Read De Bibel JHF Hesekiel 23 Bible Online

Hesekiel 23 - De Bibel JHF bible

Hesekiel 23

²Menschensän, daut wieren twee Frues, Dajchta eene Mutta.

³Un see huaden en Ägipten, en äare Jugent huaden see; doa worden äare Brosten jedrekjt, un doa betaust maun äarem jungfrue Bossem.

⁴Un äare Nomes sent Ohola, de jratre, un Oholiba, äare Sesta. Un see worden miene un brochten Säns un Dajchta too Welt; un waut äare Nomes betraft: Samara es Ohola, un Jerusalem es Oholiba.

⁵Un Ohola huad, aus see bie mie wia. Un see haud velangen no äare Bolles, jäajen de Assura, dee dichtbie wieren,

⁶jekjleed en blauen Purpur, Launtfläaja un Stauthoola, aula toop scheene Jinjlinje, Rittasch, un reeden opp Pieed.

⁷Un see recht äare Huararie opp an, de Uterwälde de Säns von Assur aula toop; un met aule, no wäm see velangd, met aul äare Jetzen veonreinijd see sikj.

⁸Un uk äare Huararie von Ägipten häa leet see nich; dan see hauden bie ar jeläajen en äare Jugent, un hauden äaren jungfrue Bossem betaust un äare Huararie äwa ar utjegoten.

⁹Doarom ha ekj ar en de Haunt äare Bolles jejefft, en de Haunt de Säns von Assur, nodäm see velangen haud.

¹⁰See dakjten äare Noaktheit op, naumen äare Säns un äare Dajchta wajch, un see selfst muaken dee met daut Schwieet doot; un soo wort see unjre Frues veacht, un maun eewd Jerecht aun ar.

¹¹Un äare Sesta Oholiba sach daut, un see dreef äare Lost oaja aus dee, un äare Huararie wieda aus de Huararie äare Sesta.

¹²See haud velangen no de Säns von Assur, Launtfläaja un Stauthoola, dee dichtbie wieren, prachtvoll jekjleed, Rittasch, opp Pieed rieden, aula toop scheene Jinjlinje.

¹³Un ekj sach, daut see sikj veonreinicht hauden: däm seljen Wajch hauden beid.

¹⁴Oba see dreef äare Huararie noch wieda; dan see sach Mana, aun de Waunt nenn jehakt, Bilda von Chaldäa, met Foaw jemolt,

¹⁵met eenem Jirtel aun äare Lenden ombungen, äwahenjende Kopbunj opp äare Heipta, vom utseenen Rittasch, aus de Säns von Babel en Chaldäa, äarem Jeburtslaunt;

¹⁶un see velangd no an, aus äare Uagen an sagen, un see schekjt Booten no an no Chaldäa.

¹⁷Un de Säns von Babel kjeemen no ar, nom Leewesloaga, un veonreinichte ar derch äare Huararie. Un aus see sikj aun an veonreinicht haud, reet see äare Seel von an loos.

¹⁸Un aus see äare Huararie opdakjte un äare Noaktheit opdakjte, doa reet miene Seel sikj von ar loos, soo aus sikj miene Seel von äare Sesta loosjeräten haud.

¹⁹Un see vemieeden äare Huararie, endäm see de Jugentdoag jedocht, aus see em Ägiptenlaunt huad.

²⁰Un see velangd no äare Bolles, dee äa Fleesch aus daut Eselfleesch, un dee äa utjeeten aus bie de Hinjste wia.

²¹Un du kjikjst die om no de Onzucht diene Jugent, aus dee von Ägipten dien Bossem betauste om diene jugentliche Brosten wellen.

²²Doarom Oholiba, soo sajcht de Har, Gott: Kjikj, ekj erwakj jäajen die diene Bolles, von dän sikj diene Seel loosjeräten haft, un lot an von runtom äwa die komen:

²³De Säns Babel un aule Chaldäa, Pekod un Schoa un Koa, aule Säns Assur met an, schmocke Jinjlinje, Launtfläaja un Stauthoola aula toop, Rittasch un Beroopne aula opp Pieed rieden.

²⁴Un see woaren äwa die met Jewäaren komen, Woages un Räda, un met ne Volkjsmenj; Schild un Brostschilt un Helm woaren see runtom jäajen die rechten. Un ekj woa an daut Jerecht äwajäwen, un see woaren die no äare Rajchte rechten.

²⁵Un ekj well mien Iewa jäajen die rechten, un see woaren em Jrim met die vefoaren: Diene Näs un diene Uaren woaren see aufschnieden, un waut die äwablift woat derch daut Schwieet faulen; diene Säns un diene Dajchta woaren see wajchnäme, un waut die äwablift woat derch daut Fia vebrent woaren.

