Read De Bibel JHF Hesekiel 16 Bible Online

Hesekiel 16 - De Bibel JHF bible

Hesekiel 16

²Menschensän, doo Jerusalem siene Aufschu to weeten

³un saj: Soo sajcht de Har, Gott, too Jerusalem: Dien Aunfank un diene Jebuart es ut däm Kanaanita Launt; dien Voda wia een Amorita, un diene Mutta eene Hethiterin.

⁴Un waut diene Jebuart betraft - aun däm Dach, doa du jebuaren wordst, wort dien Nowel nich aufjeschnäden, un du wordst nich em Wota jeboot too Reinjunk, un nich met Solt aufjeräwen, un nich en Winjlen jewekjelt.

⁵Kjeen Uag kjikjt opp no die, om die eent von dise Dinj to doonen, om sikj die too erboarmen; un du wordst opp däm frieen Flekj jeschmäten, fa Aufschu aun dienem Läwen, aun däm Dach, doa du jebuaren wordst.

⁶Doa jinkj ekj aun die vebie un sach die en dienem Bloot straumple; un ekj säd to die: En dienem Bloot läw! Un ekj säd to die: En dienem Bloot läw!

⁷Too 10 000-de, aus daut Jreens oppem Flekj, moak ekj die; un du wosst heraun un wordst groot, un du kjeemst to de hechste Scheenheit; de Brosten worden rund, un dien Hoa woss; oba du wieescht noaktich un onbedakjt.

⁸Un ekj jinkj aun die vebie un sach die, un kjikj, diene Tiet wia de Tiet de Leew; un ekj breed mien Kjleet äwa die ut, un bedakjt die - dan du wieescht noaktich; un ekj schwua die un jinkj met die een Bunt en, säd de Har, Gott, un du wordst miene.

⁹Un ekj bod die em Wota, un speeld die dien Bloot auf, un saulwd die met Eelj.

¹⁰Un ekj bekjleed die met bunte Kjleeda un trock die Schoo von Seehundfal aun, un ekj omjeef die met Bussus un bedakjt die met Sied;

¹¹un ekj muak die schmock met Schmuck: Ekj läd Oarmrinj aun diene Henj un eene Kjäd om dienen Hauls,

¹²un läd eenen Rinkj en diene Näs un Rinj en diene Uaren, un sad eene Prachtkroon opp dien Haupt.

¹³Un soo wordst du met Golt un Selwa schmock jemoakt, un diene Kjleeda wieren Bussus un Sied un Buntjemoaktet; du autst fienet Mäl un Honnich un Eelj. Un du wieescht sea scheen un kjeemst toom Kjennichtum (Iea).

¹⁴Un dien Roop jinkj ut unja de Nazionen wäajen diene Scheenheit; dan see wia vollkomen derch miene Harlichkjeit, dee ekj opp die jelajcht haud, sajcht de Har, Gott.

¹⁵Oba du vetrusd opp diene Scheenheit, un du huascht opp dienen Roop häa un gootst diene Huararie äwa de Vebiegonende ut: Am wort dee toom Deel.

¹⁶Un du neemst von diene Kjleeda un muakst die bunte Hechten, un du huascht doa bowen - waut nich väakomen un nich passieren sull.

¹⁷Un du neemst diene prachtvolle Sachen von mienem Golt un von mienem Selwa, daut ekj die jejäft haud, un muakst die Maunsbilda un huascht met an.

¹⁸Un du neemst diene bunt jewäwden Kjleeda un bedakjst an doamet; un mien Eelj un mien Rieekjastoff (Weiruak, seeta Ruak) sadsd du an väa;

¹⁹un miene Speise, dee ekj die jeef: Fienet Mäl un Eelj un Honnich, met waut ekj die sautjemoakt haud, dee sadsd du an väa toom leeftoljen Jeroch. Un daut es passieet, sajcht de Har, Gott.

²⁰Un du neemst diene Säns un diene Dajchta, dee du mie jebuaren, un opfascht dee an toom Fross.

²¹Wia daut to weinich aun diene Huararie, daut du miene Kjinja schlachst un an hanjeefst, endäm du an derch daut Fia gonen leetst?

