Read De Bibel JHF Jeremia 29 Bible Online

Jeremia 29 - De Bibel JHF bible

Jeremia 29

¹Un dit sent de Wieed vom Breef, dee de Profeet Jeremia von Jerusalem aun de äwajebläwne Eltestasch de Wajchjefieede un aun de Priesta un aun de Profeeten un aun daut gaunze Volkj schekjt, daut Nebukadnezar von Jerusalem no Babel wajchjefieet haud —

²nodäm de Kjennich Jechonja un de Kjennijin, un de Hoffbeaumte, de Ferschten von Juda un Jerusalem, un de Hauntwoakja un de Schlossa ut Jerusalem wajchjegonen wieren,

³derch Elasa, däm Sän Schafan, un Gemarja, däm Sän Hilkija, dee Zedekia, de Kjennich von Juda, no Babel nom Nebukadnezar, däm Kjennich von Babel, schekjt:

⁴Soo sajcht Gott de Häaschoa, de Gott Israels, aun aule Wajchjefieede, dee ekj von Jerusalem no Babel wajchjefieet ha:

⁵But Hiesa un bewont dee, un plaunt Goades un ät äare Frucht.

⁶Nämt Frues un brinjt Säns un Dajchta too Welt, un nämt Frues fa june Säns, un june Dajchta jeft Mana, doamet see Säns un Dajchta jebäaren; un doa vemieet junt, un woat nich weinja.

⁷Un sieekjt Fräd fa de Staut, wuahan ekj junt wajchjefieet ha, un bät fa ar to däm Harn; dan en äarem Fräd woa uk jie Fräd ha.

⁸Dan soo sajcht Gott de Häaschoa, de Gott Israels: Lot junt von june Profeeten, dee en june Medd sent, un von june Woasaja nich teischen; un hieet nich opp äare Dreem, dee jie dreemen.

⁹Dan see profezeien junt faulsch en mienem Nomen; ekj ha an nich jeschekjt, sajcht de Har.

¹⁰Dan soo räd de Har: Sooboolt 70 Joa fa Babel voll sent, woa ekj mie junt aunnämen un mien goodet Wuat aun junt erfellen, junt aun disem Uat trigjtobrinjen.

¹¹Dan ekj weet de Jedanken, dee ekj äwa junt ha, sajcht de Har, Jedanken toom Fräd un nich toom Onjlekj, om junt Utgank un Hopninj to jäwen.

¹²Un jie woaren mie aunroopen un hangonen un mie bedden, un ekj woa opp junt hieren.

¹³Un jie woaren mie sieekjen un finjen, dan jie woaren no mie froagen met junem gaunzem Hoaten;

¹⁴un ekj woa mie von junt finjen loten, sajcht de Har. Un ekj woa june Jefangenschoft dreien un junt saumlen ut aule Nazionen un ut aule Uaten, wuahan ekj junt vestat ha, sajcht de Har; un ekj woa junt aun däm Uat trigjbrinjen, von wua ekj junt wajchjefieet ha.

¹⁵Wan jie sajen: De Har haft ons en Babel Profeeten erwakjt,

¹⁶jo, soo sajcht de Har von däm Kjennich, dee opp David sienen Troon sett, un von däm gaunzen Volkj, daut en de Staut wont, june Breeda, dee nich met junt en de Jefangenschoft jegonen sent, —

¹⁷soo sajcht Gott de Häaschoa: Kjikj, ekj schekj unja an daut Schwieet, däm Hunga un de Past, un well an aus de schlajchte Fiejen moaken, dee fa Schlajchtichkjeit nich kaun jejäten woaren.

¹⁸Un ekj well an met daut Schwieet nojoagen, met däm Hunga un met de Past; un ekj well an aun aule Kjennichrikjs de Ieed to Meshaundlunk hanjäwen, toom Fluch un toom Entsaten un toom Spott un toom Veachten unja de Nazionen, wuahan ekj an vestat ha:

¹⁹Doarom, daut see nich opp miene Wieed jehieet ha, sajcht de Har, met waut ekj miene Kjnajchts, de Profeeten, emma wada no an schekjt. Un uk jie ha nich jehieet, sajcht de Har.

²⁰Oba jie, hieet daut Wuat Gottes, jie Wajchjefieede aule, dee ekj von Jerusalem no Babel wajchjeschekjt ha!

²¹Soo sajcht Gott de Häaschoa, de Gott Israels, von Ahab, däm Sän Kolaja, un von Zedekia, däm Sän Maaseja, dee junt Läajes profezeiden en mienem Nomen: Kjikj, ekj jäw an en de Haunt Nebukadnezar, däm Kjennich von Babel, doamet hee an ver june Uagen dootmoakt.

²²Un von an woat een Fluch entnome woaren von aule Wajchjefieede Juda, dee en Babel sent, soo daut maun sajen woat: De Har moakt die aus Zedekia un aus Ahab, dee de Kjennich von Babel em Fia broode leet!

²³Wiels see en Israel eene Schaund begonen un Ehebruch jedräwen ha, met de Näakjste äare Frues, un en mienem Nomen Läajeswieed jerät ha, waut ekj an nich jeboden ha; un ekj, ekj weet daut un sie Zeij, sajcht de Har. —

²⁴Un too Semaja, däm Nechelamita, saust du räden un sajen:

²⁵Soo sajcht Gott de Häaschoa, de Gott Israels, un sajcht: Wiels du en dienen Nomen Breew jeschekjt hast aun aulet Volkj, daut en Jerusalem es, un aun däm Priesta Zefanja, däm Sän Maaseja, un aun aule Priesta, un jesajcht:

²⁶«De Har haft die toom Priesta jesat enne Städ däm Priesta Jojada, doamet Oppsechta em Hus Gottes sent — betrafs jiedrem Rosenden un Profezeienden, doamet du am en däm Stock un en de Faslen lajst.

²⁷Un nu, wuarom hast du Jeremia, däm Anatotita, nich jeschelt, dee junt profezeid?

²⁸Jo, doa hee no ons no Babel jeschekjt un jesajcht haft: Daut woat lang diere; but Hiesa un bewont an, un plaunt Goades un ät äare Frucht.» —

²⁹Un de Priesta Zefanja haud disem Breef ver de Uaren vom Profeet Jeremia jeläst.

³⁰Un daut Wuat Gottes wia too Jeremia aulsoo:

³¹Schekj han no aule wajchjefieeden un saj: Aulsoo sajcht de Har von Semaja, däm Nechelamita: Wiels Semaja junt jeprofezeit haft, un ekj am nich jeschekjt ha, un hee junt opp Läajes haft vetruen loten,

³²doarom sajcht de Har aulsoo: Kjikj, ekj well Semaja, däm Nechelamita, un sienen Somen strofen: Hee saul kjeenem haben, dee enne Medd von disem Volkj wont, un hee saul daut Goode nich seenen, daut ekj mienem Volkj doonen woa, sajcht de Har; dan hee haft jäajen däm Harn jerät.