Read De Bibel JHF Hesekiel 24 Bible Online

Hesekiel 24 - De Bibel JHF bible

Hesekiel 24

¹Un daut Wuat Gottes wia to mie aum näajenden Joa, em 10-den Moonat, aum 10-den em Moonat, aulsoo:

²Menschensän, schriew die däm Nomen vom Dach opp, von disem Dach! Aun disem Dach kjeem de Kjennich von Babel jäajen Jerusalem aun.

³Un räd een Jlikjnis to däm wadaspanstjen Hus un saj to an: Soo sajcht de Har, Gott: Sat däm Topp opp, sat opp, un jeet uk Wota nenn.

⁴Doo siene Stekja toop doa nenn, aule goode Stekja, Lenden un Schulla; fell am met de baste Knoakes.

⁵Nemm daut baste Kjlienvee, un uk een Holtstekj fa de Knoakes doaunja; lot daut koaken, daut uk siene Knoakes doabennen koaken.

⁶Doarom sajcht de Har, Gott, aulsoo: Wee, Staut de Blootschult! Topp, aun däm noch Schum es, un de Schum nich von am aufjeit! Stekj fa Stekj holl an rut; daut Loss es nich äwa an jeschmäten.

⁷Dan äa Bloot es en äare Medd: See haft daut opp eenen kolen Steen jedonen, see haft daut nich oppe Ieed jegoten, daut maun daut met Stoff bedakjen kunn.

⁸Om Jrim nopp tofieren, om Rach too eewen, ha ekj äa Bloot opp eenen kolen Steen jegoten, doamet daut nich bedakjt wort.

⁹Doarom, soo sajcht de Har, Gott: Wee, Staut de Blootschult! Uk ekj woa daut Holtstekj groot moaken.

¹⁰Rop daut Holt oppem Hupe, stekj daut Fia aun, moak daut Fleesch goa un lot de Bräj utkoaken, un de Knoakes sellen aunbrenne!

¹¹Un stal am ladich opp siene Kole, doamet sien Koppa heet un jläjend woat, un siene Orreinichkjeit en am schmelt, sien Schum vejeit.

¹²De Bemieejunk haft hee utjeschapt, un sien väla Schum jeit nich von am auf; em Fia met sienem Schum!

¹³En diene Orreinichkjeit es Onzucht. Wiels ekj die jereinicht ha un du nich rein jeworden best, soo woascht du von diene Orreinichkjeit nich mea rein woaren, bat ekj mienem Jrim aun die stell.

¹⁴Ekj, de Har, ha jerät. Daut kjemt, un ekj woa daut doonen; ekj woa nich aufloten un woa kjeen Metleet ha un mie daut nich woa loten leet woaren. No diene Wäaj un no diene Haundlungen woaren see die rechten, sajcht de Har, Gott.

¹⁵Un daut Wuat Gottes wia to mie aulsoo:

¹⁶Menschensän, kjikj, ekj näm diene Uagenlost von die wajch derch eenen Schlag; un du saust nich kloagen un nich hielen, un kjeene Tron saul die komen.

¹⁷Stell seft, stal kjeene Doodeskloag aun; binj die dienen Koppbaunt om un trakj diene Schoo aun diene Feet, un dienen Boat saust du nich vestäakjen un trua Broot nich äten.

¹⁸Un Zemorjes räd ekj toom Volkj, un Oppenowent storf miene Fru. Un ekj deed Zemorjes, aus mie befoolen wia.

¹⁹Doa säd daut Volkj to mie: West du ons nich toweeten loten, waut ons daut bedieden saul, daut du soo deist?

²⁰Un ekj säd to an: Daut Wuat Gottes es to mie aulsoo jewast:

²¹Saj toom Hus Israel: Soo sajcht de Har, Gott: Kjikj, ekj woa mien Heilichtum entheiljen, däm Stolt june Macht, de Uagenlost un daut Velangen june Seel; un june Säns un june Dajchta, dee jie trigj jeloten ha, woaren derch daut Schwieet faulen.

²²Dan woa jie doonen, aus ekj jedonen ha: Däm Boat woa jie nich vestäakjen un trua Broot nich äten,

²³un jun Koppbaunt woat opp june Kjap sennen, un june Schoo aun june Feet; jie woaren nich kloagen un nich hielen, sonda äwa june Misdoten truaren, un seften eena jäajen däm aundren.

²⁴Un soo woat junt Hesekiel to eenem Tieekjen sennen: No aul däm, waut hee jedonen haft, woa jie doonen. Wan daut kjemt, dan woa jie weeten, daut ekj de Har, Gott, sie.

²⁵Un du, Menschensän, kjikj, aun däm Dach, doa ekj von an wajchjenomen woa, äare Fastinj, de Freid äare Pracht, de Uagenlost un daut Velangen äare Seelen, äare Säns un äare Dajchta:

²⁶Aun janem Dach woat een Wajchjeranda no die komen, om daut diene Uaren hieren to loten;

²⁷aun janem Dach woat dien Mul opjedonen woaren jäajen de Wajchjeranden, un du woascht räden un nich mea vestomme. Un soo saust du an to eenem Tieekjen sennen; un see woaren weeten, daut ekj de Har sie.