Read De Bibel JHF Hesekiel 3 Bible Online

Hesekiel 3 - De Bibel JHF bible

Hesekiel 3

¹Un hee säd to mie: Menschensän, at, waut du finjst; at dise Roll, un go han, räd toom Hus Israel.

²Un ekj muak mien Mul op, un hee jeef mie dise Roll to äten.

³Un hee säd to mie: Menschensän, fell dien Buck un fell dien Lief met dise Roll, dee ekj die jäw. Un ekj aut ar, un see wia en mienem Mul seet aus Honnich.

⁴Un hee säd to mie: Menschensän! Sto opp, go han nodäm Hus Israel un räd to an met miene Wieed!

⁵Dan nich to eenem Volkj von onvestendje Sproak un schwoare Räden best du jeschekjt, sonda nom Hus Israel;

⁶nich no väl Velkja von onvestendje Sproak un schwoare Räden, dee äare Wieed du nich vesteist, sonda no an ha ekj die jeschekjt; see kjennen opp die hieren.

⁷Oba daut Hus Israel woat nich opp die hieren wellen, dan see wellen nich opp mie hieren. Dan daut gaunze Hus Israel haft eenen hoaden Stiern un vestocktet Hoat.

⁸Kjikj, ekj ha dien Aunjesecht hoat jemoakt jäajenäwa äarem Aunjesecht, un dien Stiern hoat jäajenäwa äarem Stiern;

⁹aus een Diamaunt, dee hoada aus een Fels es, ha ekj dien Stiern jemoakt. Forcht die nich un erschrakj nich ver äarem Aunjesecht, dan een wadaspanstjet Hus sent see.

¹⁰Un hee säd to mie: Menschensän, aule miene Wieed, dee ekj to die räden woa, nemm en dien Hoat opp un hia dee met diene Uaren;

¹¹un moak die opp, go han no de Wajchjefieede, no de Kjinja von dienem Volkj, un räd to an un saj to an: «Soo sajcht de Har, Gott!» See muchten daut hieren ooda daut loten.

¹²Un de Jeist hoof mie nohecht; un ekj hieed unja mie däm Schaul von een stoakjet Jetees: «Jepreist (jeloft) es de Harlichkjeit Gottes von äare Städ häa!»

¹³un daut Ruzhen de Flichten de läwendje Wäsent, dee eenaunda aunschieren, un daut Ruzhen de Räda bie an, un däm Schaul von eenem stoakjen Jetees.

¹⁴Un de Jeist hoof mie opp un naum mie wajch; un ekj fua doahan, vebettat enne Gloot en mienem Jeist; un de Haunt Gottes wia stoakj opp mie.

¹⁵Un ekj kaum no Tel-Abib no de Wajchjefieede, dee aum Fluss Kebar wonden; un doa, woa see sauten, doa saut ekj säwen Doag beteibt en äare Medd.

¹⁶Un daut passieed aum Enj von säwen Doag, doa wia daut Wuat Gottes to mie aulsoo:

¹⁷Menschensän, ekj ha die däm Hus Israel toom Wajchta jesat; un du saust daut Wuat ut mienem Mul hieren un an von mienthaulwen woarnen.

¹⁸Wan ekj toom Jesazloosen saj: Du saust jewess stoawen! Un du woarnst am nich un rädst nich, om däm Jesazloosen ver sienem jesazloosen Wajch too woarnen, om am aum Läwen too erholen, soo woat hee, de Jesazloosa, wäajen siene Ojjerajchtichkjeit stoawen, oba sien Bloot woa ekj von diene Haunt fodren.

¹⁹Oba wan du däm Jesazloosen woarnst, un hee dreit nich om von siene Jesazloosichkjeit un von sienem jesazloosen Wajch, soo woat hee wäajen siene Ojjerajchtichkjeit stoawen; oba du hast diene Seel jerat.

²⁰Un wan een Jerajchta von siene Jerajchtichkjeit trigjdreit un orajcht deit, un ekj eenen Aunstoos ver am laj, soo saul hee stoawen. Wan du am nich woarnst, soo woat hee wäajen siene Sinden stoawen, un siene jerajchte Doten, de hee jedonen haft, woat nich jedocht woaren; oba sien Bloot woa ekj von diene Haunt fodren.

²¹Oba wan du am, däm Jerajchten, woarnst, doamet de Jerajchta nich sindicht, un hee sindicht nich, soo woat hee jewess läwen, wiels hee sikj haft woarnen loten; un du, du hast diene Seel jerat.

²²Un de Haunt Gottes kaum doa äwa mie, un hee säd to mie: Moak die opp, go rut en daut Tol, un doa well ekj met die räden.

²³Un ekj muak mie opp un jinkj rut en daut Tol; un kjikj, doa selfst stunt de Harlichkjeit Gottes, aus de Harlichkjeit, dee ekj aum Fluss Kebar jeseenen haud; un ekj foll opp mien Aunjesecht dol.

²⁴Un de Jeist kaum en mie un stald mie opp miene Feet. Un hee räd met mie un säd to mie: Go, schlut die en dienem Hus en.

²⁵Un du, Menschensän, kjikj, maun woat die Strenj aunlajen un die doamet binjen, daut du nich woascht ut äare Medd rutgonen kjennen.

²⁶Un ekj woa diene Tung aun dienem Ben baken loten, doamet du stemmloos woascht un an nich mea trajchtwiesen kaust; dan een wadaspanstjet Hus sent see.

²⁷Oba wan ekj met die räden woa, well ekj dien Mul opmoaken, un du saust to an räden: «Soo sajcht de Har, Gott!» Wäa hieren well, dee hia, un wäa daut lat, dee lot daut; dan een Wadaspanstjet Hus sent see.