Read De Bibel JHF Hesekiel 25 Bible Online

Hesekiel 25 - De Bibel JHF bible

Hesekiel 25

¹Un daut Wuat Gottes wia to mie aulsoo:

²Menschensän, recht dien Aunjesecht jäajen de Kjinja Amon un profezei jäajen an;

³un saj to de Kjinja Amon: Hieet daut Wuat vom Harn, Gottes! Soo sajcht de Har, Gott: Wiels du Ha, Ha! Sajchst äwa mien Heilichtum, daut et entheilicht es, un äwa daut Launt Israel, doa daut vewust es, un äwa daut Hus Juda, daut see enne Jefangenschoft jinjen:

⁴Doarom kjikj, woa ekj die de Kjinja vom Oosten toom Ieejentum jäwen, un see woaren äare Zeltloaga en die oppstalen un äare Woninj en die enrechten (buen); see woaren diene Frucht äten, un see woaren diene Malkj drinkjen.

⁵Un ekj woa Rabba too eenen Kameelestaul moaken, un de Kjinja Amon toom Loagaplauz de Häaden. Un jie woaren weeten, daut ekj de Har sie.

⁶Dan soo sajcht de Har, Gott: Wiels du enne Henj jeklautscht un met de Feet jestaumpt un met aule Veachtunk diene Seel die äwa daut Launt Israel jefreit hast:

⁷Doarom, kjikj, woa ekj miene Haunt jäajen die utstrakjen un die de Nazionen toom Raup jäwen, un ekj woa die ut de Velkja utroden un die ut de Lenda vetiljen; ekj woa die venichten, un du woascht weeten, daut ekj de Har sie.

⁸Soo sajcht de Har, Gott: Wiels Moab un Seir sajen: Kjikj, daut Hus Juda es aus aule Nazionen;

⁹doarom, kjikj, woa ekj de Sieden von Moab opmoaken vonne Städa häa, von siene Städa häa, en siene gaunze Jrensen, de Zia vom Launt, Bat-Jesimot, Baal-Meon un bat no Kirjatajim han,

¹⁰de Kjinja vom Oosten, no de Kjinja Amon doatoo, un woa daut an toom Ieejentum jäwen, om daut aun de Kjinja Amon nich mea jedocht woat unjre Nazionen.

¹¹Un ekj woa aun Moab Jerecht eewen; un see woaren weeten, daut ekj de Har sie.

¹²Soo sajcht de Har, Gott: Wiels Edom met Rach jäajen daut Hus Juda jehaundelt, un see sikj sea veschuldicht ha, endäm see aun an Rach eewden:

¹³Doarom, soo sajcht de Har, Gott, woa ekj miene Haunt jäajen Edom utstrakjen un Menschen un Vee ut an utroden; un ekj woa daut von Teman aun too eene Wieste moaken, un bat no Dedan han woaren see derch daut Schwieet faulen.

¹⁴Un ekj woa miene Rach äwa Edom derch de Haunt von mienem Volkj Israel brinjen, un see woaren aun Edom no mienem Oaja haundlen un no mienem Jrim. Un see woaren miene Rach kjanen lieren, sajcht de Har, Gott.

¹⁵Soo sajcht de Har, Gott: Wiels de Filista met Rach jehaundelt un Rach jeeeft ha met Veachtunk de Seelen, too Venichtunk en eewje Fientschoft:

¹⁶Doarom, soo sajcht de Har, Gott: Kjikj, ekj woa miene Haunt jäajen de Filista utstrakjen, un woa de Keretita utroden un de Äwaje aun däm Mäaeewa vetiljen.

¹⁷Un ekj woa derch Zichtjung em Jrim groote Rach aun an eewen. Un see woaren weeten, daut ekj de Har sie, wan ekj miene Rach äwa an brinj.