Read De Bibel JHF Hesekiel 35 Bible Online

Hesekiel 35 - De Bibel JHF bible

Hesekiel 35

¹Un daut Wuat Gottes wia to mie aulsoo:

²Menschensän, recht dien Aunjesecht jäajen de Jebirje Seir, un profezei jäajen an,

³un saj to am: Soo sajcht de Har, Gott: Kjikj, ekj well aun die, Boajch Seir; un ekj woa miene Haunt jäajen die utstrakjen un die to eene Wieste un Vewustunk moaken;

⁴un ekj woa diene Städa Eed moaken, un du selfst woascht eene Wieste woaren. Un du woascht weeten, daut ekj de Har sie.

⁵Wiels du eene bestendje Fientschoft häajst un de Kjinja Israel de Jewault vom Schwieet jeefst, to Tiet äare Noot, toom Enj de Tiet de Ojjerajchtichkjeit:

⁶Doarom, soo woa ekj läw, sajcht de Har, Gott, ekj woa die too Bloot moaken, un Bloot woat die vefoljen; wiels du hast nich Bloot jehaust, soo saul die Bloot vefoljen.

⁷Un ekj woa däm Boajch Seir too eene Wieste un Vewustunk moaken, un däm Han- un Häa gonende ut am utroden.

⁸Un siene Boaj woa ekj met dootjeschloagne fellen; opp diene Aunboaj un en diene Läachten un en aule diene Schluchten sellen vom Schwieet dootjeschloagne faulen.

⁹Too eene eewje Wieste woa ekj die moaken, un diene Städa sellen nich mea bewont woaren. Un jie woaren weeten, daut ekj de Har sie.

¹⁰Wiels du sädst: Dee beid Nazionen un de beid Lenda sellen miene sennen, un wie woaren daut aus Ieejentum nämen, doa doch de Har doa selfst wia:

¹¹Doarom, soo woa ekj läw, sajcht de Har, Gott, woa ekj no dienem Oaja haundlen un no diene Aufgonst, aus du met an omjegonen best no dienem Hauss; un ekj woa mie unja an to weeten jäwen, sooboolt ekj die jerecht ha.

¹²Un du woascht weeten, daut ekj, de Har, aul dien Lastren jehieet ha, daut du jäajen de Boaj Israels jerät hast, endäm du sädst: See sent vewust, un see sent to Speise jejäft!

¹³Un jie ha met junem Mul jäajen mie groot jedonen un june Wieed jäajen mie jefieet; ekj ha daut jehieet.

¹⁴Soo sajcht de Har, Gott: Wan sikj de gaunze Ieed freit, woa ekj die Vewustunk reedmoaken.

¹⁵Aus du diene Freid haudst aun däm Oawdeel aum Hus Israel, doarom daut et vewust wia, krakjt soo woa ekj die doonen: Eene Wieste saust du woaren, Boajch Seir un gaunz Edom aula toop! Un see woaren weeten, daut ekj de Har sie.