Read De Bibel JHF Kloagleeda 4 Bible Online

Kloagleeda 4 - De Bibel JHF bible

Kloagleeda 4

¹Woo wort daut Golt vedunkelt, veendat daut goode, reine Golt! Woo worden de Steena vom Heilichtum aun aule Gaussenakjen vestreit!

²De Kjinja Zion, de kostboare, dee met reinem Golt aufjewoagne, woo sent see aus ieedne Krucken veacht, däm Woakj vom Toppmoaka Henj!

³Selfst Schakale rieekjen de Brost, äare Junge sue; de Dochta von mienem Volkj es grausom jeworden aus de Strausse enne Wieste.

⁴De Tung vom Brostkjint backt fa Darscht aun sienem Bähn; de Kjinja fodren Broot, kjeena brinjt an daut.

⁵Dee von de scheene Speise auten, veschmachten oppe Gaussen; dee opp Karmesin jedroacht worden, ligjen oppe Mesthupes.

⁶Un de Schult de Dochta von mienem Volkj es jrata jeworden aus de Sinden Sodom, daut plazlich omjefäacht wort, onen daut Henj doabie jebrukt worden.

⁷Äare Ferschten wieren reina aus Schnee, witta aus Malkj; aum Lief wieren see rooda aus Korale, aus Safier äare Jestault.

⁸Dunkla aus Schwoat es äa utseenen, maun kjant ar nich oppe Gaussen; äare Hut backt aun äare Knoakes, es drieech aus Holt jeworden.

⁹Dee vom Schwieet jeschloagne sent jlekjlicha aus dee vom Hunga Jestorwne, dee hanschmachten, derchjestoaken von Mangel aun Frucht vom Flekj.

¹⁰De Henj boarmhoatje Frues ha äare Kjinja jekoakt; see worden an too Speise bie de Vetrimrunk de Dochta von mienem Volkj.

¹¹De Har haft sienen Jrim vollbrocht, siene Zorngloot utjegoten; un hee haft en Zion een Fia aunjestekjt, daut siene Gruntfausten vebrent haft.

¹²De Kjennichs de Ieed hauden daut nich jejleeft, noch aule Bewona vom Ieedkjreis, daut Bedrenja un Fiend en de Dooasch von Jerusalem komen wudden.

¹³Daut es wäajen de Sinden äare Profeeten, de Misdoten äare Priesta, dee en äare Medd daut Bloot de Jerajchte vegoten ha.

¹⁴See errde blint oppe Gaussen omhäa; see wieren met Bloot besprezt, soo daut maun äare Kjleeda nich aunrieren mucht.

¹⁵«Got! Orreine!» Roopt maun an too; «Got, got, rieet nich aun!» Wan see randen, soo errde see omhäa; maun säd unjre Nazionen: See sellen nich lenja bie ons bliewen!

¹⁶Gottes Aunjesecht haft an vestreit, hee kjikjt an nich mea aun. Opp de Priesta haft maun kjeene Acht jenomen, aun Jreisen kjeene Jnod jeeeft.

¹⁷Noch schmachten onse Uagen no nuschtje Help; en onsem Luaren luad wie opp een Volkj, daut nich raden woat.

¹⁸See vefoljen onse Schräd, daut wie opp onse Gaussen nich gonen kjennen. Ons Enj es dichtbie, onse Doag sent voll; jo, ons Enj es jekomen.

¹⁹Onse Vefolja wieren schwinda aus de Himmelsodla; see juagen ons no oppe Boaj, enne Wieste luaden see opp ons.

²⁰Ons Läwensodem, de Jesaulwda Gottes, von däm wie säden: En sienem Schauten woa wie unjre Nazionen läwen.

²¹Sie froo un frei die, Dochta Edom, Bewonarin vom Launt Uz! Uk aun die woat daut Kuffel komen; du woascht bedrunken woaren un noaktich woaren.

²²De Schult es toenj, Dochta Zion! Hee woat die nich mea wajchfieren. Hee woat diene Misdot bestrofen, Dochta Edom, hee woat diene Sinden opdakjen.