Read De Bibel JHF Jeremia 43 Bible Online

Jeremia 43 - De Bibel JHF bible

Jeremia 43

¹Un daut passieed, aus Jeremia toom gaunzen Volkj aule Wieed Gottes, äarem Gott, too Enj jerät haud, met waut am de Har, äa Gott, no an jeschekjt haud, aule jane Wieed,

²doa säden Asarja, de Sän Hoschaja, un Johanan, de Sän Kareach, un aule frajche Mana - see säden to Jeremia: Du rädst Läajes! de Har, ons Gott, haft die nich jeschekjt un jesajcht: Jie sellen nich no Ägipten trakjen, om doa unja Framde too wonen;

³sonda Baruch, de Sän Nerija, hezt die jäajen ons opp, om ons en de Henj de Chaldäa to jäwen, doamet see ons ombrinjen un ons no Babel wajchfieren.

⁴Un soo hieeden Johanan, de Sän Kareach, un daut gaunze Volkj opp de Stemm Gottes nich, em Launt Juda too bliewen.

⁵Un Johanan, de Sän Kareach, un de Häabowaschte neemen de Äwajebläwne von Juda, dee ut aule Nazionen, wuahan see vejoacht worden, trigjjekomen wieren, om sikj em Launt Juda opptohoolen:

⁶De Mana un de Frues un de Kjinja un de Kjennichsdajchta, un aule Seelen, dee Nebusaradan, de Bowaschta de Hoffbeaumte, bie Gedalja, däm Sän Ahikam, vom Sän Schafan, trigj jeloten haud, un uk däm Profeet Jeremia un Baruch, däm Sän Nerija;

⁷un see trocken no Ägipten, dan see hieeden nich opp de Stemm Gottes. Un see kaumen no Tachpanhes.

⁸Un daut Wuat Gottes wia aun Jeremia en Tachpanhes aulsoo:

⁹Nemm groote Steena en diene Haunt un vestäakj an en däm Mialeem aum Tieejelowen, dee bie däm Engank vom Farao Hus en Tachpanhes es, ver de Uagen de judische Mana;

¹⁰un saj to an: Soo sajcht Gott de Häaschoa, de Gott Israels: Kjikj, ekj schekj han un hool Nebukadnezar, däm Kjennich von Babel, mienen Kjnajcht, un sat sienen Troon äwa dise Steena, dee ekj vestoaken ha; un hee woat sienen Prachtteppich äwa an utbreeden.

¹¹Un hee woat komen un daut Ägiptenlaunt schlonen: Wäa toom doot bestemt es, go nom Doot; un wäa too Jefangenschoft, too Jefangenschoft; un wäa toom Schwieet, toom Schwieet.

¹²Un ekj woa een Fia aunstekjen en de Jetta Hiesa von Ägipten, un hee woat an vebrennen un an wajchfieren. Un hee woat daut Ägiptenlaunt om sikj wekjle, aus een Hoad sien Bowakjleet om sikj wekjelt; un hee woat en Fräd von doa trakjen.

¹³Un hee woat de Stenda von Bat-Semes, dee em Ägiptenlaunt sent, veschlonen, un de Jetta Hiesa von Ägipten met Fia vebrennen.