Read De Bibel JHF Jeremia 35 Bible Online

Jeremia 35 - De Bibel JHF bible

Jeremia 35

¹Daut Wuat, daut von däm Harn aun Jeremia wia en de Doag Jojakim, vom Sän Josia, däm Kjennich von Juda, aulsoo:

²Go nom Hus de Rechabita un räd met an, un brinj an en daut Hus Gottes en eene de Stowen, un jeff an Wien to drinkjen.

³Un ekj naum Jaasanja, däm Jeremias Sän, vom Sän Chabazinja, un siene Breeda un aule siene Säns un daut gaunze Hus de Rechabita,

⁴un ekj brocht an en daut Hus Gottes, en de Stow de Säns Chanan, vom Sän Jigdalja, däm Maun Gottes, aun de Stow de Ferschten, dee äwa de Stow Maaseja wia, vom Sän Sallum, däm Schwalen Wajchta.

⁵Un ekj sad de Säns vom Hus de Rechabita Krucken, met Wien jefelt, un Kuffels väa un säd to an: Drinkjt Wien!

⁶Oba see säden: Wie drinkjen kjeen Wien; dan Jonadab, de Sän Rechab, ons Voda, haft ons befoolen un jesajcht: Jie sellen kjeen Wien drinkjen, noch jie noch june Kjinja, eewichlich;

⁷un jie sellen kjeen Hus buen un kjeen Sot seien un kjeen Wienboajch plaunten, noch an aus Ieejentum haben; sonda en Zelten sell jie aule Doag wonen, om daut jie väl Doag opp de Ieed läwen, woa jie junt opphoolen.

⁸Un wie ha de Jonadab siene Stemm, vom Sän Rechab, onsem Voda, en aulem jehorcht, waut hee ons jeboden haft: Aule onse Doag kjeenen Wien to drinkjen, noch wie, noch onse Frues, noch onse Säns, noch onse Dajchta,

⁹un kjeene Hiesa fa ons aus Wonunk too buen; un wie ha kjeene Wienboaj, noch Flekj, noch Sot;

¹⁰un wie ha en Zelten jewont, un ha jehorcht un aules jedonen, waut ons Voda Jonadab ons jeboden haft.

¹¹Un daut passieed, aus Nebukadnezar, de Kjennich von Babel, no onsem Launt nopptrock, doa säd wie: Komt un lot ons no Jerusalem gonen ver däm Häa de Chaldäa un ver däm Häa de Siera; un soo won wie en Jerusalem.

¹²Un daut Wuat Gottes wia too Jeremia aulsoo:

¹³Soo sajcht Gott de Häaschoa, de Gott Israels: Go un saj to de Mana von Juda un to de Bewona von Jerusalem: Woa jie kjeene Zucht aunnämen, om opp miene Wieed to hieren? Sajcht de Har.

¹⁴De Wieed Jonadab, däm Sän Rechab, dee hee siene Kjinja befoolen haft, kjeen Wien to drinkjen, sent jehoolen worden, un bat opp disem Dach drinkjen see kjeen Wien; dan see ha däm Jeboot von äarem Voda jehorcht. Un ekj ha to junt emma wada jerät, oba jie ha nich opp mie jehieet.

¹⁵Un ekj ha aule miene Kjnajchts, de Profeeten, emma wada no junt jeschekjt, un ha jesajcht: Komt doch trigj, een jiedra von sienem beesen Wajch, un moakt june Haundlungen goot, un waundelt nich aundre Jetta no, om an to deenen, soo sell jie em Launt wonen, daut ekj junt un june Vodasch jejäft ha; oba jie ha june Uaren nich jeneicht un nich opp mie jehieet.

¹⁶Jo, de Kjinja Jonadab, vom Sän Rechab, ha daut Jeboot von äarem Voda jehoolen, daut hee an jeboden haft; oba dit Volkj haft nich opp mie jehieet.

¹⁷Doarom sajcht de Har, de Gott de Häaschoa, de Gott Israels, aulsoo: Kjikj, ekj brinj äwa Juda un äwa aule Bewona von Jerusalem aul dit Onjlekj, daut ekj äwa an jerät ha, wiels ekj to an jerät un see nich jehieet, un ekj an tojeroopt un see nich jeauntwuat ha.

¹⁸Un Jeremia räd to däm Hus Rechabita: Soo sajcht Gott de Häaschoa, de Gott Israels: Wiels jie däm Jeboot Jonadab, junem Voda, jehorcht un aule siene Jebooten bewoat, un jedonen ha no aulem, waut hee junt befoolen haft,

¹⁹doarom sajcht Gott de Häaschoa, de Gott Israels, aulsoo: Daut saul Jonadab, däm Sän Rechab, nich aun eenem Maun fälen, dee ver mie steit, aule Doag.