebel leet doonen loten, daut hee äwa junt jerät haft.

¹⁴Oba ekj, kjikj, ekj sie en june Haunt; moakt met mie, aus daut goot un aus daut rajcht es en june Uagen.

¹⁵Doch sell jie weeten, daut jie, wan jie mie dootmoaken, onschuldjet Bloot opp junt brinjen woaren un opp dise Staut un opp äare Bewona; dan en Woarheit, de Har haft mie no junt jeschekjt, om aule dise Wieed ver june Uaren to räden.

¹⁶Un de Ferschten un daut Volkj säden to de Priesta un to de Profeeten: Dis Maun es nich däm Doot schuldich; dan hee haft em Nomen Gottes, onsem Gott, too ons jerät.

¹⁷Un daut erhoowen sikj Mana von de Eltestasch em Launt, un see räden to de gaunze Volkjsmenj un säden:

¹⁸Micha, de Moraschita, haft aun de Doag Hiskia, däm Kjennich von Juda, profezeit un toom Volkj von Juda jerät un jesajcht: Soo sajcht Gott de Häaschoa: «Zion woat aus een Aka jeplieecht woaren, un Jerusalem woat een Trimmahupen (Steenahupen, Steenaklompen) un de Tempel Boajch toom bewossnen Aunboajch».

¹⁹Haft dan Hiskia, de Kjennich von Juda, un gaunz Juda am omjebrocht? Haft hee nich däm Harn jefercht un däm Harn jebedd, soo daut de Har sikj daut Iebel leet woaren leet? Un wie wellen soo een grootet Iebel jäajen onse Seelen begonen!

²⁰Un daut wia uk een Maun, dee em Nomen Gottes profezeid, Uria, de Sän Schemaja, ut Kirjat-Jearim; un dee profezeid jäajen dise Staut un jäajen dit Launt no aule Wieed von Jeremia.

²¹Un aus de Kjennich Jojakim un aule siene Helden un aule Ferschten siene Wieed hieeden, socht de Kjennich am omtobrinjen. Un aus Uria daut hieed, fercht hee sikj un rant wajch, un hee kjeem no Ägipten.

²²Doa schekjt de Kjennich Jojakim Mana no Ägipten, Elnatan, däm Sän Akbor, un Mana met am no Ägipten.

²³Un see brochten Uria ut Ägipten un fieeden am nom Kjennich Jojakim; un hee schluach am met daut Schwieet un schmeet sienen Doodeskjarpa opp de Jräwa de Kjinja vom Volkj.

²⁴Doch Achikams Haunt, vom Sän Schafan, wia met Jeremia, daut maun am nich däm Volkj en de Henj jeef, om am omtobrinjen.