Read De Bibel JHF Hesekiel 1 Bible Online

Hesekiel 1 - De Bibel JHF bible

Hesekiel 1

¹Un daut passieed em 30-sten Joa, aum vieeden Moonat, däm feften em Moonat, aus ekj enne Medd von de Wajchjefieede wia, aum Fluss Kebar, doa deeden sikj de Himmel op, un ekj sach Jesechta Gottes.

²Aum feften Dach em Moonat, daut wia daut fefte Joa de Wajchfierunk vom Kjennich Jojakim,

³passieed daut Wuat Gottes utdrekjlich too Hesekiel, däm Sän Busis, däm Priesta, em Launt de Chaldäa, aum Fluss Kebar; un doa kjeem de Haunt Gottes äwa am.

⁴Un ekj sach: Un kjikj, een Stormwint kaum vom Nuaden häa, eene Groote Wolkj un een Fia, sikj auneenaunda schlenjend, un een Glauns runtom; un ut siene Medd, ut de Medd vom Fia häa, schiend daut aus de Aunblekj von blankem Metol.

⁵Un ut siene Medd erschien de Jestault von 4 läwendje Wäsent; un dit wia äa utseenen: See hauden de Jestault von eenem Mensch.

⁶Un jiedret haud 4 Aunjesechta, un jiedret von an haud 4 Flichten.

⁷Un äare Feet wieren jlikje Feet, un äare Footsole aus de Footsohle von eenem Kaulf; un see funkle aus de Aunblekj von glautem Koppa.

⁸Un Menschenhenj wieren unja äare Flichten aun äare vea Sieden; un de 4 hauden äare Aunjesechta un äare Flichten.

⁹Äare Flichten wieren vebungen eena met däm aundren; see dreiden sikj nich, wan see jinjen: See jinjen een jiedra jlikj ver sikj han.

¹⁰Un de Jestault von äarem Aunjesecht wia een Menschenaunjesecht; un rajchtsch hauden dee 4 een Leiwsaunjesecht, un linkjsch hauden dee 4 een Bollesaunjesecht, un hinjen hauden dee 4 een Odlaaunjesecht.

¹¹Un äare Aunjesechta un äare Flichten wieren bowen jetrant; jiedret haud 2 Flichten metenaunda vebungen, un 2, dee äare Liew bedakjten.

¹²Un see jinjen een jiedret jlikj ver sikj han; wuahan de Jeist gonen wull, jinjen see; see dreiden sikj nich, wan see jinjen.

¹³Un de Jestault de läwendje Wäsent: Äa utseenen wia aus brennende Fiakolen, aus daut utseenen von Fiastakja. Daut Fia fua omhäa tweschen de läwendje Wäsent; un daut Fia haud eenen Glauns, un ut däm Fia jinjen Blitzen väa.

¹⁴Un de läwendje Wäsent randen han un häa aus daut utseenen von Blitzstrole.

¹⁵Un ekj sach de läwendje Wäsent, un kjikj, doa wia een Raut oppe Ieed bie de läwendje Wäsent, no äare 4 väaschte Sieden.

¹⁶Daut utseenen de Räda un äare Oabeit wia de Aunblekj von eenem Chriesolit, un de 4 hauden dee selje Jestault; un äa utseenen un äare Oabeit wia, aus wan een Raut enne Medd von eenem Raut wia.

¹⁷Wan see jinjen, soo jinjen see no äare vea Sieden han: See dreiden sikj nich, wan see jinjen.

¹⁸Un äare Räda, see wieren huach un furchtboa; un äare Räda wieren runtom voll Uagen bie de 4.

¹⁹Un wan de läwendje Wäsent jinjen, soo jinjen de Räda bie an; un wan de läwendje Wäsent sikj von de Ieed erhoowen, soo hoowen sikj de Räda.

²⁰Wuahan de Jeist gonen wull, jinjen see, doahan, wuahan de Jeist gonen wull; un de Räda erhoowen sikj bie an, dan de Jeist vom läwendjen Wäsent wia en de Räda.

²¹Wan see jinjen, jinjen uk see, un wan see stonen bleewen, bleewen uk see stonen; un wan see sikj von de Ieed erhoowen, soo erhoowen sikj de Räda bie an; dan de Jeist vom läwendjen Wäsent wia en de Räda.

²²Un äwa de Heipta vonne läwendje Wäsent wia aus eene Himmelsrundinj, aus de Aunblekj von eenem wundavollen Kristal, utjebreet bowen äwa äare Heipta.

²³Un unja de Himmelsrundinj wieren äare Flichten utjestrakjt, eena jäajen däm aundren; een jiedret von an haud 2 Flichten, dee äare Kjarpa bedakjten.

²⁴Un wan see jinjen, hieed ekj daut Ruzhen von äare Flichten aus daut Ruzhen groote Wota, aus de Stemm vom Aulmajchtjen, daut Ruzhen von eenem Jetimmel, aus daut Ruzhen von eenem Häaloaga. Wan see stell stunden, leeten see äare Flichten henjen.

²⁵Un daut kjeem eene Stemm von bowen de Himmelsrundinj, dee äwa äare Heipta wia. Wan see stell stunden, leeten see äare Flichten henjen.

²⁶Un äwa de Himmelsrundinj, dee äwa äare Heipta wia, wäa de Jestault von eenem Troon aus daut utseenen von eenem Safiersteen; un opp de Jestault vom Troon eene Jestault aus daut utseenen von eenem Mensch doabowen.

²⁷Un ekj sach aus eenen Aunblekj von blanken Metol, aus daut utseenen von Fia von bennen runtom; von siene Lenden nohecht un von siene Lenden rauf sach ekj aus daut utseenen von Fia; un een Glauns wia runtom an.

²⁸Aus daut utseenen vom Räajenboagen, dee aum Räajendach enne Wolkjen es, aulsoo wia daut utseenen runtom von Glauns. Daut wia daut utseenen vom Bilt de Harlichkjeit Gottes. - Un aus ekj daut sach, foll ekj dol opp mien Aunjesecht; un ekj hieed eene Stemm von eenem Rädenden.