²²Un bie aul diene Aufschu un diene Huararie dochst du nich aun de Doag en diene Jugent, aus du noaktich un onbedakjt wieescht, straumpelnd en dienem Bloot lagst.

²³Un daut passieed, no aul diene Boosheit (wee, wee die! Sajcht de Har, Gott)

²⁴du busd die Rundunge un muakst die Hechten opp aule Gaussen;

²⁵aun jiedre Gaussenakj busd du diene Hechten, un du muakst diene Scheenheit too Schaund un breedsd diene Feet jäajen jiedrem Vebiegonenden; un du vemeascht diene Huararie.

²⁶Du huaschd met de Säns de Ägipta, diene Nobasch, dee groot aun Fleesch sent; un du vemeascht diene Huararie, om mie too reizen.

²⁷Un kjikj, ekj strakj miene Haunt jäajen die ut un vekjartad daut die Bestemmte; un ekj jeef die de Jia han, dee die haussen, de Dochta de Filista, dee sikj fa diene onzuchtje Wäaj schämt.

²⁸Un du huascht met de Säns de Assura, wiels du nich saut woaren kaust; un du huaschd met an un wordst uk nich saut.

²⁹Un du vemeascht diene Huararie nodäm Haundelslaunt Chaldäa han; un uk doavon wordst du nich saut.

³⁰Woo schmachtend es dien Hoat! Sajcht de Har, Gott, endäm du dit aules deist, daut Doonen von eene utjeläsne Huarenfru,

³¹endäm du diene Rundunge bust aun jiedre Gaussenakj un diene Hechten opp aule Gaussen moakst. Un du wieescht nich eenmol aus eene Hua, endäm du dien Loon vespotst;

³²dee ehebräakjarische Fru nemt staut äarem Maun Framde aun!

³³Aule Huaren jeef maun Jeschenkja; oba du jeefst diene Jeschenkja aule diene Bolles, un du beschenkjst an, doamet see von runtom häa no die kjeemen, om met die Huararie too driewen.

³⁴Un daut passieed bie die met diene Huararie aundasch aus bie aundre Frues, daut maun die nich nohuad; dan endäm du Loon jeefst un die kjeen Loon jejäft wort, best du aundasch jewast.

³⁵Doarom, Hua, hia daut Wuat Gottes!

³⁶Soo sajcht de Har, Gott: Wiels diene Orreinichkjeit utjegoten un diene Noaktheit opjedakjt es en diene Huararie met diene Bolles, un wäajen aul diene schentelje Jetzen un wäajen daut Bloot diene Kjinja, daut du an jejäft hast:

³⁷Doarom, kjikj, woa ekj aul diene Bolles saumlen, dän du jefollen hast, un aule, dee du jeleeft, met aule, dee du jehaust hast. Un ekj woa an von runtom jäajen die saumlen un diene Noaktheit ver an opdakjen, soo daut see diene gaunze Noaktheit seenen woaren.

³⁸Un ekj woa die rechten no de Rajchte de Ehebräakja un de Bloot vejeeta, un die toom Jrimbloot moaken un de Aufgonst.

³⁹Un ekj woa die en äare Henj jäwen, doamet see diene Rundunge aufbräakjen un diene Hechten dolrieten, un die diene Kjleeda uttrakjen un dien prachtvollet Schmuck nämen un die noaktich un opjedakjt ligjen loten.

⁴⁰Un see woaren eene Vesaumlunk jäajen die bestale un die steenjen, un woaren die met äare Schwieets derchstäakjen.

⁴¹Un see woaren diene Hiesa met Fia vebrennen un Jerecht aun die eewen ver de Uagen väle Frues. Un soo woa ekj die opphieren loten, eene Hua to sennen, un du woascht uk kjeen Loon mea jäwen.

⁴²Un ekj woa mien Jrim aun die stelle, un mien Iewa woat von die dreien; un ekj woa ruich sennen un mie nich mea kjrenkje.

⁴³Doarom, daut du nich dochst aun diene Jugentdoag un mie derch aul dit jereizt hast, kjikj, soo ha uk ekj dien Wajch opp dienen Kopp jebrocht, sajcht de Har, Gott, doamet du nich mea dise Schaunddot no aul diene Aufschu bejeist.