²⁶Un see woaren die diene Kjleeda uttrakjen un dien Schmuck wajchnäme.

²⁷Un ekj well moaken, daut diene Schaund von die lat, un diene Huararie vom Ägiptenlaunt, soo daut du diene Uagen nich mea no an opphäwst un aun Ägipten nich mea denkjen woascht.

²⁸Dan soo sajcht de Har, Gott: Kjikj, ekj jäw die en dee äare Haunt, dee du haust, en dee äare Haunt, von dän sikj diene Seel loosjeräten haft.

²⁹Un see woaren en äarem Hauss met die vefoaren, un dien gaunzen Jewenst wajchnämen un die noaktich un onbedakjt loten; un diene huararische Noaktheit un diene Onzucht un diene Huararie woaren opjedakjt woaren.

³⁰Soowaut woat die passieren, wiels du de Nazionen nojehuat hast, wiels du die met äare Jetzen veonreinicht hast.

³¹Opp däm Wajch von diene Sesta hast du jewaundelt, un soo well ekj äa Kuffel en diene Haunt jäwen.

³²Soo sajcht de Har, Gott: Du woascht daut Kuffel von diene Sesta drinkjen, däm deepen un wieden: Toom Jelach un toom Spott woat hee rieekjen, wiels hee soo groot es.

³³Voll, bedrunken un Kumma woascht du sennen; daut Kuffel von diene Sesta Samara es een Kuffel von Entsaten un Schauda.

³⁴Un du woascht am drinkjen un utschlurpse, un woascht siene Schoawels auflekje un diene Brosten verieten; dan ekj ha jerät, sajcht de Har, Gott.

³⁵Doarom soo sajcht de Har, Gott: Wiels du mie vejäten un mie hinja dienen Rigjen jeschmäten hast, soo droag du uk diene Onzucht un diene Huararie.

³⁶Un de Har säd to mie: Menschensän, west du de Ohola un de Oholiba rechten? Soo doo an äare Aufschu to weeten.

³⁷Dan see ha Ehebruch jedräwen, un Bloot es aun äare Henj; un met äare Jetzen ha see Ehebruch jedräwen, un soogoa äare Kjinja, dee see mie jebuaren ha, ha see an derch daut Fia toom Fräten gonen loten.

³⁸Noch dit ha see mie jedonen: See ha mien Heilichtum veonreinicht aun däm seljen Dach un miene Sabaten entheilicht.

³⁹Dan wan see äare Kjinja fa äare Jetzen schlachten, soo kjeemen see aun däm selje Dach en mien Heilichtum, daut to entheiljen; un kjikj, aulsoo ha see jedonen enne Medd von mienem Hus.

⁴⁰Jo, see ha soogoa no Mana jeschekjt, dee vom wieden komen sullen, - no dän een Boote jeschekjt wort, un kjikj, see kaumen - ver dee du die bodsd, diene Uagen schmock muakst un die Schmuck ommhenjsd,

⁴¹un die opp een prachtvollet Polsta sadsd, ver däm een Desch jedakjt wia; un doanopp sadsd du mien Rieekjastoff (Weiruak, seeta Ruak) un mien Eelj.

⁴²Un doabie wia de Stemm von eene sorjloose Menj. Un no de Mana ut de Menschenmenj worden Sabäa ut de Wieste jebrocht; un dee läden Oarmrinj aun äare Henj un saden an prachtvolle Kroonen opp äare Heipta.

⁴³Doa säd ekj von dee derch Ehebruch Krauftloose: Woat see, jo see, nu noch äare Huararie driewen?

⁴⁴Un maun jinkj no ar en, aus maun no eene Hua enennjeit, soo jinjen see no Ohola un no Oholiba, de onzuchtje Frues.

⁴⁵Oba jerajchte Mana, dee woaren an rechten nodäm Rajcht de Ehebräakjarine un nom Rajcht de Bloot vejeetende; dan see sent Ehebräakjarine, un Bloot es aun äare Henj.

⁴⁶Dan soo sajcht de Har, Gott: Ekj well eene Vesaumlunk jäajen an noppfieren, un ar too Meshaundlunk un toom Raup äwajäwen.

⁴⁷Un de Vesaumlunk woat an steenjen un an met äarem Schwieet vehaken; äare Säns un äare Dajchta woaren see ombrinjen un äare Hiesa met Fia vebrennen.

⁴⁸Un soo woa ekj de Onzucht ut däm Launt schaufen, doamet aule Frues sikj trajchtwiesen loten un nich no äare Onzucht doonen.

⁴⁹Un see woaren äare Onzucht opp junt brinjen, un de Sinden von june Jetzen woa jie droagen. Un jie woaren weeten, daut ekj de Har, Gott, sie.