Read De Bibel JHF Jeremia 52 Bible Online

Jeremia 52 - De Bibel JHF bible

Jeremia 52

¹21 Joa wia Zedekia oolt, aus hee Kjennich wort, un hee rejieed 11 Joa en Jerusalem; un de Nomen von siene Mutta wia Hamutal, de Dochta von Jeremia, von Libna.

²Un hee deed, waut bees wia en de Uagen Gottes, no aulem, waut Jojakim jedonen haud.

³Dan wäajen däm Oaja Gottes jinkj Jerusalem un Juda daut aulsoo, bat hee an von sienem Aunjesecht veschmäten haud. Un Zedekia muak sikj jäajen däm Kjennich von Babel opp.

⁴Un daut passieed aum näajenden Joa von siene Rejierunk, aum 10-den Moonat, aum 10-den vom Moonat, doa kaumen Nebukadnezar, de Kjennich von Babel, hee un sien gaunzet Häa, jäajen Jerusalem un loagaden sikj jäajen ar; un see buden Woakjen toom Beloagren runtom ar häa.

⁵Un de Staut kaum en Beloagrunk bat em 11-ten Joa vom Kjennich Zedekia.

⁶Aum vieeden Moonat, aum näajenden em Moonat, doa neem de Hunga en de Staut äwahaunt; un daut wia kjeen Broot mea fa daut Volkj em Launt doa.

⁷Un de Staut wort opjebroaken, un aule Kjrichsmana randen un jinjen de Nacht ut de Staut rut opp däm Wajch derch daut Dooa, daut tweschen de beid Miaren bie däm Kjennichsgoaden wia (oba de Chaldäa wieren runtom de Staut häa); un see jinjen däm Wajch no de Läacht.

⁸Oba daut Häa de Chaldäa juagen däm Kjennich no, un see holden am en opp de Läacht von Jericho; un sien gaunzet Häa vestreid sikj von am wajch.

⁹Un see jreepen däm Kjennich un fieeden am nopp nodäm Kjennich von Babel, no Ribla em Launt Hamat; un hee räd daut Uadeel äwa am.

¹⁰Un de Kjennich von Babel schlacht däm Zedekia siene Säns ver siene Uagen, un hee schlacht uk aule Ferschten von Juda en Ribla.

¹¹Un hee leet Zedekia de Uagen utstäakje un bung am met koppane Faslen; un de Kjennich von Babel brocht am no Babel un sad am em Jefenkjnis bat sienem Doodesdach.

¹²Un aum feften Moonat, aum 10-den em Moonat, daut wia daut 1näajende Joa vom Kjennich Nebukadnezar, däm Kjennich von Babel, kaum Nebusaradan, de Bowaschta de Wajchta, dee ver däm Kjennich von Babel stunt, no Jerusalem;

¹³un hee vebrend daut Hus Gottes un daut Kjennichshus; un aule Hiesa en Jerusalem un jiedret groote Hus vebrend hee met Fia.

¹⁴Un daut groote Häa de Chaldäa, daut biem Bowaschten de Wajchta wia, reet aule Miaren von Jerusalem dol.

¹⁵Un von de Jerinje vom Volkj un de Äwaje vom Volkj, dee enne Staut äwableewen, un de Äwajerande, dee nom Kjennich von Babel äwajerant wieren, un de Äwaje de Menj fieed Nebusaradan, de Bowaschta de Wajchta, wajch.

¹⁶Oba von de Jerinje vom Launt leet Nebusaradan, de Bowaschta de Wajchta, trigj aus Wiengoadna un to Akalied.

¹⁷Un de Chaldäa veschluagen de koppane Stendasch, dee aum Hus Gottes wieren, un de Jestalen un daut koppane Mäa, daut em Hus Gottes wia; un see fieeden aulet Koppa von doa no Babel.

¹⁸Un see neemen de Tap wajch un de Schefflen un de Massasch un de bespretz Jefässa un de Kommen un aulet koppanet Jereetschoft, met waut maun däm Deenst verecht.

¹⁹Uk de Bette un de Rieekjapaunen un de Spretzkommen un de Tap un de Laumpen un de Kommen un de Spretzkommen, dee von Golt wieren, daut Golt, un waut von Selwa wia, daut Selwa, naum de Bowaschta de Wajchta wajch.

²⁰De twee Stendasch, daut eene Mäa un de 12 koppane Rinda, dee unja däm seljen wieren, un de Jestalen, dee de Kjennich Salomo fa daut Hus Gottes jemoakt haud: Daut Koppa von aul däm Jereetschoft wia nich too wäaje.

²¹Un de Stendasch: 18 Ellen wia de eene Stenda huach, un eene Schnua von 12 Ellen omfot ar; un see wia 4 Finja dikj, see wia holl.

²²Un een Knupps von Koppa wia doa bowen, un de eene Knupps wia fief Ellen huach; un een Nat un Granataupel wieren aun däm Knupps runtom: Aules von Koppa; un krakjt soo wia de aundre Stenda, un Grenautapel doaraun.

²³Un de Grenautapel wieren 96 no de 4 Wintrechtungen han; aule Grenautapel wieren 100 aum Kraunz runtom.

²⁴Un de Bowaschta de Wajchta naum Seraja, dän Bowaschten Priesta, un Zefanja, däm tweeden Priesta, un de dree Wajchtasch aune Schwalen:

²⁵Un ut de Staut naum hee eenen Hoffbeaumten, dee äwa de Kjrichsmana jestalt wia, un 7 Mana von dän, dee daut Aunjesecht vom Kjennich sagen, dee en de Staut jefungen worden, un däm Schriewa von Häabowaschten, dee daut Volkj utem Launt toom Häa beroopt, un 60 Maun von däm Laundesvolkj, dee en de Staut väajefungen worden.

²⁶Un Nebusaradan, de Bowaschta de Wajchta, neem an un brocht an nodäm Kjennich von Babel no Ribla.

²⁷Un de Kjennich von Babel schluach an un brocht an en Ribla em Launt Hamat om. - Un soo wort Juda ut sienem Launt wajchjefieet.

²⁸Dit es daut Volkj, daut Nebukadnezar wajchjefieet haud: Aum säwenden Joa 3 023 Juden;

²⁹aum 18-den Joa von Nebukadnezar 832 Seelen ut Jerusalem;

³⁰aum 23-sten Joa Nebukadnezar fieed Nebusaradan, de Bowaschta de Wajchta, von de Juden 745 Seelen wajch; em gaunzen 4 600 Seelen.

³¹Un daut passieed aum 37-sten Joa de Wajchfierunk von Jojakim, däm Kjennich von Juda, aum 12-ten Moonat, aum 25-sten Dach em Moonat, doa hoof Ewil-Merodak, de Kjennich von Babel, aum ieeschten Joa siene Rejierunk daut Haupt von Jojakim, däm Kjennich von Juda, un fieed am ut däm Jefenkjnis.

³²Un hee räd met am em gooden un sad sienen Stool äwa däm Stool de Kjennichs, dee bie am en Babel wieren;

³³un hee veendad de Kjleeda von sienem Jefenkjnis. Un Jojakim aut emma ver am aule Doag en sienem Läwen,

³⁴un sien Unjahault: Een beständja Unjahault wort am von däm Kjennich von Babel jejäft, sooväl hee jieda Dach brukt, bat aun sienem Stoawdach, aule Doag en sienem Läwen.