Read De Bibel JHF Hesekiel 29 Bible Online

Hesekiel 29 - De Bibel JHF bible

Hesekiel 29

¹Aum 10-den Joa, em 10-den Moonat, aum 12-ten em Moonat, wia daut Wuat Gottes to mie aulsoo:

²Menschensän, recht dien Aunjesecht jäajen däm Farao, däm Kjennich von Ägipten, un profezei jäajen am un jäajen gaunz Ägipten.

³Räd un saj: Soo sajcht de Har, Gott: Kjikj, ekj well aun die, Farao, Kjennich von Ägipten, du grootet Seeojjeheia, daut en siene Streem licht, daut doa sajcht: Mien Stroom jehieet mie, un ekj ha am fa mie jemoakt.

⁴Un ekj woa Hoakes en diene Kjennbaken lajen un de Fesch en diene Streem aun diene Scheepen sikj henjen loten, un woa die ut dienem Stroom ruttrakjen met aule Fesch, en diene Streem, dee aun diene Scheepen henjen.

⁵Un ekj woa die enne Wieste schmieten, die un aule Fesch en diene Streem; oppem frieen Flekj woascht du faulen; du woascht nich oppjehowen un nich jesaumelt woaren: Dan Tieren vom Launt un de Väajel aum Himmel ha ekj die toom Äten jejäft.

⁶Un de Bewona von Ägipten woaren weeten, daut ekj de Har sie. Wiels see däm Hus Israel een Ruastock jewast sent -

⁷wan see die met de Haunt foten, kjnekjst du un reetst an de gaunze Schulla auf; un wan see sikj opp die länen, vebruakst du un muakst äare Hoften schlaup,

⁸doarom, soo sajcht de Har, Gott: Kjikj, ekj brinj daut Schwieet äwa die un woa Menschen un Vee ut die utroden;

⁹un daut Launt Ägipten woat eene Wieste un Eed woaren. Un see woaren weeten, daut ekj de Har sie. Wiels de Farao sajcht: de Stroom es miena, un ekj ha am jemoakt,

¹⁰doarom, kjikj, well ekj an die un aun diene Streem; un ekj woa daut Launt Ägipten too eene drieeje eede Wieste moaken, von Migdol bat no Suene, bat aun de Jrens von Ätiopien.

¹¹De Menschenfoot woat daut nich derchwaundren, un de Foot de Tieren woat daut nich derchwaundren, un daut woat nich bewont sennen, 40 Joa.

¹²Un ekj woa daut Ägiptenlaunt to eene Wieste moaken enne Medd von vewuste Lenda, un siene Städa woaren enne Medd ladje Städa eene Wieste sennen, 40 Joa; un ekj woa de Ägipta unja de Nazionen vestreien un an en de Lenda vestreien.

¹³Dan soo sajcht de Har, Gott: Aum Enj von de 40 Joa woa ekj de Ägipta ut de Velkja saumlen, wuahan see vestreit wieren;

¹⁴un ekj woa de Jefangenschoft de Ägipta dreien un an en daut Launt Patros, en daut Launt von äarem Uaschprunk, trigjbrinjen, un doa selfst woaren see een kjlienet Kjennichrikj sennen.

¹⁵Un daut woat jerinja sennen aus de aundre Kjennichrikjs un sikj nich mea äwa de Nazionen erhäwen; un ekj well an vekjlandren, daut see nich mea äwa de Nazionen harschen.

¹⁶Un daut saul nich wiedahan däm Hus Israel to eene Tooflucht sennen, dee de Misdot em Jedajchnis brinjt, endäm see sikj no an handreien. Un see woaren weeten, daut ekj de Har, Gott, sie.

¹⁷Un daut passieed aum 27-sten Joa, aum ieeschten Moonat, däm ieeschten em Moonat, doa wia daut Wuat Gottes to mie aulsoo:

¹⁸Menschensän, Nebukadnezar, de Kjennich von Babel, haft sienem Häa eene schwoare Oabeit moaken loten jäajen Tierus. Jiedret Haupt es kol jeworden, un jiedre Schulla es aufjeräwen; un von Tierus es am un sienem Häa kjeen Loon fa de Oabeit jejäft worden, dee hee jäajen ar jedonen haft.

¹⁹Doarom, soo sajcht de Har, Gott: Kjikj, ekj jäw Nebukadnezar, däm Kjennich von Babel, daut Launt Ägipten; un hee woat sien Rikjtum wajchdroagen un sienen Raup roowen un sien Jeroowdet roowen, un daut woat de Loon fa sien Häa sennen.

²⁰Aus siene Belooninj, om daut hee jeoabeit haft, ha ekj am daut Ägiptenlaunt jejäft, wiels see fa mie jeoabeit ha, sajcht de Har, Gott.

²¹Aun janem Dach woa ekj däm Hus Israel een Huarn väakomen loten, un die woa ekj daut Mul en äare Medd opmoaken; un see woaren weeten, daut ekj de Har sie.