Read De Bibel JHF Jeremia 28 Bible Online

Jeremia 28 - De Bibel JHF bible

Jeremia 28

¹Un daut passieed aun däm seljen Joa, aum Aunfank de Rejierunk Zedekia, däm Kjennich von Juda, aum vieeden Joa, aum feften Moonat, doa räd to mie Hananja, de Sän Assur, de Profeet, dee von Gibeon wia, em Hus Gottes ver de Uagen de Priesta un aulet Volkj, un säd:

²Soo sajcht Gott de Häaschoa, de Gott Israels, un sajcht: Ekj vebräakj daut Joch vom Kjennich von Babel.

³En twee Joa woa ekj aulet Jereetschoft vom Hus Gottes aun disem Uat trigjbrinjen, daut Nebukadnezar, de Kjennich von Babel, von disem Uat wajchjefieet un no Babel jebrocht haft.

⁴Un Jechonja, däm Sän Jojakim, däm Kjennich von Juda, un aule Wajchjefieede von Juda, dee no Babel jekomen sent woa ekj aun disem Uat trigj brinjen, sajcht de Har; dan ekj woa daut Joch vom Kjennich von Babel vebräakjen.

⁵Doa säd de Profeet Jeremia to däm Profeet Hananja ver de Uagen de Priesta un ver de Uagen von aulem Volkj, daut em Hus Gottes stunt;

⁶un de Profeet Jeremia säd: Amen, Har doo aulsoo! De Har bestädicht diene Wieed, dee du profezeit hast, daut hee daut Jereetschoft vom Hus Gottes un aule Wajchjefieede von Babel aun disem Uat trigjbrinjt!

⁷Blooss hia doch dit Wuat, daut ekj ver diene Uaren un ver de Uaren von aulem Volkj räd:

⁸De Profeeten, dee von oole Tieden häa ver mie jewast sent, see ha uk äwa väl Lenda un äwa groote Kjennichrikjs profezeit von Kjrich un von Onjlekj un von Past.

⁹Dee Profeet, dee von Fräd profezeit, woat, wan daut Wuat de Profezeiunk enntraft, woat aus een Profeet erkjant, daut de Har am en Woarheit jeschekjt haft.

¹⁰Un Hananja, de Profeet, naum daut Joch vom Profeet Jeremia sien Hauls un vebruak daut.

¹¹Un Hananja räd ver de Uagen vom gaunzen Volkj un säd: Soo sajcht de Har: Soo woa ekj en twee Joa daut Joch Nebukadnezar, däm Kjennich von Babel, vebräakjen vom Hauls aule Nazionen. Un de Profeet Jeremia jinkj sien Wajch.

¹²Un daut Wuat Gottes wia too Jeremia, nodäm de Profeet Hananja daut Joch vom Profeet Jeremia sien Hauls vebroaken haud, aulsoo:

¹³Go un räd too Hananja un saj: Soo sajcht de Har: Du hast daut heltane Joch vebroaken, oba aun äare Städ een iesanet Joch jemoakt.

¹⁴Dan soo sajcht Gott de Häaschoa, de Gott Israels: Een iesanet Joch ha ekj opp däm Hauls aule Nazionen jelajcht, doamet see Nebukadnezar, däm Kjennich von Babel, deenen, un see woaren am deenen; un uk de Tieren oppe Stap ha ekj am jejäft.

¹⁵Un de Profeet Jeremia räd toom Profeet Hananja: Hea doch, Hananja! De Har haft die nich jeschekjt, sonda du hast dit Volkj opp Läajes vetruen loten.

¹⁶Doarom, soo sajcht de Har: Kjikj, ekj schmiet die vom Ieedboddem wajch; dit Joa woascht du stoawen; dan du hast jäajen däm Harn jerät.

¹⁷Un de Profeet Hananja storf aun däm seljen Joa, aum säwenden Moonat.