Read De Bibel JHF Jeremia 48 Bible Online

Jeremia 48 - De Bibel JHF bible

Jeremia 48

¹Äwa Moab. Soo sajcht Gott de Häaschoa, de Gott Israel: Wee däm Nebo! Dan daut es vewust. Too Schaund jeworden, enjenomen es Kirjatajim; too Schaund jeworden es dee huage Fastinj un vebroaken.

²Moab sien Riem es doahan. En Hesbon haft maun Beeset jäajen deeselwje jeplont: «Komt un lot ons an utroden, daut et kjeene Nazion mea es!» Uk du, Madmen, woascht venicht woaren; daut Schwieet kjemt hinja die häa.

³Horch! Een Jeschrecht ut Horonaim: Vewustunk un groote Vetrimrunk!

⁴Moab es veschmatat, siene Jerinje ha een ludet Jeschrecht erhowen.

⁵Dan met Hielen jeit maun enopp no Luchit, met Hielen; dan aum Aufgrunt von Horonaim haft maun Angstjeschrecht de Veschmatrung jehieet.

⁶Rant, rad jun Läwen, un siet aus een Kadikjstruck (Wachholda) enne Wieste!

⁷Dan wiels du opp diene Woakjen un opp dien Schauz vetrust, saust uk du enjenomen woaren; un Kamos woat en de Jefangenschoft gonen, siene Priesta un siene Ferschten aula toop.

⁸Un de Vewiesta woat äwa jiedre Staut komen, un kjeene Staut woat doavon komen; un daut Tol woat too Grunt gonen un de Läacht venicht woaren, aus de Har jerät haft.

⁹Jeft Moab Flichten, daut et doavon flieejen kaun; un siene Städa woaren vewust woaren, soo daut kjeena doabennen wont.

¹⁰Veflucht es, wäa daut Woakj Gottes schloff drift, un veflucht, wäa sien Schwieet vom Bloot trigjhelt!

¹¹Sorjloos wia Moab von siene Jugent aun, un opp siene Häw stell jeläajen un woat nich ladich jemoakt vom Faut too Faut, un en Jefangenschoft es daut niemols jegonen; doahäa es sien Jeschmak am jebläwen un sien Jeroch nich veendat.

¹²Doarom kjikj, doa komen Doag, sajcht de Har, doa ekj an Oabeida schekjen woa, un siene Fäd neije un ladich woaren un siene Krucken veschmieten woaren.

¹³Un Moab woat sikj äwa Kamos schämen, aus daut Hus Israel sikj jeschämt haft äwa Betel, äa Toovetruen.

¹⁴Woo saj jie: Wie sent Helden un kjraftje Mana toom Kaumf?

¹⁵Moab es vewust, un siene Städa haft maun bekjamft, un siene baste Jinjlinje sent toom schlachten hanjeschmäten, sajcht de Kjennich, Gott de Häaschoa es sien Nomen.

¹⁶Moab sien Vedoawen es dichtbie, un sien Onjlekj es boosich.

¹⁷Bewiest am Metleet, jie aule siene Nobasch, un aule, dee jie sienen Nomen kjanen! Räd: Woo es daut Zepta de Macht vebroaken, de harlicha Stock!

¹⁸Stie rauf von de Harlichkjeit un won em drieejen Launt, du Bewonarin, Dochta Dibon; dan Moab sien Vewiesta es jäajen die noppjetrocken, haft diene vesechade Städen doljebroaken.

¹⁹Go aun däm Wajch un kjikj, Bewonarin von Aroer! Froag de Ranenden un de Wajchjeranden, saj: Waut es passieet?

²⁰Moab es too Schaund jeworden, dan daut es vewert, hielt un schriet, vekjindicht aum Arnon, daut Moab vewust es!

²¹Un daut Jerecht es äwa daut flake Launt, äwa Cholon un äwa Jahza un äwa Mefaat,

²²un äwa Dibon un äwa Nebo un äwa Bat-Diblataim,

²³un äwa Kirjatajim un äwa Bat-Gamul un äwa Bat-Meon,

²⁴un äwa Kerijot un äwa Bozra, un äwa aule Städa vom Launt Moab, dee wiede un dee dichtbie sent.

²⁵Daut Huarn von Moab es aufjebroaken, un sien Oarm es veschmatat, sajcht de Har.

