Read De Bibel JHF Hesekiel 19 Bible Online

Hesekiel 19 - De Bibel JHF bible

Hesekiel 19

¹Un du, erhäw een Kloagleet äwa de Ferschten Israels

²un saj: Waut fa eene Muttaleiw wia diene Mutta! Tweschen Leiws loagat see, unja junge Leiws trock see äare Junge groot.

³Un see trock eent von äare Junge opp, daut wort een junga Leiw; un hee lieed Raup too roowen, un hee freet Menschen.

⁴Un de Velkja hieeden von am, en äare Kul wort hee jefangen; un see brochten am met Näsrinj en daut Ägiptenlaunt.

⁵Un aus see (Muttaleiw) sach, daut äare Hopninj doahan, veloaren wia, doa neem see een aundret von äare Junge, un muak daut to eenem jungen Leiw.

⁶Un hee waundeld unja Leiws, wort een junga Leiw; un hee lieed Raup roowen, hee fraut uk Menschen.

⁷Un hee kjand äare vedorwne Paulausten, vewust äare Städa; un daut Launt un siene Menj enjsten sikj ver de Stemm von sienem Brelle.

⁸Doa stalden sikj jäajen am de Velkja runtom ut de Launtschoft; un see breeden äa Nat äwa am ut, en äare Kul wort hee jefangen.

⁹Un see saden am met Näsrinj en een Klotkje un brochten am nom Kjennich von Babel; see brochten am en eene de Fastinj, om daut siene Stemm nich mea jehieet wort opp de Boaj Israels.

¹⁰Diene Mutta wia aus een Wienstock, aus du aum Wota jeplaunt; von väl Wota wort hee fruchtboa un voll Ranken.

¹¹Un hee kjrieech stoakje Asta too Harscha Zepta, un sien Jewauss hoof sikj bat tweschen de Wolkjen; un hee wort jeseenen derch siene Hecht, derch siene väle Asta.

¹²Doa wort hee em Jrim utjeräten, oppe Ieed jeschmäten, un de Oostwint leet siene Frucht vedrieejen; siene stoakje Asta worden aufjeräten un drieech, Fia vebrend an.

¹³Un nu es hee en de Wieste jeplaunt, en een drieejet un darschtjet Launt.

¹⁴Un daut jinkj Fia ut däm Aust von siene Ranken, haft siene Frucht vebrent; un aun am es kjeen stoakja Aust mea, kjeen Zepta toom Harschen. Daut es een Kloagleet un woat toom Kloagleet.