Read De Bibel JHF Jeremia 40 Bible Online

Jeremia 40 - De Bibel JHF bible

Jeremia 40

¹Daut Wuat, daut von däm Harn too Jeremia wia, nodäm Nebusaradan, de Bowaschta de Wajchta, am von Rama entloten haud, aus hee am holen leet, un hee met Kjäden jebungen wia enne Medd aula Wajchjefieede von Jerusalem un Juda, dee no Babel wajchjefieet worden.

²Un de Bowaschta de Wajchta leet Jeremia holen un säd to am: De Har, dien Gott, haft dit Onjlekj äwa disem Uat jerät;

³un de Har haft daut komen loten un haft jedonen, aus hee jerät haud; dan jie ha jäajen däm Harn jesindicht un opp siene Stemm nich jehieet, doarom es junt soowaut passieet.

⁴Un nu kjikj, ekj lees die vondoag von de Kjäden, dee aun diene Henj sent; wan daut goot es en diene Uagen, met mie no Babel too komen, soo komm, un ekj woa mien Uag opp die rechten; oba wan daut iebel en diene Uagen es, met mie no Babel too komen, soo lot daut. Kjikj, daut gaunze Launt es ver die; wuahan daut goot un wuahan daut rajcht es en diene Uagen too gonen, doahan go.

⁵Un doa hee sikj noch nich entschluten kunn, säd hee: Soo go trigj no Gedalja, däm Sän Ahikam, däm Sän Schafan, däm de Kjennich von Babel äwa de Städa von Juda bestalt haft, un won bie am enne Medd vom Volkj; ooda wuahan daut rajcht es en diene Uagen too gonen, doahan go. Un de Bowaschta de Wajchta jeef am Äten un een Jeschenkj un entleet am.

⁶Un Jeremia kaum no Gedalja, däm Sän Ahikam, no Mizpa; un hee wond bie am enne Medd vom Volkj, daut em Launt äwajebläwen wia.

⁷Un aus aule Häabowaschte, dee oppe Stap wieren, see un äare Mana, hieeden, daut de Kjennich von Babel Gedalja, däm Sän Ahikam, äwa daut Launt bestalt, un daut hee am Mana un Frues un Kjinja un von de Jerinje em Launt aunvetrut haud, von dän, dee nich wieren no Babel wajchjefieet worden,

⁸doa kaumen see no Gedalja no Mizpa: Nämlich Ismael, de Sän Netanja, un Johanan un Jonatan, de Säns Kareach, un Seraja, de Sän Tanchumet, un de Säns Efai, vom Netofatita, un Jesanja, de Sän von eenem Maakatita, see un äare Mana.

⁹Un Gedalja, de Sän Ahikam, vom Sän Schafan, schwua an un äare Mana un säd: Forcht junt nich, de Chaldäa to deenen; blieft em Launt un deent däm Kjennich von Babel, soo woat daut junt gootgonen.

¹⁰Un ekj, kjikj, ekj bliew en Mizpa, om ver de Chaldäa too stonen, dee no ons komen woaren. Oba jie saumelt Wien un Oft un Eelj en, un doot daut en june Jefässa; un wont en june Städa, dee jie aus Ieejentum ennjenomen ha.

¹¹Un uk aule Juden, dee en Moab un unja de Kjinja Amon un en Edom, un dee en aul dise Lenda wieren, hieeden, daut de Kjennich von Babel de Äwajebläwne en Juda jeloten, un daut hee Gedalja, däm Sän Ahikam, vom Sän Schafan, äwa an bestalt haft;

¹²un aule Juden kaumen ut aul de Uaten trigj, wuahan see wieren vejoacht worden, un see kaumen en daut Launt Juda no Gedalja no Mizpa. Un see saumelden sea väl Wien un Oft en.

¹³Un Johanan, de Sän Kareach, un aule Häabowaschte, dee oppe Stapen jewast wieren, kaumen no Gedalja no Mizpa,

¹⁴un see säden to am: Weetst du uk, daut Baalis, de Kjennich äwa de Kjinja Amon, Ismael, de Sän Netanja, utjeschekjt haft, om die omtobrinjen? Oba Gedalja, de Sän Ahikam, jleewd an nich.

¹⁵Un Johanan, de Sän Kareach, räd em jeheemen too Gedalja en Mizpa un säd: Lot mie doch hangonen un Ismael, däm Sän Netanja, ombrinjen, un kjeena woat daut weeten; wuarom saul hee die ombrinjen, daut aule Juden dee sikj no die jesaumelt ha, vestreit woaren, un de Äwaje von Juda omkomen?

¹⁶Oba Gedalja, de Sän Ahikam, säd to Johanan, däm Sän Kareach: Doo dise Sach nich, dan du rädst Läajes äwa Ismael.