Read De Bibel JHF Jeremia 36 Bible Online

Jeremia 36 - De Bibel JHF bible

Jeremia 36

¹Un daut passieed aum vieeden Joa Jojakim, vom Sän Josia, vom Kjennich von Juda, doa passieed daut Wuat vom Harn too Jeremia aulsoo:

²Nemm die eene Buakroll un schriew doabowen aule Wieed, dee ekj to die jerät ha äwa Israel un äwa Juda un äwa aule Nazionen, von däm Dach aun, doa ekj to die jerät ha, von däm Dach Josia aun bat opp disem Dach.

³Veleicht woat daut Hus Juda opp aul daut Beese hieren, daut ekj an to doonen jedenkj, doamet see omdreien, een jiedra von sienem beesen Wajch, un ekj äare Misdot un äare Sinden vezei.

⁴Un Jeremia roopt Baruch, däm Sän Nerija; un Baruch schreef ut däm Mul Jeremia opp eene Buakroll aul de Wieed Gottes, dee hee to am jerät haud.

⁵Un Jeremia befool Baruch un säd: Ekj sie vehindat, ekj kaun nich en daut Hus Gottes gonen;

⁶soo go du han un läs ut de Roll, waut du ut mienem Mul oppjeschräwen hast, de Wieed Gottes, ver de Uaren vom Volkj em Hus Gottes aum Fastdach; un du saust an uk ver de Uaren von gaunz Juda läsen, dee ut äare Städa komen.

⁷Veleicht woat äare Bedd ver däm Harn komen, soo daut see omdreien, een jiedra von sienem beesen Wajch; dan groot es de Oaja un de Jrim, däm de Har äwa dit Volkj utjesproake haft.

⁸Un Baruch, de Sän Nerija, deed no aulem, waut de Profeet Jeremia am befoolen haud, endäm hee ut däm Buak de Wieed Gottes em Hus Gottes väalaus.

⁹Un daut passieed aum feften Joa Jojakim, vom Sän Josia, däm Kjennich von Juda, aum näajenden Moonat, doa roopt maun aulem Volkj en Jerusalem un aulem Volkj, daut ut de Städa Juda no Jerusalem kaum, een Fausten ut ver däm Harn.

¹⁰Un Baruch laus ut däm Buak de Wieed von Jeremia em Hus Gottes, en de Stow Gemarja, vom Sän Schafan, däm Schriewa, em bowaschten Väahoff, em Engank vom nieen Dooa vom Hus Gottes, ver de Uaren vom gaunzen Volkj.

¹¹Un Mikaja, de Sän Gemarja, vom Sän Schafan, hieed aule Wieed Gottes ut däm Buak,

¹²un hee jinkj rauf nom Kjennichshus en de Stow vom Schriewa; un kjikj, doa sauten aule Ferschten: Elisama, de Schriewa, un Delaja, de Sän Semaja, un Elnathan, de Sän Akbor, un Gemarja, de Sän Schafan, un Zedekia, de Sän Hananja, un aule Ferschten.

¹³Un Mikaja berecht an aul de Wieed, de hee jehieet haud, aus Baruch ver de Uaren vom Volkj ut däm Buak laus.

¹⁴Doa schekjten aule Ferschten Jehudi, däm Sän Netanja, vom Sän Selemja, vom Sän Kuschis, no Baruch un leeten am sajen: De Rolle, ut de du ver de Uaren vom Volkj jelest hast, nemm dee en diene Haunt un komm! Un Baruch, de Sän Nerija, naum de Rolle en siene Haunt un kaum no an.

¹⁵Un see säden to am: Sat die doch un las dee ver onse Uaren. Un Baruch laus ver äare Uaren.

¹⁶Un daut passieed, aus see de Wieed hieeden, kjikjten see eenaunda enjstlich aun un säden to Baruch: Wie motten däm Kjennich dise aule Wieed berechten.

¹⁷Un see fruagen Baruch un säden: Deel ons doch met, woo du aule dise Wieed ut sienem Mul oppjeschräwen hast.

¹⁸Un Baruch säd to an: Ut sienem Mul säd hee mie aule dise Wieed väa, un ekj schreew dee met Tint en dit Buak.

¹⁹Un de Ferschten säden to Baruch: Go, vestäakj die, du un Jeremia, daut kjeena weet, woa jie sent. —

²⁰Un see jinjen nodäm Kjennich en däm Hoff; oba de Roll hauden see en de Stow Elisama, däm Schriewa hanjelajcht; un see berechten aule de Wieed ver de Uaren vom Kjennich.

²¹Doa schekjt de Kjennich däm Jehudi, om de Roll to holen; un hee hold dee ut Elisamas Stow, däm Schriewa; un Jehudi laus dee ver de Uaren vom Kjennich un ver de Uaren aule Ferschten, dee om däm Kjennich stunden.

²²Oba de Kjennich saut em Wintahus, aum näajenden Moonat, un de Koletopp wia ver am aunjestekjt.

²³Un daut passieed, wan Jehudi 3 ooda 4 Aufschnett väajelest haud, veschneet de Kjennich dee met däm Schriewamassa un schmeet dee en daut Fia, daut em Koletopp wia, bat de gaunze Roll en däm Fia vom Koletopp venicht wia.

²⁴Un de Kjennich un aule siene Kjnajchts, dee dise Wieed hieeden, worden nich enjstlich un vereeten äare Kjleeda nich.

²⁵Un Elnathan un Delaja un Gemarja bedden däm Kjennich, daut hee de Rolle nich vebrennen mucht, oba hee hieed nich opp an.

²⁶Un de Kjennich befool däm Jerachmeel, däm Kjennichssän, un Seraja, däm Sän Asriel, un Selemja, däm Sän Abdeel, Baruch, däm Schriewa, un Jeremia, däm Profeet, too jriepen; oba de Har haud an vestoaken.

²⁷Un daut Wuat Gottes wia too Jeremia, nodäm de Kjennich de Roll un de Wieed, dee Baruch ut däm Mul Jeremia opp jeschräwen, vebrent haud, aulsoo:

²⁸Nemm die wada eene aundre Roll un schriew doabowen aule dee Wieed, dee opp jane Roll wieren, dee Jojakim, de Kjennich von Juda, vebrent haft.

²⁹Un äwa Jojakim, däm Kjennich von Juda, saust du sajen: Soo sajcht de Har: Du hast dise Rolle vebrent, endäm du sädst: «Wuarom hast du doabowen jeschräwen: De Kjennich von Babel woat jewess komen un dit Launt vedoawen un Menschen un Vee doarut vetiljen?»

³⁰Doarom sajcht de Har aulsoo äwa Jojakim, däm Kjennich von Juda: Hee woat kjeenem haben, dee opp David sienen Troon sett; un sien Doodeskjarpa woat wajchjeschmäten woaren, enne Doageshett un enne Kold bie Nacht.

³¹Un ekj well aun am un aun sienem Somen un aun siene Kjnajchts äare Misdot strofen, un well äwa an un äwa de Bewona von Jerusalem un äwa de Mana von Juda aul daut Onjlekj brinjen, daut ekj äwa an jerät ha; oba see ha nich jehieet. —

³²Un Jeremia naum eene aundre Roll un jeef dee Baruch, däm Sän Nerija, däm Schriewa. Un hee schreew doabowen ut däm Mul Jeremia aule Wieed von däm Buak, daut Jojakim, de Kjennich von Juda, em Fia vebrent haud. Un daut worden noch väl Wieed aus jane doatoo jedonen.