Read De Bibel JHF Hesekiel 30 Bible Online

Hesekiel 30 - De Bibel JHF bible

Hesekiel 30

¹Un daut Wuat Gottes wia to mie aulsoo:

²Menschensän, profezei un saj: Soo sajcht de Har, Gott: Hielt! Wee de Dach!

³Dan dichtbie es de Dach; jo, de Dach Gottes es dicht, een Dach met Wolkjen: De Tiet de Nazionen woat hee sennen.

⁴Un daut Schwieet woat äwa Ägipten komen; un em Launt Ätiopien woat groote Angst sennen, wan dootjeschloagne en Ägipten faulen un maun sienen Rikjtum wajchnemt, un siene Gruntfausten (Grunt) doljeräten woaren.

⁵Ätiopien un Put un Lud un aulet Mischvolkj un Kub un de Kjinja vom Bundeslaunt woaren met an derch daut Schwieet faulen.

⁶Soo sajcht de Har: Jo, dee, dee Ägipten hanschmieten, woaren faulen, un hansinkje woat de Stolt von siene Macht; von Migdol bat no Suene woaren see derch daut Schwieet faulen, sajcht de Har, Gott.

⁷Un see woaren vewust ligjen enne Medd von vewuste Lenda, un siene Städa woaren enne Medd von ladje Städa sennen.

⁸Un see woaren weeten, daut ekj de Har sie, wan ekj Fia en Ägipten aunlaj un aul siene Halpa veschmatat woaren.

⁹Aun janem Dach woaren Booten von mie en Schäp utfoaren, om daut sechre Ätiopien too enjsten; un groote Angst woat unja an aum Dach Ägiptens sennen; dan kjikj, daut kjemt!

¹⁰Soo sajcht de Har, Gott: Jo, ekj woa däm Jetimmel Ägiptens een Enj moaken derch de Haunt Nebukadnezar, däm Kjennich von Babel.

¹¹Hee un sien Volkj met am, dee Jewault doonende de Nazionen, woaren doatoo jefieet woaren, om daut Launt too vedoawen; un see woaren äare Schwieeta trakjen jäajen Ägipten un daut Launt met dootjeschloagne fellen.

¹²Un ekj woa de Streem utdräjen, un daut Launt en de Haunt von Beesewichta vekjeepen, un daut Launt un siene Menj derch ne Framde Haunt vewuste. Ekj, de Har, ha jerät.

¹³Soo sajcht de Har, Gott: jo, ekj woa de Jetzen vetiljen un de Jetzen ut Nof wajchschaufen, un kjeen Ferscht ut däm Ägiptenlaunt saul mea sennen; un ekj woa Angst en daut Ägiptenlaunt brinjen.

¹⁴Un ekj woa Patros vewuste, un Fia en Zoan aunlajen, un äwa No Rechten.

¹⁵Un ekj woa mien Jrim äwa Sin utjeeten, de Fastinj Ägiptens; un de Menj von No woa ekj utroden.

¹⁶Un ekj woa Fia en Ägipten aunlajen; Sin woat fa Angst bäben, un No woat enjenomen woaren, un Nof haft Bedrenja äwadach.

¹⁷De Jinjlinje von Awen un Pi-Besath woaren derch daut Schwieet faulen, un see selfst woaren enne Jefangenschoft gonen.

¹⁸Un en Tachpanhes woat de Dach vedunkelt woaren, wan ekj doa selfst daut Joch de Ägipta vebräakj, un äare stolte Macht doa een Enj nemt; Wolkjen woaren an bedakjen, un äare Dajchta woaren en de Jefangenschoft gonen.

¹⁹Un soo woa ekj aun Ägipten Jerechte eewen; un see woaren weeten, daut ekj de Har sie.

²⁰Un daut passieed em 11-ten Joa, aum ieeschten Moonat, däm säwenden vom Moonat, doa wia daut Wuat Gottes to mie aulsoo:

²¹Menschensän, däm Oarm vom Farao, däm Kjennich von Ägipten, ha ekj vebroaken; un kjikj, hee es nich vebungen worden, daut maun Heelmeddel aunläd, daut maun Vebaunt aunjelajcht haud, am to vebinjen, om am to stoakjen, doamet hee daut Schwieet foten kunn.

²²Doarom sajcht de Har, Gott, aulsoo: Kjikj, ekj well aun däm Farao, däm Kjennich von Ägipten, un woa siene beid Oarms vebräakjen, däm stoakjen un däm vebroaknen, un woa daut Schwieet ut siene Haunt faulen loten.

²³Un ekj woa de Ägipta unja de Nazionen vesprenje un an enne Lenda vestreien.

²⁴Un ekj woa däm Kjennich von Babel de Oarms stoakjen un mien Schwieet en siene Haunt jäwen; un de Oarms vom Farao woa ekj vebräakjen, daut hee aus een Erschloagna ver am stänen woat.

²⁵Un ekj woa de Oarms vom Kjennich von Babel stoakjen, oba de Oarms vom Farao woaren sinkjen. Un see woaren weeten, daut ekj de Har sie, wan ekj mien Schwieet en de Haunt vom Kjennich von Babel jäw, un hee daut jäajen daut Ägiptenlaunt strakjen woat.

²⁶Un ekj woa de Ägipta unja de Nazionen vestreien un dee en de Lenda vestreien; un see woaren weeten, daut ekj de Har sie.