Read De Bibel JHF Jeremia 27 Bible Online

Jeremia 27 - De Bibel JHF bible

Jeremia 27

¹Aum Aunfank de Rejierunk Zedekia, vom Sän Josia, däm Kjennich von Juda, wia dit Wuat to Jeremia von däm Harn aulsoo: —

²Soo säd de Har to mie: Moak die Faslen (Reemes) un een Joch, un laj an om dien Hauls;

³un schekj an aun däm Kjennich von Edom un aun däm Kjennich von Moab un aun däm Kjennich äwa de Kjinja Amon, un aun däm Kjennich von Tierus un aun däm Kjennich von Sidon, derch de Booten, dee no Jerusalem no Zedekia, däm Kjennich von Juda, jekomen sent;

⁴un befäl an, daut see äarem Har sajen: Soo sajcht Gott de Häaschoa, de Gott Israels: Aulsoo sell jie junem Harn sajen:

⁵Ekj ha de Ieed jemoakt, de Menschen un daut Vee, dee oppe Ieed sent, derch miene groote Krauft un derch mienen utjestrakjten Oarm; un ekj jäw ar, wäm ekj well.

⁶Un nu ha ekj dise Lenda en de Haunt Nebukadnezar, däm Kjennich von Babel, mienem Kjnajcht, jejäft; un uk de Tieren oppe Stap ha ekj am jejäft, daut see am deenen.

⁷Un de Nazionen woaren am deenen un sienem Sän un sienem Sän sienen Sän, bat de Tiet uk äwa sien Launt jekomen es, un väl Velkja un groote Kjennichs an aus Deena moaken woaren.

⁸Un daut woat passieren, de Nazion un daut Kjennichrikj, dee am, Nebukadnezar, däm Kjennich von Babel, nich deenen un äa Hauls unja daut Joch däm Kjennich von Babel nich jäwen wellen, dee Nazion, sajcht de Har, woa ekj strofen met daut Schwieet un met däm Hunga un met de Past, bat ekj an derch siene Haunt vetiljd ha.

⁹Un jie, hieet nich opp june Profeeten un opp june Woasaja un opp june Dreema un opp june Zaubra un opp june Beschwäara, dee to junt sajen: Jie woaren däm Kjennich von Babel nich deenen.

¹⁰Dan see profezeien junt Läajes, om junt ut junem Launt to brinjen, un doamet ekj junt vejoag un jie omkomen.

¹¹Oba de Nazion, dee äa Hauls unja daut Joch vom Kjennich von Babel brinjt un am deenen woat, dee woa ekj en äarem Launt loten, sajcht de Har; un see woaren daut bebuen un doa wonen.

¹²Un ekj räd too Zedekia, däm Kjennich von Juda, no aul dise Wieed un säd: Brinjt june Halsa unja daut Joch vom Kjennich von Babel un deent am un sienem Volkj, soo woa jie läwen.

¹³Wuarom well jie, du un dien Volkj, derch daut Schwieet, derch däm Hunga un derch de Past stoawen, aus de Har äwa de Nazion jerät haft, dee däm Kjennich von Babel nich deenen well?

¹⁴Un hieet nich opp de Wieed de Profeeten, dee to junt räden un sajen: Jie woaren däm Kjennich von Babel nich deenen; dan see profezeien junt Läajes.

¹⁵Dan ekj ha an nich jeschekjt, sajcht de Har, un see profezeien faulsch en mienem Nomen, doamet ekj junt vejoag un jie omkomen, jie un de Profeeten, dee junt profezeien.

¹⁶Un ekj räd to de Priesta un to disem gaunzen Volkj un säd: Soo sajcht de Har: Hieet nich opp de Wieed von june Profeeten, dee junt profezeien un sajen: Kjikj, daut Jereetschoft vom Hus Gottes woaren nu boolt ut Babel trigj jebrocht woaren; dan see profezeien junt Läajes.

¹⁷Hieet nich opp an; deent däm Kjennich von Babel, soo woa jie läwen; wuarom saul dise Staut too eene Wieste woaren?

¹⁸Oba wan see Profeeten sent, un wan daut Wuat Gottes bie an es, soo muchten see doch bie Gott de Häaschoa bedden, doamet daut Jereetschoft, daut em Hus Gottes un em Kjennichshus von Juda un en Jerusalem äwajebläwen sent, nich no Babel komen.

¹⁹Dan soo sajcht Gott de Häaschoa von de Stendasch un von daut Mäa un von de Jestalen un von däm äwajen Jereetschoft, daut en dise Staut äwajebläwen es,

²⁰dee Nebukadnezar, de Kjennich von Babel, nich wajchjenomen haft, aus hee Jechonja, däm Sän Jojakim, däm Kjennich von Juda, met aule Adelje von Juda un Jerusalem, von Jerusalem no Babel wajchfieed —

²¹dan soo sajcht Gott de Häaschoa, de Gott Israels, von däm Jereetschoft, daut em Hus Gottes un em Kjennichshus von Juda un en Jerusalem äwajebläwen sent:

²²See sellen no Babel jebrocht woaren, un sellen doa sennen bat aun däm Dach, doa ekj no an kjikjen woa, sajcht de Har, un ekj an noppfieren woa un an aun disem Uat trigjbrinj.