Read De Bibel JHF Hesekiel 17 Bible Online

Hesekiel 17 - De Bibel JHF bible

Hesekiel 17

¹Un daut Wuat Gottes wia to mie aulsoo:

²Menschensän, jeff een Rotsel opp un räd een Jlikjnis toom Hus Israel,

³un saj: Soo sajcht de Har, Gott: Een groota Odla met groote Flichten, lange Fadren, voll bunte Fadren, kaum nom Libanon un naum de Spetz von eene Zeeda.

⁴Däm bowaschten äare Asta bruak hee auf un brocht am en een Haundelslaunt, en eene Staut von Hendla sad hee däm Aust han.

⁵Un hee naum von däm Laundessomme (Sotich) un sad am en een Sotflekj, hee brocht am no väl Wota, behaundeld am aus een Wiedeboom.

⁶Un hee woss un wort een wuchraja Wienstock von kjlienem Jewauss, doamet siene Ranken sikj nom Odla handreien un siene Wartlen unja am wieren; un hee wort een Wienstock un dreef Asta un breed sien Jreens ut.

⁷Un doa wia een aundra groota Odla met groote Flichten un väl Fadren. Un kjikj, von dee Städ wua hee jeplaunt wia strakjt dis Wienstock siene Wartlen darschtich ut no am han un breed siene Ranken no am ut, doamet hee am drenkjt.

⁸En een goodet Flekj, aun väl Wota wia hee jeplaunt, om Asta too driewen un Frucht too droagen, om to eenem harlichen Wienstock to woaren.

⁹Saj: Soo sajcht de Har, Gott: Woat hee jedieen? Woat maun nich siene Wartlen utrieten un siene Frucht utschnieden, soo daut hee omkjemt? Aule fresche Bläda von siene Asta woaren vedrieejen; un nich met grootem Oarm un väl Volkj woat daut mäajlich sennen, am von siene Wartlen opptohäwen.

¹⁰Un kjikj, hee es zwoa jeplaunt, woat hee jedieen? Woat hee nich, sooboolt de Oostwint am aunschieet, gaunz vedräjen? Opp dee Städ, wua hee waust, woat hee vedrieejen.

¹¹Un daut Wuat Gottes wia to mie aulsoo:

¹²Saj doch toom wadaspanstjen Hus: Weet jie nich, waut daut es? Saj: Kjikj, de Kjennich von Babel es no Jerusalem jekomen, un haft sienen Kjennich un siene Ferschten wajchjenomen un haft an no sikj no Babel jefieet.

¹³Un hee haft vom Kjennichssomme jenomen un eenen Bunt met am jemoakt, un haft am eenen Eit engonen loten; oba de Majchtje vom Launt haft hee metjenomen,

¹⁴doamet daut Kjennichrikj jerinj wia, om daut et sikj nich erhäft, un doamet hee sienen Bunt helt, om daut et besteit.

¹⁵Oba hee erhäft sikj jäajen am, endäm hee siene Booten no Ägipten schekjt, doamet dee am Pieed un väl Volkj jeft. Woat hee Jlekj ha? Woat hee, dee soowaut jedonen haft, entranen? Doa hee däm Bunt jebroaken haft, sull hee entranen?

¹⁶Soo woa ekj läw, sajcht de Har, Gott, wan hee nich aun däm Kjennichsuat, dee am toom Kjennich jemoakt haft, däm sien Eit hee veacht un däm sien Bunt hee jebroaken haft, bie am en Babel stoawen woat!

¹⁷Un de Farao woat nich met eenem grootem Häa un met eene groote Schoa fa am irjent waut em Kjrich utrechten, wan maun eenen Waul oppschedde woat un Beloagrungstorms but, om väl Seelen uttoroden.

¹⁸Doa hee dän Eit veacht un dän Bunt jebroaken haft - un kjikj, hee haft siene Haunt doaropp jejäft un deed dannoch aul dit, - soo woat hee nich entranen.

¹⁹Doarom sajcht de Har, Gott, aulsoo: Soo woa ekj läw, wan ekj nich mien Eit, däm hee veacht, un mien Bunt, däm hee jebroaken haft, am opp sienen Kopp brinj!

²⁰Un ekj well mien Nat äwa am utbreeden, un en miene Benja woat hee jefangen woaren; un ekj well am no Babel brinjen un doamet am wäajen siene Truloosichkjeit rechten, dee hee jäajen mie begonen haft.

²¹Un aul siene Flichtlinja unja aul siene Schoa, see woaren derch daut Schwieet faulen, un de Äwajebläwne en aule Wind vestreit woaren. Un jie woaren weeten, daut ekj, de Har, jerät ha.

²²Soo sajcht de Har, Gott: Un ekj woa vonne Spetz de huage Zeeda eenen Aust nämen un am ensaten; von däm bowaschten äare Asta woa ekj eenen zoaten aufbräakjen un am plaunten opp eenem huagen un erhoownen Boajch.

²³Opp däm huagen Boajch Israels woa ekj am plaunten; un hee woat Asta driewen un Frucht droagen un to eene harliche Zeeda woaren; un unja ar woaren aule Väajel wonen, aulet Flieejendet: Em Schauten von äare Asta woaren see wonen.

²⁴Un aule Beem vom Flekj woaren erkjanen, daut ekj, de Har, däm huagen Boom läach moak, däm läajen Boom huach jemoakt ha, däm jreenen Boom vedrieejen un däm drieejen Boom jreene leet. Ekj, de Har, ha jerät un woa daut doonen.