Read De Bibel JHF Hesekiel 27 Bible Online

Hesekiel 27 - De Bibel JHF bible

Hesekiel 27

¹Un daut Wuat Gottes wia to mie aulsoo:

²Un du, Menschensän, erhäw een Kloageleet äwa Tierus

³un saj too Tierus: Dee du wonst aun däm Toogank nom Mäa un Haundel drifst met de Velkja no väle Inslen han, soo sajcht de Har, Gott: Tierus, du sajchst: Ekj sie vollkomen aun Scheenheit!

⁴Diene Jrensen sent em Hoaten de Mäare; diene Bulied ha diene Scheenheit vollkomen jemoakt.

⁵Ut Ziepressen von Senir buden see die Plauz; see nämen Zeeda vom Libanon, om die eenen Mastboom too moaken;

⁶ut Ieekjen von Baschan muaken see diene Roodel; dien Vedakj muaken see ut Aulfenbeen, ennjeoabeit en Fichteholt von de Inslen de Kittäa.

⁷Bussus en Buntjemoaktet ut Ägipten wia sien Säajel, om die aus ne Flag to deenen; blaua un rooda Purpur von de Inslen Elischa wia diene Dakj.

⁸De Bewona von Sidon un Arwad wieren diene Roodelmanna; diene Weise, dee bie die wieren, Tierus, wieren diene Stiamanna;

⁹de Eltestasch von Gebal un siene Weise wieren bie die toom utbetre de ondichte Städen. Aule Schäp de Mäare un äare Seemana wieren bie die, om diene Woaren entotuschen.

¹⁰Persa un Lud un Put wieren en dienem Häa diene Kjrichsmana; Schild un Helm henjde see en die opp, see jeewen die Glauns.

¹¹De Säns Arwad un dien Häa wieren opp diene Miaren runtom, un Browe wieren opp diene Torms; äare Schilda henjde see runtom aune Mia opp; see muaken diene Scheenheit vollkomen.

¹²Tarsis dreef Haundel met die wäajen de Menj von aulahaunt Goot; met Selwa, Iesa, Zinkj un Blie betolde see diene Woa.

¹³Jawan, Tubal un Meschech wieren diene Haundelslied: Met Menschenseelen un koppanen Jereetschoft dreewen see Tuschhaundel met die.

¹⁴Dee vom Togarma Hus betolde met Pieed un Riedpieed un Multieren fa diene Woa.

¹⁵De Säns Dedan wieren diene Haundelslied. Väl Inslen, dee met die haundelde: Met Aulfenbeen un Ebenholt betolde see die.

¹⁶Aram dreef Haundel met die wäajen de Menj diene Woa; met Karfunkel, roodem Purpur un Buntjemoaktem un Bussus un Korale un Rubin betolde see diene Woa.

¹⁷Juda un daut Launt Israel wieren diene Haundelslied; met Weit von Minnit un Seetjebacktem un Honnich un Eelj un Balsam dreewen see Tuschhaundel met die.

¹⁸Damaskus dreef Haundel met die om de Menj diene Woa, wäajen de Menj von aulahaunt Goots, met Wien von Chelbon un Woll von Zachar.

¹⁹Wedan un Jawan von Usal tolden met jeschläpnem Iesa fa diene Woa; Kassia un Jewerzrua wieren fa dien Tuschhaundel.

²⁰Dedan dreef Haundel met die en Prachtdakje toom Rieden.

²¹Araba un aule Ferschten von Kedar wieren em Haundel met die; met fate Schop un Bakj un Kosenbakj, doamet dreewen see Haundel met die.

²²De Haundelslied von Scheba un Reghma wieren diene Haundelslied; met de aulabaste Jewerzen un met aulalei kostboare Steena un Golt betolde see diene Woa.

²³Haran un Kanne un Eden, de Haundelslied von Scheba, Assur un Kilmad wieren diene Haundelslied.

²⁴See haundelde met die en Prachtkjleeda, en Mauntel von blauen Purpur un bunten Zeich, un met bunte Teppiche, met jeflochtne un faust jedreide Strenj.

²⁵De Tarsisschäp wieren diene Karawane fa dien Tuschhaundel. Un du wordst jefelt un sea harlich em Hoaten de Mäare.

²⁶Diene Roodelmanna fieeden die opp groote Wotasch; de Oostwint saul die em Hoaten de Mäare vebräakjen.

²⁷Dien Goot un diene Woa, diene Tuschwoa, diene Seelied un diene Stiamanna, de Weise toom utbetre de ondichte Städen un dee diene Woa enntuschte, un aul diene Kjrichslied, dee bie die sent, met diene gaunze Schoa, dee un diene Medd es, woaren em Hoat de Mäare faulen aum Dach von dienem Faul.

²⁸Von däm Jeschrecht un Jetees diene Stiamanna woat de Jäajent bäben.

²⁹Un aula, dee daut Roodel fieren, de Seelied, aule Stiamanna vom Mäa, woaren ut äare Schäp stieen, woaren aum Launt gonen;

³⁰un see woaren äare Stemm äwa die hieren loten un bettalich schrieen; un see woaren Stoff opp äare Heipta schmieten un sikj enne Ausch sellen.

³¹Un see woaren sikj dient haulwen kol schäaren, un sikj Sakduak ombinjen un woaren dient haulwen met ne truaje Seel en bettrem Kloagen hielen.

³²Un en äarem Jaumre woaren see een Kloagleet äwa die erhäwen un äwa die kloagen: Wäa es aus Tierus, aus de venichten enne Mäaresmedd!

³³Aus diene Woa ut daut Mäa väakjeem, hast du väl Velkja saut jemoakt; met de Menj von dienem Rikjtum un diene Woa, hast du de Kjennichs de Ieed rikj jemoakt.

³⁴Nu, doa du vom Mäa veschloagen - wajch em deepen Wota best, un diene Woa un diene gaunze Schoa en diene Medd jefollen sent,

³⁵aule Bewona de Inslen entsaten sikj äwa die, un äare Kjennichs schudade, äare Aunjesechta zetren;

³⁶de Haundelslied unjre Velkja seften äwa die. Een Schrakj best du jeworden, un best opp eewich doahan!