Read De Bibel JHF Hesekiel 18 Bible Online

Hesekiel 18 - De Bibel JHF bible

Hesekiel 18

¹Un daut Wuat Gottes wia to mie aulsoo:

²Waut ha jie, daut jie disem Spruch em Launt Israel jebrucke un sajen: De Vodasch auten wille Druwen, un de Tänen de Säns worden stomp?

³Soo woa ekj läw, sajcht de Har, Gott, wan jie wiedahan disem Spruch en Israel jebrucke sullen!

⁴Kjikj, aule Seelen sent miene; aus de Seel vom Voda, soo uk de Seel de Säns: See sent miene; dee Seel, dee sindicht, dee saul stoawen.

⁵Un wan wäa jerajcht es un Rajcht un Jerajchtichkjeit eeft,

⁶oppe Boaj nich at un siene Uagen nich erhäft no de Jetzen vom Hus Israel, un de Fru von sienem Näakjsten nich veonreinicht un de Fru en äare Orreinichkjeit nich noda kjemt,

⁷un kjeenem bedrekjt, sienem Schildna aules trigjjeft, kjeen Raup bejeit, sien Broot däm Hungajen jeft un däm Noaktjen met een Kjleet bedakjt.

⁸Opp Zins nuscht jeft un Jewenst nich nemt, siene Haunt vom Orrajcht trigjhelt, de Woarheit jemäss tweschen Maun un Maun recht,

⁹en miene Sazungen waundelt un miene Rajchte helt, om no de Woarheit too haundlen: Dee es jerajcht; hee saul jewess läwen, sajcht de Har, Gott.

¹⁰Oba haft (zeicht) hee eenen Jewault doonenden Sän, dee Bloot vejit un irjent waut von disem deit -

¹¹oba hee selfst haft aul dit nich jedonen - wan hee soogoa oppe Boaj at, un de Fru von sienem Näakjsten veonreinicht,

¹²däm Älenden un däm Oamen bedrekjt, Raup bejeit, Schulde nich trigjjeft, un siene Uagen no de Jetzen opphäft, Aufschu veeewt,

¹³opp Jewenst jeft un Wucha nemt: Saul hee läwen? Hee saul nich läwen! Aul dise Aufschu haft hee veeewt: Hee saul jewess dootjemoakt woaren, sien Bloot saul opp am sennen.

¹⁴Un kjikj, daut haft (zeicht) eena eenen Sän, un disa sitt aule Sinden von sienem Voda, dee hee deit; hee sitt dee un deit nich aulsoo:

¹⁵hee at nich oppe Boaj un erhäft nich siene Uagen no de Jetzen vom Hus Israel, hee veonreinicht nich de Fru von sienem näakjsten,

¹⁶un hee bedrekjt kjeenem, nemt kjeen Paunt (toom birjen) un bejeit kjeenen Raup, hee jeft däm Hungajen sien Broot un bedakjt däm Noaktjen met een Kjleet,

¹⁷hee helt siene Haunt vom Älenden trigj, nemt kjeen Zins noch Jewenst, hee deit miene Rajchte, waundelt en miene Sazungen: Dee woat nich wäajen de Ojjerajchtichkjeit von sienem Voda stoawen; hee saul jewess läwen.

¹⁸Sien Voda, wiels hee Jewault eewd, Raup aum Brooda bejinkj, un jedonen haft waut nich goot wia enne Medd von sienem Volkj: kjikj, dee saul wäajen siene Ojjerajchtichkjeit stoawen.

¹⁹Un jie sajen: Wuarom drajcht de Sän de Ojjerajchtichkjeit von sienem Voda nich met? De Sän haft Rajcht un Jerajchtichkjeit jeeeft, haft aul miene Sazungen jehoolen un dee jedonen: Hee saul jewess läwen.

²⁰Dee Seel, dee sindicht, dee saul stoawen. Een Sän saul nich de Ojjerajchtichkjeit vom Voda metdroagen, un een Voda nich de Ojjerajchtichkjeit vom Sän metdroagen; de Jerajchtichkjeit de Jerajchte saul opp am sennen, un de Gottloosichkjeit vom Gottloosen saul opp am sennen.

²¹Oba wan de Gottloosa omdreit von aul siene Sinden, dee hee jedonen haft un aul miene Sazungen helt un Rajcht un Jerajchtichkjeit eeft, soo saul hee jewess läwen, hee saul nich stoawen.

²²Aule siene Äwaträdungen, dee hee jedonen haft, sellen am nich jedocht woaren; wäajen siene Jerajchtichkjeit, dee hee jeeeft haft, saul hee läwen.

²³Ha ekj irjentwoo Jefaulen aum Doot de Gottloose, sajcht de Har, Gott? Nich välmea doaraun, daut hee von siene Wäaj omdreit un läft?

²⁴Oba wan een Jerajchta von siene Jerajchtichkjeit omdreit un orrajcht deit, no aul de Aufschu deit, dee de Gottloosa veeewt haft, sull hee läwen? Aule siene jerajchte Doten, dee hee jedonen haft, saul nich jedocht woaren; wäajen siene Truloosichkjeit, dee hee begonen, un wäajen siene Sinden, dee hee jedonen haft, wäajen dise saul hee stoawen. -

²⁵Un jie sajen: De Wajch vom Harn es nich rajcht. Hieet doch, Hus Israel: Es mien Wajch nich rajcht? Sent nich välmea june Wäaj nich rajcht?

²⁶Wan een Jerajchta von siene Jerajchtichkjeit omdreit un orrajcht deit, un stoaft doawäajen, soo stoaft hee wäajen sien Orrajcht, daut hee jedonen haft.

²⁷Oba wan een Gottloosa omdreit von siene Gottloosichkjeit, dee hee begonen haft, un Rajcht un Jerajchtichkjeit eeft: Hee woat siene Seel aum Läwen erhoolen.

²⁸Sitt hee daut en un hee dreit om von aul siene Äwaträdungen, dee hee begonen haft, soo saul hee jewess läwen, hee saul nich stoawen. -

²⁹Oba daut Hus Israel sajcht: De Wajch vom Harn es nich rajcht. Sent miene Wäaj nich rajcht, Hus Israel? Sent nich välmea june Wäaj nich rajcht?

³⁰Doarom woa ekj junt rechten, Hus Israel, eenem jiedrem no siene Wäaj, sajcht de Har, Gott. Dreit om, un dreit junt auf von aule june Äwaträdungen, daut et junt nich een Aunstoos too Misdot woat;

³¹schmiet von junt aul june Äwaträdungen, met waut jie äwaträden ha, un schauft junt een nieet Hoat un eenen nieen Jeist! Dan wuarom well jie stoawen, Hus Israel?

³²Dan ekj ha kjeen jefaulen aum Doot de Stoawende, sajcht de Har, Gott. Soo dreit om un läft!