Read De Bibel JHF Jeremia 41 Bible Online

Jeremia 41 - De Bibel JHF bible

Jeremia 41

¹Un daut passieed aum säwenden Moonat, doa kaum Ismael, de Sän Netanja, vom Sän Elisamas, vom Kjennichs Jeschlajcht un von däm Bowaschten vom Kjennich, un 10 Mana met am, no Gedalja, däm Sän Ahikam, no Mizpa; un see auten doa metenaunda en Mizpa.

²Un Ismael, de Sän Netanja, stunt opp, un de 10 Mana, dee met am wieren, un see brochten Gedalja om, däm Sän Ahikam, vom Sän Schafan, met daut Schwieet; un hee muak am doot, däm de Kjennich von Babel äwa daut Launt jesat haud.

³Un Ismael brocht aule Juden om, dee bie am, bie Gedalja, en Mizpa wieren, un uk de Chaldäa, de Kjrichsmana, dee doa wieren.

⁴Un daut passieed aum tweeden Dach, nodäm hee Gedalja omjebrocht haud, oba kjeena wist daut,

⁵doa kaumen Mana ut Sichem, von Silo un von Samaria, 80 Maun, dee däm Boat jeschoaren un de Kjleeda veräten un sikj veschnäden hauden, met Speisopfa un Weiruak en äare Haunt, om daut nom Hus Gottes to brinjen.

⁶Un Ismael, de Sän Netanja, jinkj ut Mizpa rut, an entjäajen, endäm hee hielent omhäa jinkj; un daut passieed, aus hee an troff, doa säd hee to an: Komt no Gedalja, däm Sän Ahikam.

⁷Un daut passieed, aus see en de Staut enennjekomen wieren, doa schlacht an Ismael, de Sän Netanja, un schmeet an enne Kul, hee un de Mana, dee met am wieren.

⁸Oba doa wieren 10 Mana unja an, dee too Ismael säden: Moak ons nich doot! Dan wie ha vestoaknen Väarot em Flekj: Weit un Joascht un Eelj un Honnich. Un hee veschoond an un muak an nich doot enne Medd von äare Breeda.

⁹Un de Kul (Zista), en dee Ismael aule Doodeskjarpa de Mana, dee hee dootjeschloagen haud, bie Gedalja schmeet, wia deejanje, dee de Kjennich Asa wäajen Baesas, däm Kjennich von Israel, moaken leet; dise feld Ismael, de Sän Netanja, met dootjeschloagne.

¹⁰Un Ismael fieed de gaunze Äwajebläwne vom Volkj, dee en Mizpa wieren, jefangen wajch: De Kjennichsdajchta un aulet Volkj, daut en Mizpa äwajebläwen wia, daut Nebusaradan, de Bowaschta de Wajchta, Gedalja, däm Sän Ahikam, aunvetrut haud; un Ismael, de Sän Netanja, fieed an jefangen wajch un jinkj han, om no de Kjinja Amon äwatogonen.

¹¹Un aus Johanan, de Sän Kareach, un aule Häabowaschte, dee met am wieren, aul daut Beese hieeden, daut Ismael, de Sän Netanja, jedonen haud,

¹²doa naumen see aule Mana un jinjen han, om jäajen Ismael, däm Sän Netanja, too strieden; un see fungen am aun däm groote Wota, daut bie Gibeon es.

¹³Un daut passieed, aus aulet Volkj, daut met Ismael wia, Johanan, de Sän Kareach, sach un aule Häabowaschte, dee met am wieren, doa freiden see sikj.

¹⁴Un aulet Volkj, daut Ismael von Mizpa jefangen wajchjefieet haud, dreiden sikj om un jinjen no Johanan, nom Sän Kareach, äwa.

¹⁵Oba Ismael, de Sän Netanja, rand wajch ver Johanan met 8 Mana un jinkj no de Kjinja Amon.

¹⁶Doa naum Johanan, de Sän Kareach, un aule Häabowaschte, dee met am wieren, de gaunze Äwajebläwne vom Volkj, dee hee von Ismael, däm Sän Netanja, von Mizpa trigjjebrocht, - nodäm disa däm Gedalja, däm Sän Ahikam, dootjeschloagen haud - de Mana, de Kjrichsmana, un de Frues un de Kjinja un de Hoffbeaumte, dee hee von Gibeon trigj jebrocht haud;

¹⁷un see jinjen trigj un hilden en däm Gausthus Kimham, daut bie Betlehem es, om wieda too gonen, doamet see no Ägipten komen,

¹⁸ut Angst fa de Chaldäa; dan see ferchten sikj ver an, wiels Ismael, de Sän Netanja, Gedalja, däm Sän Ahikam, omjebrocht haud, däm de Kjennich von Babel äwa daut Launt jesat haud.