Read De Bibel JHF Hesekiel 11 Bible Online

Hesekiel 11 - De Bibel JHF bible

Hesekiel 11

¹Un de Jeist hoof mie nohecht un brocht mie nom oostlichem Dooa vom Hus Gottes, daut jäajen Oosten kjikjt. Un kjikj, aun däm Engank vom Dooa wieren 25 Mana; un ekj sach en äare Medd Jaasanja, däm Sän Assur, un Pelatja, däm Sän Benaja, de Ferschten vom Volkj.

²Un hee säd to mie: Menschensän, daut sent de Mana, dee Onheil plonen un beesen Rot en dise Staut jäwen,

³dee doa sajen: Daut es nich aun de Tiet, Hiesa too buen; see sent de Topp, un wie sent daut Fleesch.

⁴Doarom profezei jäajen an; profezei, Menschensän!

⁵Un de Jeist Gottes foll opp mie un säd to mie: Soo sajcht de Har: Aulsoo saj jie, Hus Israel; un waut en junem Jeist oppsticht, daut weet ekj.

⁶Jie ha june Jeschloagne väl jemoakt en dise Staut un june Gaussen met Jeschloagne jefelt.

⁷Doarom, soo sajcht de Har, Gott: June Jeschloagne, dee jie en june Medd hanjestrakjt ha, dee sent daut Fleesch, un (Jerusalem) see es de Topp; oba junt woat maun ut äare Medd rutfieren.

⁸Jie ha fa daut Schwieet Angst; un daut Schwieet woa ekj äwa junt brinjen, sajcht de Har, Gott.

⁹Un ekj woa junt ut äare Medd rutfieren un junt en de Haunt de Framde jäwen, un woa Jerecht aun junt eewen.

¹⁰Derch daut Schwieet sell jie faulen: Aun de Jrensen Israels woa ekj junt rechten. Un jie woaren weeten, daut ekj de Har sie.

¹¹See woat junt nich aus Topp, un jie woaren en äare Medd nich daut Fleesch sennen: Aun de Jrensen Israels woa ekj junt rechten.

¹²Un jie woaren weeten, daut ekj de Har sie, ekj, en däm siene Jebooten jie nich jewaundelt un siene Rajchte jie nich jedonen ha; sonda jie ha no de Rajchte de Nazionen jedonen, dee runtom junt häa sent.

¹³Un daut passieed, aus ekj profezeid, doa storf Pelatja, de Sän Benaja. Un ekj foll dol opp mien Aunjesecht un schrieech met ne lude Stemm un säd: Ach, Har, Gott! West du de Äwajebläwne Israels gaunz venichten?

¹⁴Un daut Wuat Gottes wia to mie aulsoo:

¹⁵Menschensän, diene Breeda, diene Breeda, de Mana diene Frintschoft, sent daut un daut gaunze Hus Israel, aula toop, to dän de Bewona Jerusalems sajen: Blieft wiet auf von däm Harn; ons es daut Launt aus Ieejentum jejäft!

¹⁶Doarom saj: Soo sajcht de Har, Gott: Wan ekj an uk unjre Nazionen jedonen, un wan ekj an uk en de Lenda vestreit ha, soo sie ekj an doch een bät toom Heilichtum en de Lenda jeworden, wuahan see jekomen sent.

¹⁷Doarom saj: Soo sajcht de Har, Gott: Jo, ekj woa junt ut de Velkja saumlen un junt ut de Lenda toopbrinjen, en dee jie vestreit sent jeworden, un woa junt daut Launt Israel jäwen.

¹⁸Un see woaren doahan komen un aul sien Aufschu un aul siene Ojjerajchtichkjeit doarut wajchdoonen.

¹⁹Un ekj woa an een Hoat jäwen, un woa eenen nieen Jeist en äa Ennaliche jäwen; un ekj woa daut steenane Hoat ut äarem Fleesch wajchnämen un an een fleeschnet Hoat jäwen:

²⁰doamet see en miene Sazungen waundlen un miene Rajchte bewoaren un dee doonen; un see woaren mien Volkj, un ekj woa äa Gott sennen.

²¹Oba dee äa Hoat nodäm Hoaten äare Aufschu un äare Aufschu waundlen: dän well ekj äarem Wajch opp äarem Kopp brinjen, sajcht de Har, Gott.

²²Un de Cherubim hoowen äare Flichten, un de Räda wieren bie an; un de Harlichkjeit vom Gott Israels wia bowen äwa an.

²³Un de Harlichkjeit Gottes hoof sikj ut de Medd de Staut un stald sikj opp däm Boajch, dee jäajen Oosten de Staut es.

²⁴Un de Jeist hoof mie nohecht un brocht mie em Jesecht derch däm Jeist Gottes no de Wajchjefieede no Chaldäa; un daut Jesecht, daut ekj jeseenen haud, hoof sikj von mie wajch.

²⁵Un ekj räd to de Wajchjefieede aule Wieed Gottes, dee hee mie haud seenen loten.