Read De Bibel JHF Hesekiel 2 Bible Online

Hesekiel 2 - De Bibel JHF bible

Hesekiel 2

¹Un hee räd met mie: Menschensän, stal die opp diene Feet, un ekj well met die räden.

²Un aus hee to mie räd, kaum de Jeist en mie un stald mie opp miene Feet; un ekj hieed däm, dee to mie räd.

³Un hee säd to mie: Menschensän, ekj schekj die no de Kjinja Israel, no de Wadaspanstje Nazion, dee sikj jäajen mie jestalt ha; see un äare Vodasch sent von mie aufjefollen bat opp disem Dach.

⁴Un dise Kjinja sent met schaundloosen Aunjesecht un hoade Hoaten; no an schekj ekj die, un du saust to an räden: «Soo sajcht de Har, Gott!»

⁵Un see, muchten see hieren ooda daut loten (dan see sent een wadaspanstjet Hus), see sellen doch weeten, daut een Profeet en äare Medd wia.

⁶Un du, Menschensän, fercht die nich fa an un fercht die nich fa äare Wieed; dan Hachels un Dornen sent bie die, un bie Skorpionen wonst du. Forcht die nich fa äare Wieed, un erschrakj nich ver äarem Aunjesecht; dan een wadaspanstjet Hus (Volkj) sent see.

⁷Un du saust miene Wieed to an räden, muchten see hieren ooda daut loten; dan see sent wadaspanstich.

⁸Un du, Menschensän, hia, waut ekj to die räd; sie nich wadaspanstich aus daut wadaspanstje Hus; doo dien Mul op un at, waut ekj die jäw. -

⁹Un ekj sach: Un kjikj, eene Haunt wia jäajen mie utjestrakjt; un kjikj, en dee selje wia eene Buakroll.

¹⁰Un hee breed de ver mie ut, un see wia oppe Ieeschte- un opp de Latste Sied beschräwen; un daut wieren doabowen Kloagen un Seften un Wee jeschräwen. -