Read De Bibel JHF Jeremia 39 Bible Online

Jeremia 39 - De Bibel JHF bible

Jeremia 39

¹Un daut passieed, aus Jerusalem enjenomen wort, (aum näajenden Joa Zedekia, däm Kjennich von Juda, aum 10-den Moonat, wia Nebukadnezar, de Kjennich von Babel, un sien gaunzet Häa jäajen Jerusalem jekomen, un see beloagaden daut;

²aum 11-ten Joa Zedekia, aum vieeden Moonat, aum näajenden vom Moonat, wort de Staut enjenomen,)

³doa jinjen de Ferschten vom Kjennich von Babel nenn un saden sikj em Meddeldooa: Nergal-Sareza, Samgar-Nebo, de bowaschta Hoffbeaumta, Nergal-Sareza, de bowaschta de Weise, un aule äwaje Ferschten vom Kjennich von Babel.

⁴Un daut passieed, aus Zedekia, de Kjennich von Juda, un aule Kjrichsmana an sagen, doa randen see un jinjen de Nacht ut de Staut rut, däm Wajch derch däm Kjennichsgoaden, derch daut Dooa tweschen de beid Miaren; un hee jinkj däm Wajch no de Läacht.

⁵Oba daut Häa de Chaldäa juagen an no, un see errieekjten Zedekia enne Läacht von Jericho; un see jreepen am un fieeden am nopp no Nebukadnezar, däm Kjennich von Babel, no Ribla em Launt Hamat; un hee säd daut Uadeel äwa am.

⁶Un de Kjennich von Babel schlacht däm Zedekia siene Säns en Ribla ver siene Uagen, un de Kjennich von Babel schlacht aule Adelje von Juda.

⁷Un hee stuak Zedekia de Uagen ut, un hee bung am met koppane Faslen, om am no Babel to brinjen.

⁸Un de Chaldäa vebrenden daut Kjennichshus un de Hiesa vom Volkj met Fia, un reeten de Mia von Jerusalem dol.

⁹Un de Äwaje vom Volkj, dee enne Staut Äwajebläwne un de Äwajerande, dee no am äwajerant wieren, un de Äwaje vom Volkj, de Äwajebläwne, fieed Nebusaradan, de Bowaschta de Wajchta, no Babel wajch.

¹⁰Oba von däm Jerinjen Volkj, dee nuscht hauden, leet Nebusaradan, de Bowaschta de Wajchta, em Launt Juda trigj; un hee gauf an Wienboaj un Akasch aun janem Dach.

¹¹Un betrafs Jeremia befool Nebukadnezar, de Kjennich von Babel, derch Nebusaradan, däm Bowaschten de Wajchta, un säd:

¹²Nemm am un recht diene Uagen opp am un doo am nuscht aun, sonda aus hee to die räden woat, soo doo met am.

¹³Doa schekjt Nebusaradan, de Bowaschta de Wajchta, un Nebuschasban, de Bowaschta Hoffbeaumta, un Nergal-Sareza, de Bowaschta de Weise, un aule Groote vom Kjennich von Babel,

¹⁴see schekjten han un leeten Jeremia ut däm Jefenkjnishoff holen; un see äwajeewen am Gedalja, däm Sän Ahikam, däm Sän Schafan, daut hee am em Hus nenfieet. Un soo wond hee enne Medd vom Volkj.

¹⁵Un daut Wuat Gottes wia aun Jeremia soo, aus hee em Jefenkjnishoff jefangen wia, aulsoo:

¹⁶Go un räd too Ebed-Melech, däm Ätiopia, un saj: Soo sajcht Gott de Häaschoa, de Gott Israels: Kjikj, ekj brinj miene Wieed äwa dise Staut toom Beesen un nich toom Gooden, un see woaren aun däm seljen Dach ver die passieren.

¹⁷Oba ekj woa die aun janem Dach raden, sajcht de Har, un du woascht nich en de Haunt de Mana jejäft woaren, ver däm du die ferchst.

¹⁸Dan ekj woa die jewess entkomen loten, un du woascht nich derch daut Schwieet faulen; un du saust diene Seel toom Raup haben, wiels du opp mie vetrut hast, sajcht de Har.