Read De Bibel JHF Kloagleeda 2 Bible Online

Kloagleeda 2 - De Bibel JHF bible

Kloagleeda 2

¹Ach! Woo haft de Har en sienem Oaja en Dunkelheit de Dochta Zion omjäft! Hee haft de Harlichkjeit Israels von Himmel oppe Ieed jeschmäten, un haft de Footbenkj von siene Feet nich jedocht aun sienem Zorndach.

²De Har haft aule Wonstäden Jakob schoonungsloos venicht; hee haft en sienem Jrim de Fastinj de Dochta Juda doljeräten; oppe Ieed jeschmäten, hee haft daut Kjennichtum un siene Ferschten entweit.

³En siene Zorngloot haft hee jiedret Huarn Israels aufjehakt; hee haft siene Rajchte trigjjetrocken ver däm Fiend, un haft Jakob en Braunt jestekjt aus een flaumendet Fia, daut om sikj frat.

⁴Sien Boagen haft hee jespaunt aus een Fiend, haft sikj met siene Rajchte hanjestalt aus een Jäajna un aule Uagenlost dootjemoakt; en de Dochta Zion äa Zelt haft hee sienen Jrim utjegoten aus Fia.

⁵De Har es aus een Fiend jeworden, hee haft Israel venicht, venicht aul äare Paulausten, siene vesechade Städen venicht; un bie de Dajchta Juda (Zion) haft hee Seften un Stänen vemieet.

⁶Un hee haud sien Zelt veweelt aus eenen Goaden, haft dän Uat siene Fastvesaumlung vedorwen; de Har haft en Zion de Faste un Sabaten vejäten loten; un en sienem Oajajrim vespott hee Kjennich un Priesta.

⁷De Har haft sien Aultoa veschmäten; hee haft de Miaren von äare prachtvolle Hiesa em Fiend siene Haunt jejäft: See ha em Hus Gottes de Stemm erhowen aus aun eenem Fastdach.

⁸De Har haft sikj väajenomen, de Mia de Dajchta Zion entwei tomoaken; hee trock de Motschnua, dreid siene Haunt vom vedoawen nich auf; un Ieedwaul un Mia haft hee truaren loten: See ligjen jaumalich doa.

⁹Enne Ieed jesunken sent äare Dooasch, entwei jemoakt un veschloagen haft hee äare Rijel; äa Kjennich un äare Ferschten sent unjre Nazionen, kjeen Jesaz es mea; uk äare Profeeten erlangen kjeen Jesecht vom Harn.

¹⁰Stell setten de Eltestasch de Dajchta Zion oppe Ieed; see ha Stoff opp äare Kjap jeschmäten, Sakduak sikj omjebungen; de Junkfrues von Jerusalem ha äa Haupt too Ieed jebekjt.

¹¹Derch Tronen vegonen miene Uagen, mien Ennalichet koakt, miene Läwa haft sikj oppe Ieed jegoten: Wäajen de Vetrimrunk de Dajchta von mienem Volkj, wiels Kjint un Brostkjint oppe Gaussen de Staut veschmachten.

¹²Too äare Muttasch sajen see: Wua es Broot un Wien? Endäm see aus toom Doot vewund opp de Gaussen de Staut hanschmachten, endäm äare Seel sikj enne Brosten äare Muttasch utjit.

¹³Waut saul ekj die bezeijen, waut die vejlikjen, Dochta Jerusalem? Waut saul ekj die jlikjstalen, daut ekj die treest, du Junkfru, Dochta Zion? Dan diene Vetrimrunk es groot aus daut Mäa: wäa kaun die heelen?

¹⁴Faulschet un Onjerajchtet ha diene Profeeten die jewast; un see dakjten diene Ojjerajchtichkjeit nich op, om diene Jefangenschoft too dreien; sonda see weesen die utspricha de Faulschheit un de Fuatfierunk.

¹⁵Aula, dee däm Wajch gonen, schlonen äwa die de Henj toop, see zischen un schedren äaren Kopp äwa de Dochta Jerusalem: «Es daut de Staut, von dee maun säd: De aulabaste, eene Freid de gaunze Ieed?»

¹⁶Aule äare Fiend rieten äa Mul äwa die op, see zischen un kjnirschen met de Tänen; see sajen: Wie ha ar veschlungen; woarhauft, daut es de Dach, opp däm wie luaden: Wie ha am errieekjt!

¹⁷De Har haft jedonen, waut hee beschloten, haft sien Wuat erfelt, daut hee von de Doag de oole Tieden häa vekjindicht haft. Hee haft schoonungsloos doljeräten un däm Fiend sikj äwa die freien loten, haft daut Huarn diene Bedrenja oppjehowen.

¹⁸Äa Hoat schricht toom Harn. Du Mia de Dajchta Zion, lot, aus een Bach, Dach un Nacht Tronen ranen: Jenn die kjeene Ru, dien Uagaupel saul nich ruen!

¹⁹Moak die opp, kloag enne Nacht biem Aunfank de Nachtwoak, schedd dien Hoat aus Wota ver däm Aunjesecht vom Harn ut; häw diene Henj no am nohecht fa de Seel diene Kjinja, dee fa Hunga veschmachten aun aule Gaussenakjen!

²⁰Kjikj, Har, un kjikj, wäm hast du aulsoo jedonen! Sellen Frues äare Frucht vom Lief äten, dee Kjinja, dee see oppe Henj jedroacht ha? Sellen em Heilichtum vom Harn Priesta un Profeeten omjebrocht woaren?

²¹Junges un Jreisen ligjen opp de Gaussen oppe Ieed; miene Junkfrues un miene Jinjlinje sent derch daut Schwieet jefollen; omjebrocht hast du an aun dienem Zorndach, onen too veschoonen jeschlacht.

²²Mien Schrakj hast du von aule Sieden doatoo jeroopt aus aun eenem Fastdach, un nich eena rand wajch ooda bleew äwa aum Zorndach Gottes; dee ekj oppe Henj jedroacht un oppjetrocken ha, mien Fiend haft an venicht.