Read De Bibel JHF Kloagleeda 5 Bible Online

Kloagleeda 5 - De Bibel JHF bible

Kloagleeda 5

¹Jedenkj, Har, aun daut, waut ons passieed! Kjikj häa un kjikj opp onse Schmach!

²Ons Oawgoot es Framde tojefollen, onse Hiesa Utlenda.

³Wie sent Weisekjinja, onen Voda; onse Muttasch sent aus Wätfrues.

⁴Ons Wota drinkj wie fa Jelt, ons Holt kjrie wie jäajen betolt.

⁵Onse Vefolja sent ons em Jenekj; wie woaren meed, maun lat ons kjeene Ru.

⁶Ägipten rieekj wie de Haunt, un Assur, om met Broot saut to woaren.

⁷Onse Vodasch ha jesindicht, see sent nich mea; wie, wie droagen äare Misdoten.

⁸Kjnajchts harschen äwa ons; doa es kjeena, dee ons ut äare Haunt ritt.

⁹Wie holen ons Broot met onse Läwensjefoa, wäajen daut Schwieet de Wieste.

¹⁰Von de Hungaschgloot (de Hunga brent soo aus eene Gloot) brent onse Hut aus een Owen.

¹¹See ha Frues vejewaulticht en Zion, Junkfrues en de Städa Juda.

¹²Ferschten sent derch äare Haunt oppjehongen, daut Aunjesecht de Oole woat nich jeieet.

¹³Jinjlinje droagen de Hauntmäl, un Kjinja woaren schwak unja däm Holt.

¹⁴De Oole bliewen wajch vom Dooa, de Jinjlinje von äarem Seidenspell.

¹⁵De Freid en onsem Hoaten haft oppjehieet, en Trua es daut Froosennen vewaundelt.

¹⁶Jefollen es de Kroon von onsem Haupt. Wee ons! Dan wie ha jesindicht.

¹⁷Doarom es ons Hoat krank jeworden, om dise Dinj wellen sent onse Uagen vedunkelt:

¹⁸Wäajen däm Boajch Zion, dee vewust es; Fass ranen opp am omhäa.

¹⁹Du, Har, troonst en Eewichkjeit; dien Troon es von Jeschlajcht too Jeschlajcht.

²⁰Wuarom west du ons fa emma vejäten, ons opp emma veloten?

²¹Har, brinj ons no die trigj, daut wie omdreien; moak onse Doag nie aus ver oole Tieden!

²²Ooda sust du ons jenslich veschmäten ha, goa too sea opp ons oajalich sennen?