Read De Bibel JHF Hesekiel 13 Bible Online

Hesekiel 13 - De Bibel JHF bible

Hesekiel 13

¹Un daut Wuat Gottes wia to mie aulsoo:

²Menschensän, profezei äwa de Profeeten Israels, dee doa profezeien, un to dän saj, dee ut äarem Hoaten profezeien: Hieet daut Wuat Gottes!

³Soo sajcht de Har, Gott: Wee dän Gottloosen Profeeten, dee äarem ieejnen Jeist nogonen un däm, waut see nich jeseenen ha!

⁴Aus de Fass en de Trimma sent, Israel, sent diene Profeeten jeworden.

⁵En de Räten sent jie nich jestäajen, un de Mia ha jie nich vemiat om daut Hus Israel häa, om staunttohoolen em Kaumfdach Gottes.

⁶See kjikjen Faulschet un Läajes Woasajunk, dee doa sajen: «Een Spruch Gottes!» Wan uk de Har an nich jeschekjt haft; un see hopen leeten, daut äa Wuat erfelt wudd.

⁷See jie nich eene faulsche Profezeiunk, un räd jie nich Läajes Woasajunk, aus jie sajen: «Een Spruch Gottes!» Un ekj haud doch nich jerät?

⁸Doarom sajcht de Har, Gott, aulsoo: Wiels jie Faulschet jerät un Läajes seenen, doarom, kjikj, well ekj aun junt, sajcht de Har, Gott;

⁹un miene Haunt woat jäajen de Profeeten sennen, dee Faulschet seenen un Läajes woasajen. En mienem Volkj sien Rot sellen see nich stonen, un en däm Buak vom Hus Israel nich enjeschräwen woaren, un en daut Launt Israel sellen see nich komen. Un jie woaren weeten, daut ekj de Har, Gott, sie.

¹⁰Doarom, jo, doarom daut see mien Volkj erren fieren un sajen: Fräd! Wan doa uk kjeen Fräd es; un dit but eene Waunt, kjikj, see penslen ar met Kaulkj äwa; -

¹¹saj to de Äwapensla: See saul faule! Daut kjemt een äwaschwamenda Räajen; un Hoagelsteena woaren faulen, un een Stormwint woat utbräakjen;

¹²un kjikj, de Mia fält. Woat maun junt nich sajen: Wua es daut Jepenselden, daut jie jepenselt ha?

¹³Doarom, soo sajcht de Har, Gott: Ekj well eenen Stormwint utbräakjen loten en mienem Jrim, un een äwaschwamenda Räajen woat komen en mienem Oaja, un Hoagelsteena em Jrim, too Venichtunk.

¹⁴Un ekj well de Mia aufbräakjen, dee jie met Kaulkj jepenselt ha, un ar oppe Ieed schmieten, daut äa Grunt opjedakjt woat; un see saul faulen, un jie woaren en äare Medd omkomen. Un jie woaren weeten, daut ekj de Har sie.

¹⁵Un soo woa ekj mien Jrim vollbrinjen aun de Mia un aun dän, dee an met Kaulkj bepenslen; un ekj woa to junt sajen: De Mia es nich mea, un dee ar penslen, sent nich mea -

¹⁶de Profeeten Israels, dee äwa Jerusalem profezeien un fa ar frädens Jesechta seenen, woa doch kjeen Fräd doa es, sajcht de Har, Gott.

¹⁷Un du, Menschensän, recht dien Aunjesecht jäajen de Dochta von dienem Volkj, dee ut äarem Hoaten profezeien; un profezei jäajen ar

¹⁸un saj: Soo sajcht de Har, Gott: Wee dän, dee Binj toopneie äwa aule Jelenkja de [miene] Henj un Kopphuwe moaken nom jewossnen Haupt, om Seelen too finje! De Seelen von mienem Volkj finj jie, un june Seelen erhool jie aum Läwen?

¹⁹Un jie entheiljen mie bie mienem Volkj fa eenje Henj voll Joascht un fa eenje Stekja Broot, endäm jie Seelen ombrinjen, dee nich stoawen, un Seelen aum Läwen erhoolen, dee nich Läwen sullen; endäm jie mien Volkj beläaje, daut opp Läajes hieet?

²⁰Doarom sajcht de Har, Gott, aulsoo: Kjikj, ekj well aun june Binj, met dee jie jriepen, well de Seelen wajchfläaje loten un an von june Oarms wajchrieten; un ekj well dee Seelen frieloten, dee jie jriepen, de Seelen, daut see wajchfläaje.

²¹Un ekj woa june Kopphuwe verieten un mien Volkj ut june Haunt raden, doamet see nich mea en june Henj toom Raup woaren. Un jie woaren weeten, daut ekj de Har sie.

²²Wiels jie daut jerajchte Hoat met Läajes kjrenkje, doa ekj am doch nich betriept ha, un wiels jie de Henj de Gottloose stoakjen, doamet hee nich von sienem beesen Wajch omdreit, om sien Läwen too erhoolen:

²³Doarom sell jie nich mea Faulschet seenen un wiedahan nich mea Woasajen; un ekj woa mien Volkj ut june Haunt raden. Un jie woaren weeten, daut ekj de Har sie.