⁴⁴Kjikj, jiedra Spruchrädna woat äwa die daut Spruchwuat räden un sajen: Aus de Mutta, soo äare Dochta.

⁴⁵Du best de Dochta von diene Mutta, dee äarem Maun un äare Kjinja veacht; un du best de Sesta von diene Sestren, dee äare Mana un äare Kjinja veachten. June Mutta wia eene Hethiterin, un jun Voda een Amorita.

⁴⁶Un diene jratre Sesta es Samaria met äare Dajchta, dee aun diene Linkje wont; un diene Sesta, dee kjlanda es aus du, un dee aun diene Rajchte wont, es Sodom met äare Dajchta.

⁴⁷Oba nich opp äare Wäaj hast du jewaundelt, un nich blooss een bät no äare Aufschu jedonen; dan du hast vedoawlicha jehaundelt aus see opp aul diene Wäaj.

⁴⁸Soo woa ekj läw, sajcht de Har, Gott, Sodom, diene Sesta, see un äare Dajchta ha nich jedonen, aus du jedonen hast, du un diene Dajchta!

⁴⁹Kjikj, dit wia de Misdot von Sodom, diene Sesta: Stolt, de Menj von Broot un sorjloose Ru haud see met äare Dajchta, oba de Haunt vom Älenden un däm Oamen stoakjt see nich;

⁵⁰un see wieren huachmootich un eewden Aufschu ver mienem Aunjesecht. Un ekj deed ar wajch, sooboolt ekj daut sach.

⁵¹Un Samaria haft nich mol de Halft von diene Sinden jesindicht; un du hast dien Aufschu mea jemoakt aus see, un hast diene Sestren jerajchtfoadicht derch aul diene Aufschu, dee du veeewt hast.

⁵²Soo droag uk du diene Schmach, dee du diene Sestren aunvetrut hast; derch diene Sinden, dee du schentelja jedonen hast aus see, sent see jerajchta aus du. Un soo woa uk du too Schaund un droag diene Schmach, wiels du diene Sestren jerajchtfoadicht hast.

⁵³Un ekj woa äare Jefangenschoft dreien, de Jefangenschoft von Sodom un äare Dajchta un de Jefangenschoft von Samaria un äare Dajchta, un de Jefangenschoft diene Jefangne en äare Medd:

⁵⁴Om daut du diene Schmach drajchst un die aul däm schämst, waut du jedonen hast, endäm du ar treest.

⁵⁵Un diene Sestren, Sodom un äare Dajchta, woaren trigjgonen no äarem oolen Staund; un Samaria un äare Dajchta woaren trigjgonen no äarem oolen Staund; un uk du un diene Dajchta, jie woaren trigjgonen no junem oolen Staund.

⁵⁶Un Sodom, diene Sesta, wort nich erwänt en dienem Mul aun dienem Stolten Dach,

⁵⁷ea diene Boosheit opjedakjt wort, aus too Tiet de Vespottung de Dajchta Sierien un aul äare Omjäajent, de Dajchta de Filista, dee die runtom veachten.

⁵⁸Diene Onzucht un diene Aufschu, du woascht dee droagen, sajcht de Har.

⁵⁹Dan soo sajcht de Har, Gott: Jo, ekj well die doonen, soo aus du jedonen, dee du däm Eit veacht un däm Bunt jebroaken hast.

⁶⁰Doch ekj well mienen Bunt met die en de Doag diene Jugent jedenkjen, un well die eenen eewjen Bunt opprechten.

⁶¹Un du woascht diene Wäaj jedenkjen un die schämen, wan du diene Sestren oppnämen woascht, dee jrata sent aus du, met dän, dee kjlanda sent aus du, un ekj dee die too Dajchta jäwen woa, oba nich wäajen dienen Bunt.

⁶²Un ekj woa mienen Bunt met die opprechten, un du woascht weeten, daut ekj de Har sie:

⁶³Om daut du doaraun denkjst un die schämst, un daut Mul nich mea opmoakst wäajen diene Schmach, wan ekj die aules vezei, waut du jedonen hast, sajcht de Har, Gott.