²⁶Moakt daut bedrunken, - dan jäajen däm Harn ha see sikj groot jedonen - doamet Moab sikj en sienem Drakj sält un uk selfst toom Spott woat!

²⁷Oba wia Israel die nich toom Spott? Ooda wia daut unja de Deew jefungen worden, daut, soo foaken du von am rädst, du däm Kopp scheddascht?

²⁸Velot de Städa un wont enne Boaj, jie Bewona von Moab, un siet aus de Duwen, dee aum Raunt vom Aufgrunt äa Nast ha!

²⁹Wie ha däm Huachmoot von Moab venomen, däm sea huagmootjen, sien Stolt un sien Huachmoot un sien Stolt un siene Äwamoot en sienem Hoaten.

³⁰Ekj kjan woll siene Wutt, sajcht de Har, un sien stoltet Prolen; onopprechtich ha see jehaundelt.

³¹Doarom jauma ekj äwa Moab, un wäajen gaunz Moab schrie ekj; äwa de Lied von Kir-Heres seft maun.

³²Mea aus daut Hielen Jeser hiel ekj äwa die, du Wienstock von Sibma; diene Ranken jinjen äwa daut Mäa, see rieekjen bat toom Mäa von Jaser. Äwa diene Oftarnte un äwa dien Wienläse es de Vewiesta häajefollen,

³³un veschwungen sent de Freid un Jubel ut däm Fruchtgoaden un ut däm Launt Moab. Un däm Wien prasse ha ekj een Enj jemoakt: Maun traft nich mea de Wienprasa unja Jubelschaul; daut lude Roopen es kjeen Jubel jeschrecht.

³⁴Von däm Jeschrecht Hesbon ha see bat Elale, bat Jahaz äare Stemm schaule loten, von Zoar bat Horonaim, bat Eglat-Schelischija; dan uk de Wota von Nimrim sellen too eene Wieste woaren.

³⁵Un ekj moak een Enj en Moab, sajcht de Har, däm, dee oppe Hechten jeit un siene Jetta rieekjat.

³⁶Doarom kloacht mien Hoat om Moab aus eene Fleet, un mien Hoat kloacht om de Lied von Kir-Heres aus eene Fleet. Doawäajen got, waut et äwa haud, es too Grunt jegonen.

³⁷Dan jiedret Haupt es kol un jiedra Boat es aufjeschoare; aule Henj sent vekrautzt, un sackduak es om äare Lenden.

³⁸Opp aule Däakja von Moab un opp siene Gaussen es lude Kloag; dan ekj ha Moab vebroaken aus een Jefäss, aun däm maun kjeen Jefaulen haft, sajcht de Har.

³⁹Woo es daut vedorwen! See hielen. Woo haft Moab däm Rigjen fa Schaund jedreit! Un aule siene Nobasch woat Moab toom Jelach un toom Entsaten sennen.

⁴⁰Dan soo sajcht de Har: Kjikj, aus een Odla flicht hee doahan un breet siene Flichten äwa Moab ut.

⁴¹Kerijot es enjenomen, un de Fastinj sent besijt. Un daut Hoat de Helden von Moab woat aun däm Dach aus daut Hoat von eene Fru, daut aum jebäaren, es.

⁴²Un Moab woat vetilcht woaren, daut et kjeen Volkj mea es, wiels daut groot jedonen jäajen däm Harn haft.

⁴³Grule un Kule un Strank äwa die, du Bewonarin von Moab! Sajcht de Har.

⁴⁴Wäa ver däm Grule rant, woat enne Kul faulen, un wäa ut de Kul rutkjemt, woat met däm Strank jefangen woaren; dan ekj brinj äwa an, äwa Moab, daut Joa siene Bestrofunk, sajcht de Har.

⁴⁵Em Schauten von Hesbon bliewen de Flichtlinja krauftloos stonen; dan een Fia es von Hesbon utjegonen un eene Flaum ut de Medd von Sihon, un haft Moab siene Sied vebrent un däm Schädel de Säns vom Jetimmel.

⁴⁶Wee die, Moab veloaren es daut Volkj von Kamos! Dan siene Säns sent aus Jefangne wajchjefieet, un diene Dajchta en de Jefangenschoft.

⁴⁷Oba ekj woa de Jefangenschoft von Moab aum Enj de Doag dreien, sajcht de Har. Bat hiahäa daut Jerecht äwa Moab.