Read De Bibel JHF Hesekiel 10 Bible Online

Hesekiel 10 - De Bibel JHF bible

Hesekiel 10

¹Un ekj sach: Un kjikj, aun de Himmelsrundinj, dee äwa de Heipta de Cherubim wia, wia daut aus een Safiersteen, aus daut utseenen de Jestault von eenem Troon, de äwa an erschien.

²Un hee räd to däm en Leiwent jekjleeden Maun un säd: Go nenn tweschen de Räda unja däm Cherub, un fell diene Henj met Fiakolen von däm Rum tweschen de Cherubim, un strei an äwa de Staut han. Un hee jinkj ver miene Uagen nenn.

³Oba de Cherubim stunden vonne rajchte Sied vom Hus, aus de Maun nenn jinkj; un de Wolkj feld dän bennaschten Väahoff.

⁴Un de Harlichkjeit Gottes haud sikj von däm Cherub han opp de Schwal vom Hus erhoowen; un daut Hus wia von de Wolkj erfelt, un de Väahoff wia voll von däm Glauns de Harlichkjeit Gottes.

⁵Un daut Ruzhen de Flichten de Cherubim wort bat en däm butaschten Väahoff jehieet aus de Stemm Gottes, däm Aulmajchtjen, wan hee räd.

⁶Un daut passieed, aus hee däm en Leiwent jekjleeden Maun befool un säd: Nemm Fia tweschen de Räda, tweschen de Cherubim wajch, un hee jinkj nenn un stald sikj aune Sied vom Raut,

⁷doa strakjt een Cherub siene Haunt tweschen dän Cherubim häa, nodäm Fia han, daut tweschen de Cherubim wia, un naum daut un jeef daut en däm siene Henj, dee en Leiwent jekjleet wia; dee naum daut un jinkj rut.

⁸Un daut kjeem aun däm Cherubim, daut Aufbilt, eene Menschenhaund unjen äare Flichten.

⁹Un ekj sach: Un kjikj, 4 Räda wieren bie däm Cherubim, je een Raut bie je eenem Cherub. Un daut utseenen de Räda wia aus de Aunblekj von eenem Chrusolitsteen;

¹⁰un äa utseenen: Dee 4 hauden jlikje Jestault, aus wan een Raut enne Medd von eenem Raut wia.

¹¹Wan see jinjen, soo jinjen see no äare vea Sieden han: See dreiden sikj nich, wan see jinjen; dan nodäm Uat, wuahan daut väadeel jerecht wia, foljden see däm seljen: See dreiden sikj nich, wan see jinjen.

¹²Un äa gaunzet Lief un äa Rigjen un äare Henj un äare Flichten un de Räda wieren runtom voll Uagen; aule 4 hauden äare Räda.

¹³De Räda, dee worden ver miene Uaren «Wirbel» jenant.

¹⁴Un een jiedret haud 4 Aunjesechta; daut Aunjesecht vom ieeschten wia daut Aunjesecht von eenem Cherub, un daut Aunjesecht vom tweeden daut Aunjesecht von eenem Mensch, un daut dredde daut Aunjesecht von eenem Leiw, un daut vieede daut Aunjesecht von eenem Odla.

¹⁵Un de Cherubim hoowen sikj nohecht. Daut wia daut läwendje Wäsent, daut ekj aum Fluss Kebar jeseenen haud.

¹⁶Un wan de Cherubim jinjen, soo jinjen de Räda bie an; un wan de Cherubim äare Flichten opphoowen, om sikj von de Ieed nohecht too häwen, soo dreiden sikj de Räda uk nich von äare Sied.

¹⁷Wan see stonen bleewen, bleewen uk see stonen; un wan see sikj nohecht hoowen, hoowen see sikj met an nohecht; dan de Jeist vom läwendjen Wäsent wia en an.

¹⁸Un de Harlichkjeit Gottes jinkj von de Schwal vom Hus wajch un stald sikj äwa de Cherubim.

¹⁹Un de Cherubim hoowen äare Flichten un hoowen sikj ver miene Uagen von de Ieed nohecht, aus see wajch fluage; un de Räda wieren bie an. Un see stalden sikj aun däm Engank vom oostlichen Dooa vom Hus Gottes, un de Harlichkjeit Gottes Israels wia bowen äwa an.

²⁰Daut wia daut läwendje Wäsent, daut ekj unja däm Gott Israels aum Fluss Kebar jeseenen haud; un ekj erkjand, daut et Cherubim wieren.

²¹Jiedra haud 4 Aunjesechta, un jiedra haud 4 Flichten, un daut Aufbilt von Menschenhenj wia unja äare Flichten.

²²Un waut de Jestault von äare Aunjesechta betraft, soo wieren daut de Aunjesechta, dee ekj aum Fluss Kebar jeseenen haud, äa utseenen un see selfst. See jinjen een jiedra jlikj ver sikj han.