Read De Bibel JHF Jeremia 34 Bible Online

Jeremia 34 - De Bibel JHF bible

Jeremia 34

¹Daut Wuat, daut von däm Harn aun Jeremia wia, aus Nebukadnezar, de Kjennich von Babel, un sien gaunzet Häa un aule Kjennichrikjs de Ieed, dee unja de Harschoft siene Haunt wieren, un aule Velkja jäajen Jerusalem un jäajen aule siene Städa streeden:

²Soo sajcht de Har, de Gott Israels: Go un räd too Zedekia, däm Kjennich von Juda, un saj am: Soo sajcht de Har: Kjikj, ekj jäw dise Staut en de Henj däm Kjennich von Babel, daut hee ar met Fia vebrent.

³Un du, du woascht nich von siene Haunt wajchranen, sonda jejräpen un en siene Haunt jejäft woaren; un diene Uagen woaren de Uagen vom Kjennich von Babel seenen, un sien Mul woat met dienem Mul räden, un du woascht no Babel komen.

⁴Doch hia daut Wuat Gottes, Zedekia, Kjennich von Juda! Soo sajcht de Har äwa die: Du woascht nich derch daut Schwieet stoawen;

⁵en Fräd woascht du stoawen, un aus de Braunt diene Vodasch, de Kjennichs ver die, dee ver die jewast sent, aulsoo woat maun die (too Iea) eenen Braunt moaken, un maun woat äwa die kloagen: «Wee, Har!» Dan ekj ha daut Wuat jerät, sajcht de Har.

⁶Un Jeremia, de Profeet, räd too Zedekia, däm Kjennich von Juda, aule dise Wieed en Jerusalem,

⁷aus daut Häa vom Kjennich von Babel jäajen Jerusalem un jäajen aule äwajebläwne Städa von Juda street, jäajen Lachisch un jäajen Aseka; dan dise wieren aus fauste Städa unja de Städa Juda äwajebläwen.

⁸Daut Wuat, daut von däm Harn aun Jeremia wia, nodäm de Kjennich Zedekia eenen Bunt met däm gaunzen Volkj, daut en Jerusalem wia, jemoakt haud, om an Frieheit uttoroopen,

⁹doamet een jiedra sienem Kjnajcht un een jiedra siene Deenstmejal, dän Hebräa un de Hebräarine, frie entleet, soo daut kjeena mea eenen Jud, sienen Brooda, toom Deenst bedwunk.

¹⁰Un daut wieren aule Ferschten un daut gaunze Volkj jehuarsom, dee met dän Bunt ennvestonen wieren, daut een jiedra sienen Kjnajcht un een jiedra siene Deenstmejal frie entleet, onen an wiedahan toom Deenst trigjtohoolen; see wieren jehuarsom un leeten an frie.

¹¹Oba nohäa dreiden see sikj om un leeten de Kjnajchts un Deenstmejales trigjkomen, dee see frie entloten hauden, un bedwungen an too Kjnajchts un to Deenstmejales to woaren.

¹²Un daut Wuat Gottes wia von däm Harn too Jeremia aulsoo:

¹³Soo sajcht de Har, de Gott Israels: Ekj ha eenen Bunt met june Vodasch jemoakt aun däm Dach, doa ekj an ut däm Ägiptenlaunt, ut däm Hus de Kjnajchtschoft rutfieed, un jesajcht:

¹⁴Aum Enj von säwen Joa sell jie een jiedra sienen Brooda entloten, däm Hebräa, dee sikj die vekoft haft; hee saul die sas Joa deenen, un dan saust du am frie von die entloten. Oba june Vodasch hieeden nich opp mie un neijde äa Ua nich.

¹⁵Un jie sent zwoa vondoag omjedreit un ha jedonen, waut en miene Uagen rajcht es, daut een jiedra sienem Näakjsten Frieheit utroopt; un jie ha eenen Bunt ver mie jemoakt en däm Hus, daut no mienem Nomen jenant es;

¹⁶oba jie ha junt wada trigjjedreit un mienen Nomen veonneat, un ha een jiedra sienen Kjnajcht un en jiedra siene Deenstmejal trigjkomen loten, dee jie no äarem Wensch frie jeloten hauden; un jie ha an unjajocht, daut see junt too Kjnajchts un to Deenstmejales sent.

¹⁷Doarom sajcht de Har aulsoo: Jie ha nich opp mie jehieet, Frieheit uttoroopen, een jiedra sienen Brooda un een jiedra sienen Näakjsten; kjikj, soo roop ekj junt Frieheit ut, sajcht de Har, fa daut Schwieet, fa de Past un fa däm Hunga, un jäw junt to Meshaundlunk han aule Kjennichrikjs de Ieed.

¹⁸Un ekj well de Mana, dee mienen Bunt äwaträden ha, dee de Bundeswieed nich jehoolen, däm see ver mie jemoakt ha, aus daut Kaulf moakt, daut see tweijeschnäden un see tweschen de Stekja derchjegonen sent:

¹⁹De Ferschten von Juda un de Ferschten von Jerusalem, de Hoffbeaumte un de Priesta un aulet Volkj vom Launt, daut tweschen de Stekja vom Kaulf derchjegonen sent,

²⁰dee well ekj enne Henj äare Fiend jäwen un en dee äare Haunt, dee no äarem Läwen trachten; un äare Doodeskjarpa sellen de Himmels Väajel un de Tieren de Ieed too Speise deenen.

²¹Un Zedekia, de Kjennich von Juda, un siene Ferschten woa ekj en de Haunt äare Fiend jäwen un en dee äare Haunt, dee no äarem Läwen trachten, un en dee äare Haunt vom Kjennich von Babel sien Häa, daut von junt aufjetrocken es.

²²Kjikj, ekj jebeed, sajcht de Har, un brinj an no dise Staut trigj, doamet see jäajen ar strieden un ar ennämen un ar met Fia vebrennen; un ekj woa de Städa Juda too eene Wieste moaken, onen Bewona.