Read De Bibel JHF Hesekiel 28 Bible Online

Hesekiel 28 - De Bibel JHF bible

Hesekiel 28

¹Un daut Wuat Gottes wia to mie aulsoo:

²Menschensän, saj toom Ferscht von Tierus: Soo sajcht de Har, Gott: Wiels dien Hoat sikj erhäft, un du sajchst: «Ekj sie een Gott, ekj sett opp eene Gottessett em Hoat de Mäaren!» Doa du doch een Mensch best un nich Gott, un dien Senn däm Senn Gottes jlikjstalst.

³Kjikj, du best weisa aus Daniel, nuscht Heemlichet es dunkel fa die;

⁴derch diene Weisheit un derch dien Vestaunt hast du die Rikjtum jemoakt, un hast Golt un Selwa en diene Schauzkoma jesaumelt;

⁵derch diene groote Weisheit hast du met dienem Haundel dien Rikjtum jemoakt, un dien Hoat haft sikj wäajen dien Rikjtum erhowen;

⁶doarom, soo sajcht de Har, Gott: Wiels du dienen Senn met däm Senn Gottes vejlikjst,

⁷doarom, kjikj, woa ekj framde, de Jewault doonende de Nazionen, äwa die brinjen; un see woaren äare Schwieeta trakjen jäajen de scheene Weisheit, un dienen Glauns entheiljen.

⁸Enne Kul woaren see die raufschmieten, un du woascht met eenem Erschloagnen Doot stoawen em Hoaten de Mäare.

⁹Woascht du dan em Aunjesecht von diene Merda sajen: Ekj sie een Gott! Doa du doch een Mensch best, un nich Gott, en dee äare Haunt, dee die ombrinjen?

¹⁰Met däm Doot de Onbeschnädne woascht du stoawen derch de Haunt de Framde; dan ekj ha jerät, sajcht de Har, Gott.

¹¹Un daut Wuat Gottes wia to mie aulsoo:

¹²Menschensän, erhäw een Kloagleet äwa däm Kjennich von Tierus un saj to am: Soo sajcht de Har, Gott: Dee du daut Säajel de Aufschluss wieescht, voll Weisheit un vollkomen aun Scheenheit,

¹³du wieescht en Eden, däm Goaden Gottes; aulahaunt Edelsteena wia diene Dakj: Sardis, Topas un Diamaunt, Chriesolit, Onniks un Jaspies, Safier, Karfunkel un Smaracht un Golt. Daut Konstwoakj von diene Trompeeten un Fleeten wia bie die; aun däm Dach, doa du jeschaufen wordst, worden see reedjemoakt.

¹⁴Du wieescht een bedakjenda, jesaulwta Cherub, un ekj haud die doatoo jemoakt; du wieescht oppem heiljen Boajch Gottes, du waundelsd enne Medd von Fiasteena.

¹⁵Vollkomen wieescht du en diene Wäaj von däm Dach aun, doa du jeschaufen wordst, bat Orrajcht aun die jefungen wort.

¹⁶Derch dienen groote Haundel wort dien Ennaliche met Jewault erfelt, un du sindichst; un ekj ha die entheilicht vom Boajch Gottes wajch un ha die, du bedakjenda Cherub, vetilcht ut de Medd de Fiasteena.

¹⁷Dien Hoat haft sikj erhowen wäajen diene Scheenheit, du hast diene Weisheit tonicht jemoakt wäajen dienem Glauns; ekj ha die oppe Ieed jeschmäten, ha die ver de Kjennichs doahan jejäft, doamet see äare Lost aun die seenen.

¹⁸Derch de Menj diene Misdoten, en de Ojjerajchtichkjeit en dienem Haundlen, hast du diene Heilichtums entheilicht; doarom ha ekj ut dienem Ennalichen een Fia utgonen loten, daut die vebrent haft, un ekj ha die oppe Ieed too Ausch jemoakt ver dee äare Uagen, dee die seenen.

¹⁹Aula, dee die unjre Velkja kjanen, wundren sikj äwa die; een Schrakj best du jeworden, un best opp eewich doahan!

²⁰Un daut Wuat Gottes wia to mie aulsoo:

²¹Menschensän, recht dien Aunjesecht jäajen Sidon un profezei jäajen an,

²²un saj: Soo sajcht de Har, Gott: Kjikj, ekj well aun die, Sidon, un well mie veharlichen en diene Medd; un see woaren weeten, daut ekj de Har sie, wan ekj Jerechten aun am eew un mie aun am heilich erwies.

²³Un ekj woa de Past doahan schekjen un Bloot opp siene Gaussen; un dootjeschloagne woaren en siene Medd derch daut Schwieet faulen, daut runtom jäajen an sennen woat. Un see woaren weeten, daut ekj de Har sie.

²⁴Un fa daut Hus Israel saul daut nich mea een stäakjenda Dorn un een schrinjenda Hachel jäwen von aule om an häa, dee an veachten. Un see woaren weeten, daut ekj de Har, Gott, sie.

²⁵Soo sajcht de Har, Gott: Wan ekj daut Hus Israel ut de Velkja saumlen woa, unja dee see vestreit worden sent, un ekj mie aun an heilje ver de Uagen de Nazionen, dan woaren see en äarem Launt wonen, daut ekj mienem Kjnajcht Jakob jejäft ha.

²⁶Un see woaren en Sechaheit doa wonen un Hiesa buen un Wienboaj plaunten; un see woaren en Sechaheit wonen, wan ekj Jerechten jeeeft aun aule ha, dee an ut äare Omjäajent veachten. Un see woaren weeten, daut ekj de Har, äa Gott, sie.