Read De Bibel JHF Kloagleeda 3 Bible Online

Kloagleeda 3 - De Bibel JHF bible

Kloagleeda 3

¹Ekj sie dee Maun, dee Älent jeseenen derch siene Zornwäd.

²Mie haft hee jeleit un jefieet en Diestanis un Dunkel.

³Blooss jäajen mie häft hee emma wada siene Haunt däm gaunzen Dach.

⁴Hee haft mien Fleesch un miene Hut vefaule loten, miene Knoakes haft hee veschloagen.

⁵Jeft un Mieej haft hee jäajen mie jebut un mie doamet omrinjt.

⁶Hee leet mie en Diestanis wonen, aus de Doodes too oole Tieden.

⁷Hee haft mie ennjetunt, daut ekj nich rut komen kaun; hee haft miene Faslen schwoa jemoakt.

⁸Wan ekj uk schrieen un roop, soo helt hee mien Jebäd opp.

⁹Miene Wäaj haft hee met Steena vemiat, miene Stiej omjedreit.

¹⁰Een luarenda Boa es hee mie, een Leiw em Vestäakj.

¹¹Hee haft miene Wäaj trigjjetrocken un haft mie vefleescht, mie vewust.

¹²Hee haft sienen Boagen jespaunt un mie aus een Ziel däm Feila hanjestalt.

¹³Hee leet en miene Nieren drinjen, de Säns von sienem Boagenhaulta.

¹⁴Mienem gaunzen Volkj sie ekj toom Jelach jeworden, sie äa Seidenspell däm gaunzen Dach.

¹⁵Met Bettanis haft hee mie saut jemoakt, met Warmät mie jedrenjt.

¹⁶Un hee haft met Graunt miene Tänen vemolt, haft mie enne Ausch doljedrekjt.

¹⁷Un miene Seel es vom Fräd vestat, ekj ha daut Goode vejäten.

¹⁸Un ekj säd: Miene Läwenskrauft es doahan un miene Hopninj opp däm Harn.

¹⁹Denkj aun mien Älent un aun mien omhäa erren, vom Warmät un de Bettanis!

²⁰Emma denkjt miene Seel doaraun un es en mie doljeboagen.

²¹Dit well ekj mie too Hoaten nämen, doarom well ekj hopen:

²²Daut es de Jnod Gottes, daut wie nich oppjeräwen sent; dan siene Erboarmungen sent nich too Enj;

²³see sent aule Morjen nie, diene Tru es groot.

²⁴De Har es mien Deel, sajcht miene Seel; doarom well ekj opp am hopen.

²⁵De Har es Goot jäajen dee, dee opp am hopen, jäajen dee Seel, dee no am tracht.

²⁶Daut es goot, daut maun stell opp de Radinj Gottes luat.

²⁷Daut es däm Maun goot, daut hee daut Joch en siene Jugent drajcht.

²⁸Hee sett eensom un es stell, wiels hee am daut oppjelajcht haft;

²⁹hee laj sien Mul em Stoff; veleicht jeft daut Hopninj.

³⁰Däm, dee am schleit, rieekj am de Bak han, woa met Schmach saut jemoakt.

³¹Dan de Har vestat nich eewichlich;

³²sonda wan hee betriept haft, erboarmt hee sikj no siene groote Jnod.

³³Dan nich von Hoaten deemooticht hee de Menschenkjinja.

³⁴Daut maun aule Jefangne de Ieed unja siene Feet veklunjt,

³⁵daut Rajcht von eenem Maun bicht sikj ver däm Hechsten sien Aunjesecht,

³⁶doo eenem Mensch Orrajcht en siene Striedsach: Sull de Har nich doaropp achten?

³⁷Wäa es, dee doa sajcht, un daut passieed, onen daut de Har daut befool?

³⁸Daut Beese un daut Goode, jeit daut nich ut däm Mul vom Hechsten väa?

³⁹Waut bekloacht sikj de läwendja Mensch? Äwa siene Sinden bekloacht sikj de Maun!

⁴⁰Proowen un erforsch wie onse Wäaj, un lot ons nom Harn omdreien!

⁴¹Lot ons daut Hoat met de Henj opphäwen no Gott em Himmel!

⁴²Wie, wie sent aufjefollen un sent wadaspanstich jewast; du hast nich vezeit.

⁴³Du hast die em Oaja jekjleet un hast ons vefolcht; du hast onen too schoonen omjebrocht.

⁴⁴Du hast die en eene Wolkj vedakjt, soo daut kjeen Jebäd derch kjeem.

⁴⁵Du hast ons too Drakj un toom Äakjel jemoakt unjre Velkja.

⁴⁶Aule onse Fiend ha äa Mul jäajen ons opjeräten.

⁴⁷Enjsten un Kul sent äwa ons jekomen, Vewustunk un Vetrimrunk.

⁴⁸Daut ranen Wotakjwalen ut miene Uagen wäajen de Vetrimrunk de Dochta von mienem Volkj.

⁴⁹Miene Uagen tronen onen opptohieren un onen Ru,

⁵⁰bat de Har vom Himmel raufkjikjt un doabennen sitt.

⁵¹Mien Uag deit mie wee wäajen aule Dajchta von miene Staut.

⁵²Aus een Voagel ha mie haftich jejoach, dee onen Uasoak miene Fiend sent.

⁵³See ha mien Läwen bat enne Kul nenn venicht un opp mie Steena jeschmäten.

⁵⁴Wota rant äwa mien Haupt; ekj säd: Ekj sie aufjeschnäden!

⁵⁵Har, ekj ha dienen Nomen aunjeroopt ut de deepste Kul.

⁵⁶Du hast miene Stemm jehieet; vestäakj dien Ua nich ver mienem Seften, mienem Schrieen!

⁵⁷Du best noda jekomen aun däm Dach, doa ekj die aunroopt; du sädst: Forcht die nich!

⁵⁸Har, du hast de Rajchtsach von miene Seel jefieet, hast mien Läwen erleest.

⁵⁹Har, du hast miene Bedrekjung jeseenen; vehalp mie to mienem Rajcht!

⁶⁰Du hast aul äare Rach jeseenen, aul äare Aunschläaj jäajen mie.

⁶¹Har, du hast miene Vespottung jehieet, aule äare Aunschläaj jäajen mie,

⁶²dee äa Jeräd, dee jäajen mie oppjestonen sent, un äa Denkjen jäajen mie däm gaunzen Dach.

⁶³Kjikj aun äa Setten un äa Oppstonen! Ekj sie äa Seidenspell.

⁶⁴Har, vejelt an nodäm Woakj äare Henj.

⁶⁵Jeff an Vestockunk de Hoaten, dien Fluch komm äwa an!

⁶⁶Vefolj an em Oaja un tilj an unja Gottes Himmel wajch!