Read De Bibel JHF Hesekiel 15 Bible Online

Hesekiel 15 - De Bibel JHF bible

Hesekiel 15

¹Un daut Wuat Gottes wia to mie aulsoo:

²Menschensän, waut es daut Holt vom Wienstock mea aus aulet aundre Holt, de Rank, dee unjre Beem em Woolt wia?

³Woat doavon Holt jenomen, om daut to eene Oabeit to jebrucken? Ooda nemt maun doavon to eenem Noagel, om irjent een Jereetschoft doaraun opptohenjen?

⁴Kjikj, daut woat däm Fia too Speise jejäft. Haft daut Fia siene beid Enja vebrent un es siene Medd vesenjt, woat daut dan to eene Oabeit duagen?

⁵Kjikj, wan daut noch gaunz es, woat daut to kjeene Oabeit jebrukt; wooväl weinja, wan daut Fia daut vebrent haft un vesenjt es, kaun daut noch to eene Oabeit jebrukt woaren!

⁶Doarom, soo sajcht de Har, Gott: Aus daut Holt vom Wienstock unja de Beem em Woolt, daut ekj däm Fia too Speise jäw, aulsoo jäw ekj de Bewona von Jerusalem doahan;

⁷un ekj woa mien Aunjesecht jäajen an rechten: Ut däm Fia komen see rut, un Fia woat an vebrennen. Un jie woaren weeten, daut ekj de Har sie, wan ekj mien Aunjesecht jäajen an recht.

⁸Un ekj woa daut Launt too eene Wieste moaken, wiels see ontru jehaundelt ha, sajcht de Har, Gott.